ការមានផ្ទៃពោះគឺជាដំណើរការនៃការប្រែប្រួលអ័រម៉ូនមួយប្រភេទដែលវាមិនត្រឹមតែធ្វើអោយអ្នកដឹងនោះទេ ប៉ុន្តែវានឹងបង្ហាញអោយឃើញតាមរយៈរាងកាយខាងក្រៅផ្ទាល់ៗតែម្តង។
ការប្រែប្រួលអ័រម៉ូនទាំងនេះធ្វើអោយលំហូរឈាមកើនឡើង ហើយជាលិការក្នុងសុដន់ក៏ប្រែប្រួលដែរ ដែលជាហេតុនាំអោយសុដន់នោះទៅជាឈឺ, ហើមខុសពីធម្មតា ឬមានអារម្មណ៍ចម្លែកពេលប៉ះ។
ស្ត្រីភាគច្រើនប្រាប់អោយដឹងថា អារម្មណ៍ក្នុងពេលនេះមានលក្ខណៈដូចគ្នាមុនពេលជិតមករដូវអញ្ជឹង។ ការឈឺសុដន់គឺជារោគសញ្ញាមុខគេបង្អស់នៃការមានផ្ទៃពោះ ដែលចាប់ផ្តើមកើតមានក្នុងសប្តាហ៍ទី ៤ ទៅទី៦ ហើយបាត់ទៅវិញពេលចប់ត្រីមាសទីមួយ។
ក្រៅពីអារម្មណ៍នៃការឈឺចាប់, ហើម និងរោគសញ្ញាផ្សេងៗទៀត ទំហំរបស់សុដន់ក៏កាន់តែធំជាងមុនផងដែរ។ អ្នកប្រហែលជាសម្គាល់ឃើញថា សុដន់របស់អ្នកកំពុងតែលូតលាស់ធំទៅៗនៅជុំវិញសប្តាហ៍ទី ៦ ដល់ទី៨។
សុដន់នឹងបន្តលូតលាស់រហូត ហើយអ្នកក៏ប្រហែលជាមានអារម្មណ៍រមាស់នៅពេលស្បែកទាញយឺតទៅៗបែបនេះ។ សញ្ញានៃការយឺតស្បែកក៏ប្រហែលជាកើតមានលើសុដន់ដែរនៅពេលសុដន់នោះនៅតែបន្តលូតចុះឡើងៗទៀត។ ក្បាលសុដន់នឹងរីកកាន់តែធំ និងកាន់តែខ្មៅជាមួយនឹងការមើលឃើញសរសៃវ៉ែននៅក្រោមស្បែកសុដន់។ រយៈពេលពីរបីសប្តាហ៍ដំបូងកន្លងផុតទៅ ផ្នែកខ្មៅៗជុំវិញសុដន់ក៏រីកធំ និងខ្មៅជាងមុនដែរ។
នៅជុំវិញខែទីបីនៃការមានផ្ទៃពោះ សុដន់អ្នកប្រហែលជាចាប់ផ្តើមផលិតទឹកដោះដំបូង ដែលជាទឹកដោះដ៏ពិសេសសម្រាប់តម្រូវការរបស់កូននៅពេលគេចាប់ផ្តើមចេះបៅដំបូងគេ។ តាមពិត ក្នុងរយៈពេលពីរបីខែចុងក្រោយនៃការមានផ្ទៃពោះ អ្នកប្រហែលជាចាប់ផ្តើមហៀរទឹកពណ៌លឿងខាប់តិចៗតាមក្បាលសុដន់ដែរ។
ដើម្បីគ្រប់គ្រងការប្រែប្រួលសុដន់ក្នុងពេលមានផ្ទៃពោះបាន អ្នកគួរតែប្រើប្រាស់អាវទ្រនាប់សម្រាប់ស្ត្រីមានផ្ទៃពោះ។ នៅពេលទៅទិញអាវនេះ ចូរប្រាកដថា វាពិតជាល្មមនឹងអ្នកហើយ៕
