ជាធម្មតាបញ្ហាកំណកកំបោរជាប់ធ្មេញ ឬក្រមធ្មេញច្រើនកើតឡើងនៅពេលអ្នកមិនអនុវត្តអនាម័យមាត់ធ្មេញ (ដុសសម្អាត, ប្រើខ្សែរ៉ូតសម្អាតធ្មេញ និងខ្ពុរសម្អាតមាត់) បានត្រឹមត្រូវទៀងទាត់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នៅពេលអ្នកមិនកម្ចាត់កំណកកំបោរចេញពីធ្មេញ វានឹងកើនច្រើនឡើងក្ដាំង ហើយអាចបង្កជាបញ្ហាមាត់ធ្មេញផ្សេងៗ រួមទាំងជំងឺអញ្ចាញធ្មេញ។ ហើយទោះមិនរំលឹកក៏អ្នកទាំងអស់គ្នាប្រហែលជាដឹងហើយថា បញ្ហាកំណកកំបោរធ្វើឲ្យអ្នកបាត់បង់ភាពទាក់ទាញ និងទំនុកចិត្តយ៉ាងណាពេលញញឹម ឬត្រូវបើកមាត់។ ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឲ្យដឹងពីវិធីបែបធម្មជាតិងាយៗ តែមានប្រសិទ្ធិភាពខ្ពស់កម្ចាត់កំណកកំបោរជាប់ធ្មេញបានឆាប់រហ័ស ៖
១. ម្ស៉ៅ Baking soda និងអំបិល
រូបមន្តនេះមិនត្រឹមតែកម្ចាត់កំណកកំបោរជាប់ធ្មេញទេ ប៉ុន្តែក៏ជួយធ្វើឲ្យធ្មេញសផងដែរ! អ្វីដែលអ្នកត្រូវធ្វើ គឺគ្រាន់តែលាយម្ស៉ៅ baking soda ចំនួន ១ ស្លាបព្រាបាយ ជាមួយអំបិលមួយច្បិចដៃ ហើយដាក់ល្បាយនេះលើច្រាសដុសធ្មេញ រួចចាប់ផ្ដើមដុសសម្អាតធ្មេញរបស់អ្នកជាមួយល្បាយនេះដូចធម្មតាជាការស្រេច។ ទោះជាយ៉ាងណា មិនត្រូវដុសសម្អាតធ្មេញជាមួយម្ស៉ៅ baking soda លើសពី ១ ដង ក្នុងមួយសប្តាហ៍ឡើយ ព្រោះវាអាចបណ្ដាលឲ្យខូចកាចាធ្មេញ។
២. ទឹកក្រូចឆ្មារ
អ្វីដែលអ្នកត្រូវធ្វើ គឺគ្រាន់តែជ្រលក់ច្រាសដុសធ្មេញក្នុងទឹកក្រូចឆ្មារស្រស់ ហើយដុសវាពេញលើធ្មេញរបស់អ្នកថ្នមៗជាការស្រេច និងកុំភ្លេចទុកចោលសម្រាប់រយៈពេល ១នាទីសិន សឹមខ្ពុរលាងសម្អាតមាត់ចេញជាមួយទឹកធម្មតា។ ត្រូវចាំថាទឹកក្រូចឆ្មារមានជាតិអាស៊ីតខ្លាំងដែលអាចបណ្ដាលឲ្យសឹកធ្មេញ ដូច្នេះត្រូវប្រើប្រាស់វាដោយប្រុងប្រយ័ត្ន។
៣. គ្រាប់ល្ង
អ្វីដែលអ្នកត្រូវធ្វើ គឺទំពារគ្រាប់ល្ង ១ ស្លាបព្រាយបាយពេញក្នុងមាត់ជាការស្រេច។ ទំពាររហូតដល់ក្លាយជាម៉ដ្ឋខាប់ៗដោយមិនត្រូវលេបចូលឡើយ រួចចាប់ផ្ដើមប្រើច្រាសស្អាតស្ងួតមួយដុសធ្មេញ។ អនុវត្តឲ្យបាន ២ ដងក្នុងមួយសប្តាហ៍។
៤. ប្រេងដូង
ខ្ពុរមាត់ជាមួយប្រេងដូងប្រមាណពី ១ ទៅ ២ ស្លាបព្រាបាយសម្រាប់រយៈពេលពី ១០ ទៅ ១៥ នាទី សឹមខ្ជាក់ចេញ និងសម្អាតមាត់ជាមួយទឹកក្ដៅឧណ្ហៗជាការស្រេច។
៥. ផ្កាក្លាំងពូ
ប្រើប្រាស់ម្ស៉ៅផ្កាក្លាំងពូ ឬអ្នកអាចយកផ្កាក្លាំងពូមកកិនខ្លួនឯងក៏បាន រួចបន្ថែមប្រេងអូលីវចូលបន្តិច សឹមលាបល្បាយនេះលើតំបន់ធ្មេញដែលទទួលរងផលប៉ះពាល់ជាការស្រេច។ វិធីងាយមួយទៀតនោះ គឺអ្នកគ្រាន់តែទំពារផ្កាក្លាំងពូ ជំនួសស្ករកៅស៊ូឲ្យបានទៀងទាត់ ដើម្បីកាត់បន្ថយក្លិនមាត់មិនល្អ និងសម្លាប់បាក់តេរីក្នុងមាត់៕