ការរួមភេទក្នុងអំឡុងពេលមានផ្ទៃពោះ គឺជារឿងក្រោយគេបង្អស់នៅក្នុងចិត្តស្ត្រីមួយចំនួន ជាពិសេស នៅពេលដែលពួកគេកំពុងតែមានបញ្ហាចង្អោរ ក្អួត និងអស់កំលាំងយ៉ាងខ្លាំង។ ចំនែកឯស្ត្រីខ្លះទៀតបែរជាចង់រួមភេទខ្លាំងជាងមុន ក្នុងអំឡុងពេលមានផ្ទៃពោះ។ បុរសក៏អញ្ចឹងដែរ! បុរសខ្លះចូលចិត្តរួមភេទជាមួយស្ត្រីមានផ្ទៃពោះ ប៉ុន្តែ បុរសខ្លះទៀតបែរជាភ័យខ្លាចអំពីការប៉ះពាល់ដល់ទារក ឬដៃគូដែលមានផ្ទៃពោះទៅវិញ។
តើការរួមភេទក្នុងអំឡុងពេលមានផ្ទៃពោះ មានសុវត្ថិភាពដែរឬទេ?
វាអាចជាដំណឹងល្អ ឬដំណឹងអាក្រក់អាស្រ័យទៅលើការគិតរបស់អ្នក។ អ្នកជំនាញបាននិយាយថា “ការរួមភេទអំឡុងពេលមានផ្ទៃពោះ មានសុវត្ថិភាពសម្រាប់ស្ត្រីភាគច្រើន ដោយមិនមានផលវិបាកអ្វីទាំងអស់។ មនុស្សមួយចំនួនមានអារម្មណ៍សប្បាយរីករាយជានឹងការរួមភេទអំឡុងពេលមានផ្ទៃពោះណាស់ ហើយអ្នកខ្លះទៀត រីករាយជាមួយវាតិចតួចប៉ុណ្ណោះ”។
ក្នុងអំឡុងពេលត្រីមាសដំបូង ស្ត្រីជាច្រើនបានរាយការណ៍ថា ពួកគេគ្មានចំណង់រួមភេទនោះទេ ដោយសារតែពួកគេមានអារម្មណ៍ធុញទ្រាន់នឹងការក្អួតចង្អោរ ប៉ុន្តែ ក្នុងអំឡុងពេលត្រីមាសទីពីរ ពួកគេមានអារម្មណ៍ល្អប្រសើរជាងមុន និងមានការបញ្ចេញទឹករំអិលកាន់តែច្រើន។
ទាំងអស់នេះហើយដែលធ្វើអោយការរួមភេទមានភាពទាក់ទាញ និងពេញចិត្តកាន់តែខ្លាំង។ ជាងនេះទៅទៀតនោះ ស្ត្រីភាគច្រើនមិនទាន់មានពោះធំណាស់ណាទេ នៅក្នុងអំឡុងត្រីមាសទី ២ នេះ។
នៅពេលដែលពោះចេះតែធំឡើង ហើយអ្នកមានអារម្មណ៍អស់កម្លាំង នោះការរួមភេទហាក់ដូចជាមិនសូវមានភាពទាក់ទាញទៀតនោះ៕