Join with Health.com.kh on Telegram

​ការពន្យា​កំណើត​ដោយ​ប្រើ​អ័រម៉ូន​ច្រើន​តែ​មាន​ផល​រំខាន​ដែល​អាច​ផ្តល់​ការរំខាន​តិចតួច​រហូតដល់​ធ្វើអោយ​អ្នក​មិន​អាច​ទ្រាំ​បាន​តែ​ម្តង​។ ប៉ុន្តែ​ខាង​ក្រោម​នេះ​គឺជា​ដំណោះស្រាយ​សម្រាប់​បញ្ហា​ដែល​ច្រើន​តែ​កើតមាន​ញឹកញាប់​បំផុត​ពេល​អ្នក​ប្រើ​វិធី​ពន្យា​កំណើត​។​

​ឈឺក្បាល​, វិលមុខ និង​តឹង​សុដន់​
​វេជ្ជបណ្ឌិត ហីល​ដា ហុច​ឈឺ​សុន (Hida Hutcherson, MD) សាស្ត្រាចារ្យ​ខាង​សម្ភព និង​រោគ​ស្ត្រី នៅឯ​សាកលវិទ្យាល័យ Columbia ក្នុង​ទីក្រុង​ញ៉ូយ​ក និយាយថា “​រោគសញ្ញា​ទាំងនេះ​ហាក់បីដូច​ជា​បាត់​ទៅ​វិញ​ទេ​ក្រោយពី​អ្នក​បាន​ប្រើ​ថ្នាំ​ពន្យា​កំណើត​បាន​មួយរយៈ​ហើយ​” ។ ដូច្នេះ​ចូរ​អត់ធ្មត់​បន្តិច​ទៅ​។ បើសិនជា​វា​មិន​បាត់​ទៅ​វិញ​ទេ ការប្រើ​ផលិតផល​ដូច​គ្នា​តែ​មាន​ឈ្មោះ​ផ្សេង​ប្រហែលជា​អាច​ជួយ​បាន​។

​ចង្អោ​រ​
​ប្រតិកម្ម​នេះ​ប្រហែលជា​នឹង​បាត់​ទៅ​វិញ​ក្នុង​រយៈពេល​ពីរ​ខែ​។ បើសិនជា​វា​មិន​បាត់​ទេ ហើយ​អ្នក​កំពុង​តែ​ប្រើ​ថ្នាំ​គ្រាប់​ពន្យា​កំណើត​ទៀត ចូរ​ព្យាយាម​ញ៉ាំ​វា​ជាមួយ​អាហារ​។ បើសិន​ជា​អ្នក​កំពុង​តែ​ប្រើប្រាស់​កង​ដាក់​ក្នុង​ស្បូន ឬ​បង់​បិទ​នៅ​ស្បែក វា​ប្រហែល​ជា​ដល់ពេល​ដែល​ត្រូវ​ដូរ​វិធីសាស្ត្រ​ថ្មី​ហើយ​។

​មាន​ធ្លាក់ឈាម​

​វេជ្ជបណ្ឌិត ហុច​ឈឺ​សុន និយាយថា “​ខ្ញុំ​គិតថា នេះ​គឺជា​ផល​រំខាន​ដែល​ធ្វើអោយ​មនុស្ស​ខ្វល់ខ្វាយ​ខ្លាំង​ជាង​ផល​រំខាន​ផ្សេងៗ​ទៅទៀត​” ព្រោះ​វា​គឺជា​រឿង​ដែល​មិន​អាច​ព្យាករណ៍​ទុក​មុន​បាន​។ ការប្រើ​ថ្នាំ​គ្រាប់​ពន្យា​កំណើត​ក្នុង​ពេល​ដូចៗ​គ្នា​រាល់ថ្ងៃ​ប្រហែលជា​អាច​ដោះស្រាយ​រឿង​នេះ​បាន​។ ការ​ហូរឈាម​កើតឡើង​ជាពិសេស​នៅពេល​ចាក់​ថ្នាំ​ពន្យា​កំណើត​, ថ្នាំ​ពន្យា​កំណើត​រយៈពេល​ខ្លី (Mini-Pill), និង​ដាក់​ឧបករណ៍​ស្បូន (​វិធីសាស្ត្រ​ដែល​មាន​តែ​អ័រម៉ូន Progestin) ដែល​វា​ធ្វើអោយ​ភ្នាស​កម្រាល​ខាងក្នុង​របស់​ស្បូន​ស្តើង​ខ្លាំង និង​ពេលខ្លះ​អាច​អោយ​មាន​ការ​ដាច់ដោច​តិចតួច​ក្លាយជា​ឈាម​ធ្លាក់​ចេញ​មក​បាន​។

​ចូរ​ពិគ្រោះ​ជាមួយ​គ្រូពេទ្យ​បើសិនជា​អ្នក​បារម្ភ​អំពី​ការ​ហូរឈាម​បែបនេះ​។

​ខ្សោយ​ចំណង់​ផ្លូវភេទ​

​ចូរ​ព្យាយាម​ប្រើ​ផលិតផល​ដែល​មាន​រូបមន្ត​ខុសគ្នា​បើសិន​ជា​អ្នក​សម្គាល់​ឃើញថា​មាន​ផល​រំខាន​។ វេជ្ជបណ្ឌិត ហុច​ឈឺ​សុន និយាយថា “​សម្រាប់​ស្ត្រី​ខ្លះ បើសិន​ជា​អ្នក​ផ្លាស់ប្តូរ​ថ្នាំ​គ្រាប់​ពន្យា​កំណើត​មក​ប្រើ​ផលិតផល​ណា​ដែល​មាន​អ័រម៉ូន Androgenic ច្រើន​វិញ (Testosterone-like) ចំណង់​ផ្លូវភេទ​នឹង​ត្រឡប់​មក​វិញ​។ បើសិនជា​វា​មិន​មាន​ប្រសិទ្ធភាព​ដែរនោះ ចូរ​ព្យាយាម​ប្រើ​វិធីសាស្ត្រ​ផ្សេង​ទៀត​ចូលគ្នា​។

​អារម្មណ៍​មិន​ល្អ​
​បើសិនជា​វា​ពិតជា​បណ្តាល​មក​ពី​វិធី​ពន្យា​កំណើត​មែន ហើយ​មិន​មាន​កត្តា​មួយចំនួន​ចូលរួម​ទេនោះ អ្នក​ប្រហែលជា​ត្រូវ​ប្រើ​វិធីសាស្ត្រ​ផ្សេង​ដែល​គ្មាន​ជាតិ​អ័រម៉ូន​សោះ​។ វេជ្ជបណ្ឌិត ហុច​ឈឺ​សុន និយាយថា “​តាម​បទពិសោធន៍​របស់​ខ្ញុំ បើសិន​ជា​ស្ត្រី​ម្នាក់​មាន​បញ្ហា​បាក់​ទឹកចិត្ត​ដោយសារ​ប្រើ​ថ្នាំ​គ្រាប់​ពន្យា​កំណើត ការផ្លាស់ប្តូរ​រូបមន្ត​ប្រើប្រាស់​ច្រើនតែ​មិន​អាច​មាន​ប្រសិទ្ធភាព​ឡើយ​”​។ រាល់​វិធីសាស្ត្រ​ពន្យា​កំណើត​ដែល​មាន​អ័រម៉ូន​ទំនង​ជា​ធ្វើអោយមាន​បញ្ហា​ដូចៗ​គ្នា​។ ពេលខ្លះ វេជ្ជបណ្ឌិត ហុច​ឈឺ​សុន បាន​ចេញ​អោយ​ប្រើប្រាស់​ថ្នាំ​ប្រឆាំងនឹង​ការបាក់​ទឹកចិត្ត​ចំពោះ​អ្នកជំងឺ​ដែល​ពិតជា​ចង់​ប្រើ​ថ្នាំ​គ្រាប់​ពន្យា​កំណើត​បន្តទៀត ប៉ុន្តែ​វា​ក៏​មាន​លទ្ធផល និង​ជោគជ័យ​ល្អ​ដែរ​៕