សម្រស់ធម្មជាតិពីរកន្លែងនៅកម្ពុជា កំពុងអភិវឌ្ឍជាតំបន់ទេសចរណ៍នៅឡើយ ប៉ុន្តែត្រូវបានប្រជាជនឧស្សាហ៍ទៅលេងកម្សាន្ត ដើម្បីផ្ដិតយកទេសភាពដ៏ល្អឯកដូចរូបគំនូរ និងស្រូបយកខ្យល់អាកាសដ៏បរិសុទ្ធនៅទីនោះ។ ខាងក្រោមនេះជាតំបន់ធម្មជាតិពីរកន្លែងទេសភាពស្អាតបំផុត កម្រមានអ្នកទៅដល់៖
១.ដីច្រោះនៅឧត្ដរមានជ័យទេសភាពដូចផ្ទាំងគំនូរ
មើលមួយភ្លែតស្មានតែនៅស្រុកគេ តាមពិតមិនមែនទេទេសភាពដ៏ស្រស់ស្អាតនេះ គឺស្ថិតនៅក្នុងប្រទេសកម្ពុជានៅ ជាប់ភូមិចំនួន ០៣ គឺភូមិខ្នាចឫស្សី ភូមិពោធិវង្ស សង្កាត់បន្សាយរាក់ និងភូមិត្រពាំងទូង ក្នុងសង្កាត់កូនគ្រៀល ក្រុងសំរោង ខេត្តឧត្តរមានជ័យ។ ទិដ្ឋភាពដ៏ស្រស់ស្អាតប្រៀបដូចរូបគំនូរនេះ គឺជាសម្រស់ធម្មជាតិពិតៗ នៃភ្នំពស់រលោះធំ ដែលជាទីតាំងធម្មជាតិមួយ នៅតាមខ្សែក្រវាត់ នៃបន្ទាត់ព្រំដែនក្នុងខេត្តឧត្តរមានជ័យ ដែលមានដីច្រោះបង្កើតបានជាទស្សនីយភាពដ៏អស្ចារ្យមិននឹកស្មានដល់។
កំពុងត្រូវបានមន្ត្រីជំនាញពាក់ព័ន្ធនៅខេត្តឧត្តរមានជ័យ ចុះទៅពិនិត្យមើលទីតាំងដើម្បីរៀបចំអភិវឌ្ឍតំបន់នេះឲ្យក្លាយជាតំបន់ទេសចរណ៍នា ពោលគឺប្រែក្លាយទៅជាតំបន់រមណីយដ្ឋានប្រវត្តិសាស្ត្រដីដុះដែលមិនធ្លាប់មាន។
២. តំបន់ដីដុះដ៏ធំមួយនៅខេត្តកំពង់ស្ពឺ
ដោយឡែកកាលពីថ្មីៗនេះ ប្រជាពលរដ្ឋក្នុងខេត្តកំពង់ស្ពឺ បានប្រទះឃើញតំបន់១ មានដីដុះបញ្ចេញក្បូរក្បាច់ប្លែកៗ នៅជាប់ៗគ្នាលើផ្ទៃដីដ៏ធំ នៅក្បែរជើងភ្នំតូច-ធំ គួរឲ្យចាប់អារម្មណ៍បំផុត។ បើតាម លោក ស៊ិន សាវន ជាគ្រូបង្រៀន ក្នុងខេត្តកំពង់ស្ពឺ ទើបតែបានទៅតំបន់នោះ បានប្រាប់ Sabay តាមទូរសព្ទថា ដីច្រោះដ៏អស្ចារ្យនោះ ស្ថិតនៅភូមិបន្ទាយរការ ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ។ លោកថា នៅទីនោះមានទេសភាពស្អាតខ្លាំងកម្របានឃើញ មានដើមឈើតូចៗ ដុះតាមជម្រាលភ្នំខ្ពស់ទាប ពណ៌ខៀវខ្ចី។
អ្វីដែលភ្ញាក់ផ្អើលគឺដីដុះ ដែលកើតឡើងដោយសារ ទឹកហូរចេញពីកំពូលភ្នំនានា បានពាំនាំដីទាំងនោះបង្កើតឲ្យក្លាយជាទិដ្ឋភាពដ៏ប្លែក ប្រៀបដូចជាប្រាង្គប្រាសាទដូច្នោះដែរ។ ប្រសិនបើបានទៅដល់ប្រាកដជារំភើបនឹងសម្រស់ធម្មជាតិ និងខ្យល់អាកាសដ៏បរិសុទ្ធផងនោះ ប្រាកដជារំសាយអស់នូវរាល់ទុក្ខកង្វល់ផ្សេងៗ។
ប្រសិនបើចង់ទៅដល់ទីតាំងនោះ ត្រូវធ្វើដំណើរពីភ្នំពេញតាមផ្លូវជាតិលេខ៤ ប្រមាណ៧០គីឡូម៉ែត្រហួសផ្សារត្រពាំងក្រឡឹងបន្តិច ប្រិយមិត្តនឹងឃើញខ្លោងទ្វារវត្តព្រៃរមៀត នៅខាងស្ដាំដៃ។ ចូលតាមខ្លោងទ្វារវត្តនោះទៅត្រង់រហូត ប្រមាណជាង២០គីឡូម៉ែត្រ នឹងទៅដល់សាលាឃុំក្រាំងដីវ៉ាយ។ សាកសួរមន្ត្រីសាលាឃុំបន្ថែម ប្រិយមិត្តប្រាកដជាទៅដល់តំបន់នោះ ដោយមិនពិបាករកឡើយ៕
ប្រភព៖ sabay.com.kh