បើសិនជាអ្នក មានជំងឺលើសសម្ពាធឈាម យកល្អ គួរតែតមអាហារណា ដែលមានជាតិខ្លាញ់ និងសូដ្យូមខ្ពស់។ ខាងក្រោមនេះ គឺជាអាហារមួយចំនួន ដែលអ្នកគួរតែតម ឬកាត់បន្ថយ។
សាច់ក្រហម
គម្រោងរបបអាហារ ដែលផ្តល់សុខភាព គួរតែញ៉ាំអាហារណា ដែលមានជាតិខ្លាញ់ Saturated ឬ Trans-fat ក្នុងចំនួនមួយតិចតួចបានហើយ។ នេះដោយសារតែ អាហារសម្បូរជាតិខ្លាញ់ មិនល្អសម្រាប់សុខភាពបេះដូង និងសរសៃឈាមឡើយ។ សាច់ក្រហមអាំង ៥១០ ក្រាម ដោយគ្មានទឹកជ្រលក់សោះនោះ មានជាតិសូដ្យូ ១.៥០០ ក្រាម កាឡូរី ១.១៤០ កាឡូរី និងខ្លាញ់ ៧៩ ក្រាម។
អាហារត្រាំ
អាហារត្រាំសម្បូរទៅដោយវីតាមីន K និងមិនសូវមានកាឡូរីឡើយ ប៉ុន្តែ វាក៏មានជាតិសូដ្យូមច្រើនដែរ។ អាហារត្រាំទំហំមធ្យមមួយ មានជាតិសូដ្យូមប្រហែល ៥៧០ មីលីក្រាមទៅហើយ។ ដូច្នេះ បើសិនជាអ្នក មានជំងឺលើសសម្ពាធឈាមនោះ ចូរកាត់បន្ថយការញ៉ាំអាហារត្រាំទៅ។
ជាតិផ្អែម
អាហារដែលមានកាឡូរីបន្ថែម និងមានជាតិផ្អែមពេញនោះ ងាយនឹងធ្វើឲ្យឡើងទម្ងន់ណាស់។ ការធាត់ជ្រុល គឺជាផ្នែកមួយដ៏សំខាន់ ក្នុងការកំណត់ថា មានជំងឺលើសសម្ពាធឈាម។ ការធាត់ នឹងដាក់សម្ពាធទៅលើបេះដូង ហើយក៏បន្ថយលំហូរឈាមបានដែរ។
ជាតិប្រៃ
ការញ៉ាំអាហារមានជាតិសូដ្យូមច្រើនពេក នឹងនាំឲ្យលើសសម្ពាធឈាម ហើយវាក៏អាចទៅបំផ្លាញបេះដូង និងសរសៃឈាមអាកទែដោយផ្ទាល់ដែរ។
គ្រឿងស្រវឹង
ការញ៉ាំគ្រឿងស្រវឹងច្រើនពេក ប្រហែលជាធ្វើឲ្យសម្ពាធឈាមឡើងខ្ពស់ដែរ។ សម្រាប់អ្នកដែលមានជំងឺលើសសម្ពាធឈាម គួរតែចៀសវាងការញ៉ាំគ្រឿងស្រវឹង ឬញ៉ាំក្នុងកម្រិតមធ្យមបានហើយ។
ការញ៉ាំគ្រឿងស្រវឹង ក្នុងកម្រិតមធ្យម គួរតែ ៖
• បុរសអាយុចាប់ពី ៦៥ ឆ្នាំឡើងយទៅ គួរតែញ៉ាំតែម្តងក្នុងមួយថ្ងៃ
• បុរសអាយុតិចជាង ៦៥ ឆ្នាំចុះ អាចញ៉ាំពីរដងក្នុងមួយថ្ងៃ
• ស្ត្រីគ្រប់អាយុ អាចញ៉ាំម្តងក្នុងមួយថ្ងៃ។
ចំណាំ ៖ ការញ៉ាំគ្រឿងស្រវឹងតែម្តង គួរតែស្រាចំណុះ ១៤៧ មីលីលីត្រ ឬស្រាបៀរចំណុះ ៣៥៤ មីលីលីត្រ។
ទឹកដោះគោស្រស់
ទឹកដោះគោ គឺជាប្រភពនៃជាតិកាល់ស្យូម ប៉ុន្តែ វាមានជាតិខ្លាញ់ខ្ពស់ ច្រើនជាងតម្រូវការ។ ការញ៉ាំទឹកដោះគោមួយពែង នឹងផ្តល់ជាតិខ្លាញ់រហូតដល់ ៨ ក្រាម ដោយក្នុងនោះខ្លាញ់ Saturated Fat មានដល់ ៥ ក្រាមឯណោះ ដែលវាមានទំនាក់ទំនងនឹងជំងឺបេះដូង៕
