ការស្រាវជ្រាវបានអោយដឹងថា មនុស្សស្រីប្រហែលជាមួយបីភាគ និងបុរសប្រមាណ ១៥ ភាគរយមានបញ្ហាកង្វះចំណង់ផ្លូវភេទ។ ប៉ុន្តែ មានរឿងជាច្រើនដែលអ្នកអាចធ្វើបាន ដើម្បីអោយជីវិតផ្លូវភេទនោះវិលមករកសភាពដើមវិញ។
រៀបគម្រោងជួបគ្នាពេលយប់អោយបានច្រើន
បើសិនជាបរិយាកាសដ៏សប្បាយនៅថ្ងៃសៅរ៍ជាមួយប្តីមិនធ្លាប់មាននោះ វាអាចនឹងធ្វើអោយចំណង់ផ្លូវភេទដួលផ្កាប់មុខបាន។ ចូរបង្កើតភាពរ៉ូមែនទិចរបស់អ្នក តាមរយៈការចេញទៅខាងក្រៅផ្ទះ ដើម្បីធ្វើដើរជាមួយគ្នាដូចការណាត់ជួបគ្នាកាលពីមុនៗទៅ។ ការណាត់ជួបគ្នានេះ អាចជាការមើលកុន ឬចេញទៅញ៉ាំអាហារពេលយប់ជាមួយគ្នាក៏បានដែរ។ ចំពោះឱកាសវិញគឺថា អ្នកទាំងពីរនឹងមានពេលវេលាក្នុងរាត្រីមួយដ៏ល្អទៀតផង។
ផ្លាស់ប្តូរថ្នាំគ្រាប់ពន្យារកំណើត
ការប្រែប្រួលអ័រម៉ូន អាចក្លាយទៅជាបញ្ហា ដែលប៉ះពាល់ដល់ចំណង់ផ្លូវភេទបាន។ ថ្នាំគ្រាប់ពន្យារកំណើត អាចជាដើមហេតុដ៏ធំបំផុតមួយ ព្រោះវាអាចកាត់បន្ថយការផលិតអ័រម៉ូន Testosterone របស់រាងកាយ ដែលជាហេតុនាំអោយចំណង់ផ្លូវភេទធ្លាក់ចុះ។ វាប្រហែលជាអាចនាំអោយមានការឈឺចាប់ក្នុងពេលរួមភេទទៀតផង។ ទោះបីជាអ្នកមិនប្រើថ្នាំពន្យារកំណើតក៏ដោយ ក៏ការយល់ដឹងអំពីស្ថានភាពនៃអ័រម៉ូនអាចជួយអោយអ្នកបង្កើនចំណង់ផ្លូវភេទបានដែរ។ អ័រម៉ូន Prolactin ធ្វើអោយថយចុះអ័រម៉ូន Estrogen និងតេស្តូស្តេរ៉ូន ក្នុងពេលស្ត្រីបំបៅដោះកូន។ លើសពីនេះទៅទៀត ស្ត្រីដែលរាំងរដូវអាចធ្វើអោយអ័រម៉ូន Testosterone និង Estradiol ដែលជាប្រភេទរបស់អ័រម៉ូន Estrogen ដែរនោះថយចុះ។
ត្រួតពិនិត្យការប្រើប្រាស់ថ្នាំរបស់អ្នក
ចូរមើលការប្រើប្រាស់ថ្នាំរបស់អ្នកផង ព្រោះថ្នាំដែលចេញដោយគ្រូពេទ្យមួយចំនួន អាចជាដើមហេតុនាំអោយចំណង់ផ្លូវភេទធ្លាក់ចុះបាន។ ក្រៅពីថ្នាំពន្យារកំណើត ថ្នាំផ្សេងៗទៀតដូចជា ថ្នាំបញ្ចុះសម្ពាធឈាម ថ្នាំព្យាបាលការច្រាលទឹកអាស៊ីតចេញពីក្រពះ ថ្នាំព្យាបាលជំងឺថប់អារម្មណ៍ និងបាក់ទឹកចិត្ត ក៏សុទ្ធតែជាមូលហេតុដែលធ្វើអោយប៉ះពាល់ដល់ចំណង់ផ្លូវភេទបានដែរ។
ប្រើប្រេងរំអិល
អ្នកប្រាកដជាគ្មានអារម្មណ៍ឡើយ បើសិនជាការរួមភេទនោះមានការឈឺចាប់ខ្លាំង។ មូលហេតុដ៏ចំបងរបស់វា គឺការស្ងួតនៅតំបន់ទ្វារមាសពេក។ ប្រសិនបើទ្វារមាសស្ងួតពេក គឺជាមូលហេតុធ្វើអោយអ្នកឈឺចាប់ក្នុងពេលរួមភេទ ចូរព្យាយាមប្រើទឹករំអិលបន្ថែមវិញទៅ។ ក្នុងករណីមិនអាចស្តារស្ថានភាពបានទេ អ្នកគួរតែទៅពិគ្រោះជាមួយអ្នកឯកទេសខាងរោគស្ត្រីបន្ថែមទៀតហើយ។
បំបាត់បញ្ហាស្ត្រេស មុនពេលរួមភេទ
កត្តាដែលធ្វើអោយមានភាពតានតឹងរៀងរាល់ថ្ងៃមានដូចជាការងារ ការរៀនសូត្ររបស់កូន និងកិច្ចការក្នុងផ្ទះ … សុទ្ធតែជះឥទ្ធិពលយ៉ាងខ្លាំងក្លាទៅលើជីវិតផ្លូវភេទ។ ស្ត្រេស អាចធ្វើអោយរាងកាយផលិតអ័រម៉ូន Cortisol ដែលរាងកាយត្រូវការចំនួនតិចតួចប៉ុណ្ណោះ ប៉ុន្តែ វាអាចទៅទប់ស្កាត់ចំណង់ផ្លូវភេទ ដែលរាងកាយត្រូវការផលិតអោយច្រើនទៅវិញ។ មុនពេលចាប់ផ្តើមការងារលើគ្រែ ចូរស្វែងរកនូវវិធីសាស្ត្រងាយៗដើម្បីធ្វើចិត្តអោយស្រឡះសិន៕