យើងទាំងអស់គ្នាសុទ្ធតែមានស្ត្រេស ហើយរបៀបដែលយើងគ្រប់គ្រងវាក៏សុទ្ធតែអាចមានលក្ខណៈខុសៗគ្នាដែរ។ ការគ្រប់គ្រងស្ត្រេសអាចជាឧបករណ៍ដ៏ខ្លាំងក្លាសម្រាប់សុខុមាលភាព ព្រោះស្ត្រេសខ្លាំងពេកអាចប៉ះពាល់ដល់សុខភាពរាងកាយបាន។ មានវិធីសាស្ត្រច្រើន ហើយវិធីសាស្ត្រមួយក្នុងនោះគឺនិយាយអំពីអ្វីដែលអ្នកញ៉ាំតែម្តង។ ដូច្នេះខ្ញុំនឹងបង្ហាញអំពីរបបអាហារដែលអាចជួយគ្រប់គ្រងស្ត្រេសរបស់អ្នកបាន។
ក្រូច
ក្រូចគឺជាប្រភពវីតាមីន C ដ៏មានតម្លៃមួយប្រភេទ។ ការសិក្សាបានអោយដឹងថា វីតាមីនមួយនេះអាចទប់ស្កាត់ចំនួនស្ត្រេសអ័រម៉ូនបាន ខណៈពេលដែលវាជួយពង្រឹងដល់ប្រព័ន្ធភាពស៊ាំដែរនោះ។ ការសិក្សាមួយដែលធ្វើទៅលើអ្នកជំងឺសម្ពាធឈាមឡើងខ្ពស់ឃើញថា ទាំងសម្ពាធឈាម និងស្ត្រេសអ័រម៉ូន (Cortisol) បានត្រឡប់មកធម្មតាវិញយ៉ាងលឿននៅពេលពួកគេទទួលទានវីតាមីន C មុនពេលបំពេញការងារណាមួយដែលស្ត្រេសខ្លាំង។
ស្ពៃបៃតងចាស់ (Spinach)
អ្នកអាចយកឈ្នះលើស្ត្រេសបានប្រហែលជាទាក់ទងនឹងសារធាតុម៉ាញ៉េស្យូមក្នុងស្ពៃបៃតងចាស់នេះហើយ។ កាលណាមានចំនួនម៉ាញ៉េស្យូមតិចពេកប្រហែលជាហេតុនាំអោយឈឺក្បាល និអស់កម្លាំង ដែលវាមានឥទ្ធិពលធ្វើអោយស្ត្រេសបាន។ ទឹកស្ពៃបៃតងចាស់មួយពែងអាចជួយបំពេញជាតិម៉ាញ៉េស្យូមដែលបាត់បង់បាន។ បន្លែបៃតងសុទ្ធតែសម្បូរទៅដោយជាតិម៉ាញ៉េស្យូមទាំងអស់។
ត្រីសម្បូរខ្លាញ់
ដើម្បីអាចគ្រប់គ្រងស្ត្រេសបាន ចូរធ្វើការសាងមិត្តជាមួយត្រីសម្បូរជាតិខ្លាញ់។ ខ្លាញ់អូមេហ្គាបី Fatty Acid ដែលមានក្នុងត្រីដូចជា ត្រីសាលម៉ុង, ធូណា អាចជួយការពារកុំអោយអ័រម៉ូនស្ត្រេសចេញច្រើន និងអាចជួយការពារជំងឺបេះដូង, អារម្មណ៍មិនល្អដូចជាបាក់ទឹកចិត្ត និងចង្កោមរោគសញ្ញាមុនពេលមករដូវបាន។ ដើម្បីអាចទទួលបានអូមេហ្គាបីធ្វើអោយអារម្មណ៍ល្អបាន ចូរញ៉ាំត្រីសម្បូរខ្លាញ់អោយបាន ៨៥ក្រាម យ៉ាងហោចណាស់ ពីរដងក្នុងមួយថ្ងៃ។
តែខ្មៅ
ផឹកតែខ្មៅប្រហែលជាជួយអោយអាការៈស្ត្រេសខ្លាំងឆាប់បាត់ទៅវិញ។ ការសិក្សាមួយដែលបានប្រៀបធៀបអ្នកផឹកតែបួនពែងរាល់ថ្ងៃរយៈពេល ៦សប្តាហ៍ ជាមួយអ្នកផឹកភេសជ្ជៈផ្សេងទៀតបានអោយដឹងថា អ្នកផឹកតែមានអារម្មណ៍ស្ងប់ស្ងាត់ជើង ហើយចំនួនអ័រម៉ូនស្ត្រេស (Cortisol) ក៏ថយចុះដែរក្រោយពីជួបស្ថានភាពធ្វើអោយស្ត្រេសរួច។
ផ្លែបឺ
មធ្យោបាយដ៏ល្អបំផុតដើម្បីកាត់បន្ថយការឡើងសម្ពាធឈាមខ្ពស់គឺធ្វើយ៉ាងណាទទួលទានជាតិប៉ូតាស្យូមអោយបានគ្រប់គ្រាន់ ហើយផ្លែបឺកន្លះផ្លែមានជាតិប៉ូតាស្យូមច្រើនជាងផ្លែចេកដែលមានទំហំមធ្យមទៅទៀត។ ផ្លែបឺសម្បូរជាតិខ្លាញ់ និងកាឡូរី ដូច្នេះចូរកុំញ៉ាំច្រើនពេក៕
