ការឈឺសុដន់ច្រើនតែចាប់ផ្តើមកើតមាននៅចន្លោះពី ៤ ទៅ ៦សប្តាហ៍នៃការមានផ្ទៃពោះ ហើយក៏បាត់ទៅវិញនៅ ១២សប្តាហ៍ដំបូង។ វាត្រូវបានគេយល់ថាជារោគសញ្ញាដំបូងគេបំផុតនៃការមានផ្ទៃពោះដែរ។ ការឈឺសុដន់ក្នុងពេលមានផ្ទៃពោះអាចអោយមានអារម្មណ៍ថាដូចជាធ្លាប់ឈឺកាលមុនមករដូវអញ្ចឹង ប៉ុន្តែវាក្លាយទៅជាឈឺចាប់ខ្លាំងក្លាទៅវិញក្នុងពេលមានផ្ទៃពោះ។
មូលហេតុ
ក្រោយពីបង្កកំណើតរួច ទំហំសុដន់ចាប់ផ្តើមរីកធំឡើងដោយសារតែការបង្កើតជាបំពង់ទឹកដោះក្នុងសុដន់។ ដូច្នេះហើយទើបធ្វើអោយទំហំសុដន់ផ្លាស់ប្តូររូបរាង្គ និងទៅជាតឹង, ឈឺ និងហើម។ ក្នុងពេលមានផ្ទៃពោះ សុដន់នៅតែបន្តលូតលាស់ទៅមុខទៀត ។ ទម្ងន់បន្ថែមរបស់សុដន់ និងការកើនឡើងរបស់ក្រពេញទឹកដោះទើបធ្វើអោយសុដន់ឈឺដូច្នេះ។ ការប្រែប្រួលអ័រម៉ូនកើតឡើងក្នុងពេលមានផ្ទៃពោះ ដែលជាហេតុនាំអោយលំហូរឈាមកើនឡើង និងផ្លាស់ប្តូរជាលិកាសុដន់។
ការប្រែប្រួល
ក្បាលសុដន់៖ អ្នកនឹងមានអារម្មណ៍ឈឺចាប់ និងឈឺឆៀបៗក្នុងក្បាលសុដន់ ។
ផ្នែកខ្មៅៗនៅជុំវិញក្បាលសុដន់៖ តំបន់នេះដែរនឹងទៅជាខ្មៅ និងធំកាន់តែខ្លាំងជាងមុនទៅទៀត។ អ្នកក៏ប្រហែលជាសម្គាល់ឃើញកន្ទួលតូចៗ និងខ្មៅៗនៅលើកន្លែងនេះដែរ ដែលគេហៅឈ្មោះវាថា Montgomery Tubercles (ក្រពេញញើស) សម្រាប់ផ្តល់ភាពរំអិល។
សុដន់៖ សរសៃឈាមវ៉ែនពណ៌ខៀវៗនៅពីក្រោមស្បែកសើរៗកំពុងតែដឹកនាំជីវជាតិ និងជាតិទឹកពីម្តាយទៅកូនក្នុងផ្ទះ។ ការឈឺសុដន់ច្រើនតែលែងកើតមានទៀតក្រោយពីការមានផ្ទៃពោះក្រោយពីបញ្ចប់ត្រីមាសទីមួយរួច។
ដំណោះស្រាយ
ជាធម្មតា សុដន់របស់ស្ត្រីភាគច្រើនតែងតែរីកធំក្នុងពេល និងក្រោយពេលមានផ្ទៃពោះ។ ទោះបីជាយ៉ាងណាក៏ដោយ ស្ត្រីមួយចំនួនក៏មិនមានឃើញអ្វីប្រែប្រួលដល់សុដន់ពួកគេដែរ។ សុដន់ដែលមិនលូតលាស់ក្នុងពេលមានផ្ទៃពោះគឺជារឿងធម្មតាទេ ហើយវាក៏មិនមានអ្វីប៉ះពាល់ដល់ការផលិតទឹកដោះសម្រាប់ចិញ្ចឹមកូនដែរ។ សុដន់កាន់តែធំមិនមែនមានន័យថាទឹកដោះច្រើនទេ ប៉ុន្តែវាចង់សម្តៅទៅលើតម្រូវការប្រើអាវទ្រនាប់លេខថ្មី។ ខាងក្រោមនេះគឺជាវិធីសាស្ត្រមួយចំនួនដែលអ្នកអាចធ្វើបានដើម្បីដោះស្រាយទៅលើការឈឺសុដន់ក្នុងពេលមានផ្ទៃពោះ។
- ចូរចៀសវាងការពាក់អាវទ្រនាប់ដែលមានខ្សែរដែកនៅពីក្រោម។
- ចូរពាក់អាវទ្រនាប់ធ្វើពីអំបោះទន់ ព្រោះវាផ្តល់នូវផាសុខភាព និងស្រួលដកដង្ហើមជាង។
- ចូរយល់ដឹងអំពីទំហំសុដន់របស់អ្នក ដើម្បីកុំអោយប្រើអាវទ្រនាប់ណាដែលតឹងៗពេក។
- ក្នុងពេលមានផ្ទៃពោះ សុដន់នៅតែបន្តធំៗទៅរហូត។ ដូច្នេះគួរតែប្រើអាវទ្រនាប់ណាដែលរលុងៗ៕