Join with Health.com.kh on Telegram

​តេស្តូ​ស្តេ​រ៉ូន​គឺជា​អ័រម៉ូន​ភេទ​របស់បុរស សម្រាប់​ធ្វើ​អោយ​បុរស​នោះ​មាន​លក្ខណៈ​ខាងក្រៅ​ជា​មនុស្ស​ប្រុស​តែម្តង​។ តួនាទី​របស់​អ័រម៉ូន​តេស្តូ​ស្តេ​រ៉ុន​មានដូចជា ផលិត​មេ​ជីវិត​ឈ្មោល​, បណ្តុះ​រោម​លើ​មុខ និង​រាងកាយ​, បង្កើត​សាច់ដុំ និង​ថែរក្សា​ចំណង់​ផ្លូវភេទ​របស់​បុរស​។​

ពងស្វាស​ជា​អ្នក​ផលិត​អ័រម៉ូន​នេះ ហើយ​ខួរក្បាល និង​ក្រពេញ​Pituitary​ជា​អ្នកគ្រប់គ្រង​ការផលិត​របស់​អ័រម៉ូន​នេះដែរ​។ ជំងឺ​ជា​ច្រើន​, ការ​របួស​, ការប្រើប្រាស់​ថ្នាំ Steroid និង អាយុ​កាន់តែច្រើន​អាច​ធ្វើអោយ​រាងកាយ​ផលិត​អ័រម៉ូន​តេស្តូ​ស្តេ​រ៉ូន​កាន់តែតិច​។ ការ​សម្គាល់​ដឹង​នូវ​រោគសញ្ញា​នៃ​អ័រម៉ូន​តេស្តូ​ស្តេ​រ៉ូន​ចុះ​ទាប គឺជា​រឿង​សំខាន់​ដើម្បី​ប្រើប្រាស់​វិធី​ព្យាបាល​។

​ផ្លាស់ប្តូរ​ចំណង់​ផ្លូវភេទ​

​រោគសញ្ញា​ដំបូង​គេ​ដែល​បុរស​មាន​អ័រម៉ូន​តេស្តូ​ស្តេ​រ៉ូន​ចុះ​ទាប​សម្គាល់​ដឹង​នោះ​គឺ​មាន​ការផ្លាស់ប្តូរ​ចំណង់​ផ្លូវភេទ​។ ការថយចុះ​នូវ​ការចាប់អារម្មណ៍​លើ​ការ​រួមភេទ​គឺជា​រោគសញ្ញា​នៃ​ការ​ខ្សោយ​ផ្លូវភេទ​ហើយ​។ ការព្យាបាល​ដោយ​ប្រើ​អ័រម៉ូន​តេស្តូ​ស្តេ​រ៉ូន​ជំនួស​វិញ​ប្រហែលជា​អាច​បង្កើន​ចំណង់​ផ្លូវភេទ​បាន​។

​ចំនួន​មេ​ជីវិត​ឈ្មោល​ចុះ​ទាប

​មុខងារ​មួយ​របស់​អ័រម៉ូន​នេះ​គឺ​ផលិត​មេ​ជីវិត​ឈ្មោល​។ ការថយចុះ​នៃ​ការផលិត​មេ​ជីវិត​ឈ្មោល​កើតឡើង​នៅពេល​ដែល​អ័រម៉ូន​តេស្តូ​ស្តេ​រ៉ូន​មាន​ការថយចុះ​ចំនួន​ផលិត​។ ដូច្នេះ​កាលណា​មេ​ជីវិត​ឈ្មោល​កាន់តែ​តិច ឱកាស​នៃ​លទ្ធភាព​មិន​អាច​មាន​កូន​បាន​ក៏​កាន់តែ​ច្រើន​ដែរ​។

​ងាប់​លិង្គ​

​បុរស​ដែល​មាន​ចំនួន​អ័រម៉ូន​តេស្តូ​ស្តេ​រ៉ូន​ចុះ​ទាបក៏​ធ្លាប់មាន​បញ្ហា​មិន​អាច​អោយ​លិង្គ​រឹង​បាន​ពេញលេញ​ល្អ​ដែរ​។ បញ្ហា​នេះ​គេ​ហៅថា​ងាប់​លិង្គ​។ ការប្រើ​ថ្នាំ​ដើម្បី​ព្យាបាល​អាកា​រៈងាប់​លិង្គ​ដោយ​មិន​បាន​ព្យាបាល​ការចុះ​ទាប​នៃ​អ័រម៉ូន​តេស្តូ​ស្តេ​រ៉ូន ប្រហែលជា​មិន​មាន​ឥទ្ធិពល​ទៅលើ​លទ្ធភាព​ក្នុង​ការឡើង​រឹង​របស់​លិង្គ​ឡើយ​។

​សុដន់​រីក​ធំ​

​ជំងឺ​បុរស​មាន​សុដន់​ធំ​ដូច​ស្ត្រី​អាច​នឹង​កើតមាន​បាន​នៅពេល​ដែល​ការផលិត​អ័រម៉ូន​តេស្តូ​ស្តេ​រ៉ូន​មាន​ចំនួន​តិច​។

​ជ្រុះ​សក់​

​បុរស​ត្រូវ​តែ​មាន​រោម​ដុះ​នៅ​រាងកាយ និង​មុខ​ច្រើន​ជាង​មនុស្ស​ស្រី​។ ការផលិត​អ័រម៉ូន​តេស្តូ​ស្តេ​រ៉ូន​ធ្វើអោយ​កើនឡើង​នៃ​ចំនួ​ន​រោម​ទាំងអស់នេះ ប៉ុន្តែ​បើសិនជា​អ័រម៉ូន​តិច​វិញ រោម​ក៏ត្រូវ​ជ្រុះ​ច្រើន​ដែរ​។ បុរស​វ័យក្មេង​ដែល​កំពុងតែ​ស្ថិត​ស្ថានភាព​ពេញវ័យ​ដែលមាន​ចំនួន​អ័រម៉ូន​តេស្តូ​ស្តេ​រ៉ូន​ទាប​ប្រហែលជា​មិន​ធ្លាប់​មាន​ការដុះ​រោម​នៅមុខ ឬ​រាងកាយ​ឡើយ​។ ពួកគេ​ក៏​ប្រហែលជា​មាន​រោមដៃ និង​រោមជើង​ច្រើន​ដែរ​។

​សាច់ដុំ​ស្វិត​

​ទំហំ​សាច់ដុំ និង​ភាពរឹងមាំ​របស់​សាច់ដុំ​ច្រើនតែ​ថយ​ចុះ​នៅ​ពេល​មាន​ចំនួន​អ័រម៉ូន​តេស្តូ​ស្តេ​រ៉ូន​ទាប​។ ការ​ខ្សោយ​របស់​សាច់ដុំ​ក៏​ប្រហែល​ជា​កើត​មាន​ផងដែរ​។

​ពងស្វាស​តូច​

​ការ​កង្វះ​អ័រម៉ូន​ភេទ​ធ្វើអោយ​ពងស្វាស​ទៅជា​ស្វិត ដោយសារ​តែ​វា​មិន​ងា​ច​ប្រើប្រាស់​ដើម្បី​ផលិត​អ័រម៉ូន​តេស្តូ​ស្តេ​រ៉ូន​បាន​ទៀត​។ បុរស​ពេញវ័យ​ប្រហែលជា​មិន​មាន​ការលូតលាស់​ពង​ស្វា​ស និង​លិង្គ​ផង​។

​មាន​ជំងឺ​ពុក​ឆ្អឹង​

​ការ​ដែល​អ័រម៉ូន​តេស្តូ​ស្តេ​រ៉ូន​ចុះ​ទាប​ធ្វើអោយ​កំហាប់​ឆ្អឹង​ថយចុះ ដែល​ជា​ហេតុ​ក្លាយទៅជា​ជំងឺ​ពុក​ឆ្អឹង​បាន​។ អ្នក​ដែល​មាន​ជំងឺ​ពុក​ឆ្អឹង​មាន​ការប្រឈមមុខ​យ៉ាងខ្ពស់​នឹង​ការ​បាក់ឆ្អឹង ជាពិសេស​ឆ្អឹងសន្លាក់​ត្រគៀក និង​ឆ្អឹង​កង​ខ្នង​៕