នៅពេលដែលអ្នកចង់ស្រកទម្ងន់ មិនត្រឹមតែផ្តោតសំខាន់ទៅលើអាហារ និងចលនាហាត់ប្រាណផ្សេងៗទេ ប៉ុន្តែអ្នកក៏ត្រូវតែដឹងពីគោលការណ៍មួយចំនួនដែរ ព្រោះគោលការណ៍ទាំងនេះអាចជួយអ្នកឲ្យស្រកទម្ងន់បានយ៉ាងងាយ នោះអ្នកនឹងមានរាងស្អាតទៀតផង។ តើមានអ្វីខ្លះទៅ?
- នៅមុនពេលដែលអ្នកហាត់ប្រាណមួយម៉ោង អ្នកត្រូវតែបរិភោគដំឡូង នំប៉ាវអត់ស្នូល ចេក ហើយក្រោយពេលដែលអ្នកហាត់ប្រាណមួយម៉ោង អ្នកត្រូវតែបរិភោគស្ករ និងសូកូឡា ហើយក្រោយពេលដែលអ្នកហាត់ប្រាណចប់អស់ អ្នកត្រូវតែបរិភោគអាហារដែលមានប្រូតេអ៊ីនដូចជា ពងមាន់ស្ងោរជាដើម ព្រោះអាហារទាំងនេះបើអ្នកមិនបរិភោគ នោះវាមិនអាចធ្វើឲ្យអ្នកស្គមបានទេនៅក្រោយពេលដែលអ្នកហាត់ប្រាណរួច។
- អ្នកត្រូវតែបរិភោគអាហារច្រើនពេល មានន័យថា អ្នកមិនត្រូវបរិភោគឆ្អែតពេកក្នុងមួយពេលទេ ព្រោះវាងាយធ្វើឲ្យអ្នកធាត់ខ្លាំងណាស់ ថែមទាំងអាចធ្វើឲ្យក្រពះអ្នកមានសំពាធទៀតផង ដូចនេះអ្នកត្រូវតែចែកអាហារទាំងនោះជាច្រើនពេលមកពិសារ ទើបអ្នកអាចមានរាងដែលស្អាតមួយ។
- នៅក្រោយពេលម៉ោង៥ល្ងាច អ្នកមិនត្រូវប៉ះបង្អែម ឬអាហារដែលផ្អែមនោះទេ ព្រោះវានឹងធ្វើឲ្យអ្នកងាយធាត់ណាស់។
- អ្នកមិនត្រូវបរិភោគអាហារដែលបំពងខ្លាញ់ច្រើននោះទេ ព្រោះវាជាអាហារដែលធ្វើឲ្យអ្នកឆាប់ចាស់ ឆាប់អាក្រក់ ឆាប់ធាត់ខ្លាំងបំផុត។
- អ្នកមិនត្រូវបរិភោគអាហារដែលត្រជាក់ទេ ដូចជាផឹកទឹកកក និងភេសជ្ជៈដែលត្រជាក់ ព្រោះវាងាយធ្វើឲ្យពោះអ្នកធំ ជាពិសេសចំពោះនារី។
- អ្នកមិនត្រូវបង្អត់អាហារយូរពេកទេ ព្រោះវាអាចធ្វើឲ្យអ្នកឃ្លានខ្លាំង ហើយវាមិនត្រឹមតែមិនអាចធ្វើឲ្យអ្នកស្គម ថែមទាំងអាចប៉ះពាល់ដល់សុខភាពអ្នកណាស់ ជាពិសេសក្រពះរបស់អ្នក។
- នៅក្រោយពេលម៉ោង៦ល្ងាច បើអ្នកឃ្លាន អ្នកអាចបរិភោគអាហារមួយចំនួនដូចជា ត្រី ពពួកស៊ុត ឬបន្លែ និងផ្លែឈើដែលគ្មានជាតិផ្អែមខ្ពស់ នោះវានឹងអាចធ្វើឲ្យអ្នកមានរាងស្អាត។
- អ្នកត្រូវតែចូលគេងឲ្យមុនម៉ោង១១ជារៀងរាល់យប់ ព្រោះបើអ្នកគេងមិនគ្រប់ រាងកាយអ្នកនឹងមិនអាចរំលាយអាស៊ីតខ្លាញ់បានអស់ឡើយ ដូចនេះអ្នកនឹងមិនអាចស្គមដូចគ្នា។
- អ្នកត្រូវតែមានជំនឿចិត្ត ខិតខំ ប្រឹងប្រែងផ្លាស់ប្តូរទម្លាប់របស់ខ្លួន ទើបអ្នកអាចមានរាងស្អាតតាមបំណងរបស់ខ្លួនបាន។
- អ្នកត្រូវតែផឹកទឹកឲ្យបានច្រើន ដោយមួយថ្ងៃត្រូវតែផឹកចាប់ពី២០០០សេសេឡើងលើ ទើបអ្នកអាចស្គមបាន ហើយមិនត្រូវផឹកទឹកក្រូចច្រើននោះទេ៕
