បុរសនិងស្ត្រីគ្រប់រូបចង់បានក្បាលពោះរាបស្មើរដោយសារតែមូលហេតុ សោភ័ណភាពនិងសុខភាព។ នៅពេលដែលមនុស្សម្នាក់មានក្បាលពោះរាបស្មើរគេនឹងមានរូបរាងកាន់តែ សង្ហារនិងស្អាតហើយថែមទាំងមានអារម្មណ៍ជឿជាក់លើខ្លួនឯងទៀតផង។
ទំហំចង្កេះតូចក៏អាចបង្ហាញថាមនុស្សម្នាក់មានលំហូរចរន្តឈាមល្អ ដែលមានន័យថាវាកាត់បន្ថយហានិភ័យនៃជំងឺបេះដូងជំងឺគាំងបេះដូង ជំងឺលើសឈាមជំងឺមហារីកតម្រងនោមជំងឺគ្រួសក្នុងប្រម៉ាត់ និងជំងឺសន្លាក់ឆ្អឹង។ ការមានក្បាលពោះរាបស្មើរធ្វើឲ្យមនុស្សម្នាក់មិនងាយនឹងរងរបួសហើយ ថែមទាំងជួយដល់សុខភាពផ្នែកផ្លូវភេទទៀតផង។ បន្ថែមពីលើការហាត់ប្រាណដែលផ្តោតលើក្បាលពោះអ្នកក៏អាចកំណត់របប អាហាររបស់អ្នកដែរដើម្បីជួយឲ្យអ្នកមានក្បាលពោះរាបស្មើរ។
– ការទទួលទានស៊ុត៖ ស៊ុតគឺជា អាហារដែលជួយឲ្យក្បាលពោះរាបស្មើរព្រោះវាមានផ្ទុកវីតាមីនB12 ដែលជាវីតាមីនជួយរំលាយកោសិកាខ្លាញ់។ ប្រូតេអ៊ីនរបស់ស៊ុតជួយធ្វើឲ្យអ្នកឆាប់ឆ្អែត។ អ្នកដែលព្រួយបារម្ភពីការកើនឡើងនៃកម្រិតកូឡេស្តេរ៉ុលអាចមិន ពិសារផ្នែកពណ៌លឿងនៃស៊ុត។
– ប៊័រសណ្តែកដី៖ ប៊័រសណ្តែកដីមានផ្ទុកវីតាមីនE ចំនួន៣មីលីក្រាម, ម៉ាញេស្យូមចំនួន ៤៩ មីលីក្រាម, ប៉ូតាស្យូមចំនួន ២០៨មីលីក្រាម, និងវីតាមីនB6 ចំនួន ០,១៧មីលីក្រាម។ កម្រិតប្រូតេអ៊ីនខ្ពស់របស់ប៊័រសណ្តែកដីធ្វើឲ្យវាក្លាយទៅជាអាហារ ដែលជួយធ្វើឲ្យក្បាលពោះរាបស្មើរ ព្រោះធ្វើឲ្យអ្នកឆាប់ឆ្អែតនិងឆ្អែតបានយូរ។
– គ្រឿងបរិភោគផលិតពីទឹកដោះគោដែលមានជាតិខ្លាញ់ទាប៖ អត្ថបទមួយនិយាយពីការស្រាវជ្រាវនៃភាពធាត់ជ្រុលនិយាយថា ស្ត្រីដែលទទួលទានគ្រឿងបរិភោគដែលផលិតពីទឹកដោះគោមានជាតិខ្លាញ់ទាប ពីបីទៅបួនដងក្នុងមួយថ្ងៃ អាចសម្រកជាតិខ្លាញ់បាន ៧០ភាគរយច្រើនជាងអ្នកដែលមិនទទួលទានគ្រឿងបរិភោគដែលផលិតពី ទឹកដោះគោ។ កាល់ស្យូមដែលមានក្នុងផលិតផលនេះជួយដុតបំផ្លាញជាតិខ្លាញ់។ ចំពោះអ្នកដែលមានបញ្ហាក្នុងការបំលែងជាតិទឹកដោះគោអាចសាកល្បងពិសារ ទឹកដោះគោជូរសុទ្ធដែលមានជាតិខ្លាញ់ទាប ព្រោះវាងាយស្រួលក្នុងការបំលែងជាងផលិតផលដទៃទៀត។
– ជ្រើសរើសផ្លែឈើនិងបន្លែដែលមានពណ៌ស្រស់៖ ផ្លែឈើនិងបន្លែសុទ្ធតែសម្បូរទៅដោយសារធាតុចិញ្ចឹមនិងជាតិសរសៃ។ ពួកវាគឺជាប្រភេទអាហារដែលជួយធ្វើឲ្យក្បាលពោះរាបស្មើរ ព្រោះវាមិនត្រឹមតែធ្វើឲ្យអ្នកឆ្អែតបានយូរដោយសារតែវាសម្បូរ សារធាតុសរសៃនោះទេ វាថែមទាំងមានផ្ទុកជាតិទឹកជាច្រើនសម្រាប់សារធាតុសំណើមទៀតផង។ វាក៏សម្បូរទៅដោយវីតាមីនbeta-carotene និងវីតាមីនC ដែលជួយអ្នកឲ្យមានសុខភាពល្អនិងបង្ការជំងឺផងដែរ ៕
