ស្បែកមុខសម្បូរជាតិខ្លាញ់កើតឡើងដោយសារអរម៉ូននិងតំណពូជ។ ឧទាហរណ៍ ស្ត្រីមានគភ៌មួយចំនួនមានការកើនឡើងនៃជាតិខ្លាញ់នៅពេលដែលមានការប្រែប្រួលសកម្មភាពអរម៉ូន។ ស្ត្រីដែលពិសារថ្នាំពន្យារកំណើត, ភាពតានតឹង, ការប្រើផលិតផលគ្រឿងសម្អាងខុស សុទ្ធតែមានឥទ្ធិពលលើស្បែកមុខទាំងអស់។ អ្នកជំនាញជឿថាស្បែកមុខសម្បូរខ្លាញ់មានគុណសម្បត្តិមួយចំនួន ដូចជា មានស្នាមជ្រួញតិចជាងអ្នកមានស្បែកស្ងួតឬស្បែកធម្មតា។
ខាងក្រោមនេះជាវិធីសាស្ត្រក្នុងការលាងមុខនិងធ្វើឱ្យមុខមិនសូវសម្បូរខ្លាញ់។
ម៉ាស្សបិតមុខ៖ គ្រូពេទ្យ Howard Donsky និយាយថា “ម៉ាស្សបិតមុខអាចជួយសម្អាតជាតិខ្លាញ់លើស្បែកខាងក្រៅនិងរក្សាពន្លឺនៃស្បែក ប៉ុន្តែឥទ្ធិពលរបស់វាមានក្នុងរយៈពេលខ្លីតែប៉ុណ្ណោះ។
ប្រើទឹកឧណ្ហៗ៖ គ្រូពេទ្យ Hillard H. Pearlstein និយាយថា “ទឹកឧណ្ហៗគឺជាទឹកលាងសម្អាតដ៏ល្អ”។ ដោយមូលហេតុនេះហើយទើបគាត់ណែនាំឱ្យលាងមុខដោយប្រើទឹកឧណ្ហៗជាមួយនឹងសាប៊ូ ព្រោះវាលាងសម្អាតខ្លាញ់មុខបានល្អជាងការប្រើទឹកត្រជាក់ជាមួយសាប៊ូ។
សាប៊ូកាត់ជាតិខ្លាញ់៖ គ្រូពេទ្យ Pearlstein និយាយថា “ដំណោះស្រាយចំពោះស្បែកសម្បូរជាតិខ្លាញ់គឺការកាត់បន្ថយការផលិតជាតិខ្លាញ់”។ ការស្វែងរកសាប៊ូកាត់ជាតិខ្លាញ់មិនមែនជារឿងពិបាកនោះទេ អ្វីដែលពិបាកគឺការរកសាប៊ូណាដែលមិនធ្វើឱ្យស្បែករបស់អ្នកស្ងួតខ្លាំង។
ប្រើក្រែមបន្តឹងស្បែក៖ គ្រូពេទ្យ Kenneth Neldner និយាយថា ក្រែមបន្តឹងស្បែកដែលមានជាតិអាសេតោន (acetone) និងអាល់កុលគឺជាជម្រើសដ៏ល្អ។ ជាតិអាសេតោនគឺជាសារធាតុលាងសម្អាតជាតិខ្លាញ់ ហើយក្រែមបន្តឹងស្បែកភាគច្រើនសុទ្ធតែមានជាតិនេះ។ គ្រូពេទ្យស្បែកទូន្មានថា ការលាងមុខច្រើនដងក្នុងមួយថ្ងៃ អាចធ្វើឱ្យស្បែកស្ងួតពេកនិងរលាក ដូច្នេះអ្នកអាចជំនួសដោយប្រើបន្ទះជូត។
ជ្រើសរើសគ្រឿងសម្អាងដោយយកចិត្តទុកដាក់៖ គ្រូពេទ្យ Neldner និយាយថា “គ្រឿងសម្អាងចែកចេញជាពីរក្រុមធំៗគឺ៖ ជាតិប្រេង និង ជាតិទឹក។ បើសិនជាអ្នកមានស្បែកសម្បូរខ្លាញ់ អ្នកត្រូវប្រើផលិតផលជាតិទឹក”។ ផលិតផលជាច្រើនដែលធ្វើតម្រូវសម្រាប់មុខសម្បូរខ្លាញ់។ វាត្រូវបានគេផលិតឡើងសម្រាប់គ្របដណ្តប់ជាតិខ្លាញ់ ដែលធ្វើឱ្យមុខអ្នកមើលទៅមិនសូវសម្បូរខ្លាញ់។ ប៉ុន្តែ គ្មានគ្រឿងសម្អាងណា ដែលមានគ្រឿងផ្សំដ៏អស្ចារ្យដែលអាចកាត់បន្ថយឬបញ្ឈប់ការផលិតជាតិខ្លាញ់នោះទេ។
ប្រើម្សៅកូនក្មេង៖ ដើម្បីការពារមិនឱ្យឃើញខ្លាញ់លើមុខ ស្ត្រីមួយចំនួនប្រើម្សៅកូនក្មេងលាបលើមុខ។
