ការមករដូវច្រើនៗគឺជាការហូរឈាមមិនធម្មតាចេញពីស្បូនមួយប្រភេទដែលកើតមានជាញឹកញាប់បំផុត។ ការធ្លាក់ឈាមរដូវត្រូវបានគេចាត់ទុកថាច្រើននោះលុះត្រាតែមានការហូរឈាមលើសំឡីអនាម័យជោគជារៀងរាល់ម៉ោងរយៈពេលច្រើនម៉ោងតែម្តង។
រោគសញ្ញាផ្សេងៗទៀតមានដូចជា៖
- ការហូរឈាមនៅពេលយប់ដែលទាមទារអោយប្តូរសំឡីអនាម័យ
- ការហូរឈាមចេញនូវកំណកឈាមធំៗក្នុងពេលមករដូវ
- ការធ្លាក់ឈាមរដូវយូរជាង ៧ថ្ងៃ។
ក្នុងករណីធ្ងន់ធ្ងរ ការហូរឈាមរដូវច្រើនៗអាចរំខានដល់ការដេក និងសកម្មភាពប្រចាំថ្ងៃបាន។ ការបាត់បង់ឈាមដោយសារតែការមករដូវបែបនេះក៏អាចធ្វើអោយមានបញ្ហាស្លេកស្លាំង, អស់កម្លាំង និងពិបាកដកដង្ហើមកើតមានបាន។
មានមូលហេតុច្រើនណាស់ដែលធ្វើអោយហូរឈាមរដូវច្រើនៗដូចជា៖
- អតុល្យភាពអ័រម៉ូន ជាពិសេសអ័រម៉ូនអឺស្ត្រូហ្សែន និងប្រូហ្សេស្តេរ៉ូន។ បញ្ហានេះក៏អាចកើតមានបានដែរបើសិនជាមានបញ្ហាណាមួយប៉ះពាល់ដល់មុខងាររបស់ក្រពេញអូវ៉ែ
- ដុំសាច់ក្នុងស្បូន ច្រើនតែកើមានក្នុងវ័យអាចបង្កើតកូនបាន។
- ការរលូតកូន ឬកូនក្រៅស្បូន
- ប្រើថ្នាំរលាយកំណកឈាម
- បញ្ហាទាំងឡាយណាដែលកើតមានជាមួយនឹងការដាកកងក្នុងស្បូនសម្រាប់ពន្យាកំណើត
- ជំងឺ Adenomyosis ដែលជាជំងឺមួយកើតឡើងច្រើនបំផុតលើស្ត្រីវ័យកណ្តាល និងមានកូនច្រើន
- ជំងឺរលាកក្នុងអាងត្រគៀក (Pelvic Inflammatory Disease, PID), ការបង្ករោគនៅស្បូន, បំពង់ដៃស្បូន និងសារីរាង្គផ្សេងៗទៀតនៃប្រព័ន្ធប្រដាប់បន្តពូជ។
- មហារីកស្បូន, ក្រពេញអូវ៉ែ និងមាត់ស្បូន
- ជំងឺផ្សេងៗទៀតដែលធ្វើអោយឈាមមិនកកដូចជា ជំងឺថ្លើម, តម្រងនោម ឬក្រពេញទីរ៉ូអ៊ីត ព្រមជំងឺហូរឈាម ឬប្លាកែតមិនធម្មតា៕