Join with Health.com.kh on Telegram

ធម្មតា មនុស្ស​យើង​ម្នាក់ៗ តែងតែ​ជួប​ជានិច្ច​នូវ​បញ្ហា​មួយចំនួន​ដោយ​មិន​អាច​គេចផុត ឡើយ គ្រាន់តែ​តិច ឬ ច្រើន​ប៉ុណ្ណោះ​។ កាល​បើ​អ្នក​មិន​ចេះ​គ្រប់គ្រង​អារម្មណ៍​ខ្លួនឯង អោយបាន​ល្អ នោះ​អារម្មណ៍​អវិជ្ជមាន ទាំងនេះ នឹង​អាច​បំផ្លាញ​ដល់ ទាំង​សុខភាព​ផ្លូវកាយ និង ផ្លូវចិត្ត​អ្នក​បាន​ក្នុងពេល​តំណាលគ្នា ។

ដើម្បី​ជួយ​ដោះស្រាយ​នូវ​បញ្ហា​នេះ យើង​សូម​បង្ហាញ​នូវ​វិធី ទាំង​១០ យ៉ាង ដែល​អាច​ជួយ​អោយ​អ្នក ឆាប់​មាន​អារម្មណ៍​ស្រស់ថ្លា​វិញ​បាន ៖

១. សម្លឹង​ពិភពលោក​ក្នុង​ផ្លូវ​ល្អ ពេល​អ្នក​មាន​គំនិត​ដែល​ធ្វើឲ្យ​ក្រៀមក្រំ​ដូចជា “​ខ្ញុំ​មិន​ចេះ​ធ្វើ​លំ​ហាត់​នេះឡើយ​” ចូរ​គិត​សារ​ជា​ថ្មី​ថា “​បើ​ខ្ញុំ​មាន​ជំនួយ​ដ៏​ត្រឹមត្រូវ ខ្ញុំ​ប្រាកដជា​អាចធ្វើ​បាន​” រួច​ទៅ​រក​គ្រូ​ពិសេស ឬ​មិត្តភក្តិ​ជួយ​បង្រៀន​បន្ថែម ។​
២-​សរសេរ​កំណត់ហេតុ ។ អ្នក​អាច​ស្វែងរក សៀវភៅ​មួយ​ក្បាល សម្រាប់​ទុក​សរសេរ​មុនពេល​ចូល​គេង​រាល់​យប់ ប៉ុន្តែ ចៀសវាង​ការសរសេរ នូវ​រឿង​ដែល​មិនល្អ​។ តាម​ការស្រាវជ្រាវ​បង្ហាញថា អ្នក​ដែល​មានគំនិត​ចង់​សម្លាប់​ខ្លួនឯង នឹង​មាន​អារម្មណ៍​ប្រសើរឡើង បន្ទាប់​ពី​ចាប់ផ្តើម​កត់ត្រា​រឿង​ល្អៗ​បាន​ពីរ​សប្តាហ៍ ។​
៣-​ចំណាយ​ពេល​នៅ​ជាមួយ​មនុស្ស​ដែល​ធ្វើឲ្យ​អ្នក​សើច​សប្បាយ​បាន​ដោយ​ភាព សុខសាន្ត​។​
៤-​យកចិត្តទុកដាក់​ចំពោះ​អារម្មណ៍​របស់​ខ្លួនឯង ក្នុងពេល​នីមួយៗ​។ ឧទាហរណ៍ បើ​អ្នក​មាន​អារម្មណ៍ល្អ​បំផុត​នា​ពេល​ព្រឹក​មានន័យថា ពេល​ព្រឹក​គឺជា​ពេល​ចាត់ការ​ចំពោះ​ការងារ​តានតឹង ឬ​ស្មុគស្មាញ​។ បើ​ពេល​រសៀល​អ្នក​អស់កម្លាំង ចូរ​ទុក​ពេលវេលា​នោះ ធ្វើ​កិច្ចការ​ដែល​មិន​ត្រូវ​ប្រើ​ថាមពល​ខាង​អារម្មណ៍​ច្រើន​ដូចជា អាន​សៀវភៅ ឬ​នៅ​ជាមួយ​មិត្តភក្តិ​។ កុំ​ធ្វើ​អ្វី​ដែល​តានតឹង​ពេល​អ្នក​ហត់​នឿយ​។​
៥-​ការ​ហាត់ប្រាណ ជួយ​ឲ្យ​រាងកាយ និង​ចិត្ត​រឹងមាំ គ្រាន់តែ​ហាត់ប្រាណ​មួយថ្ងៃ​២០ នាទី ក៏​អាច​ធ្វើឲ្យ​អារម្មណ៍​ស្ងប់ និង​មាន​សេចក្តីសុខ​បាន​។ ការ​ហាត់ប្រាណ​ជួយ​បង្កើន​ការផលិត​អ័រម៉ូន​អង់​ដូ​ហ្វី​ន​(Endorphin) ដែល​ជា​សារធាតុ​ធ្វើឲ្យកើត​អារម្មណ៍ល្អ និង​មាន​សេចក្តីសុខ ។​
៦-​សង្កេត​ពី​អារម្មណ៍​របស់​ខ្លួន​នៅ​ពេល​ផ្សេងៗ​ប្រចាំខែ ព្រោះស្រី្ត​មួយ​ចំនួន​រកឃើញថា ពេលដែល​ខ្លួន​មាន​អារម្មណ៍មិនល្អ​ពាក់ព័ន្ធ​ជាមួយ​វដ្ត​រដូវ ។​
៧-​ចេះ​ថ្លឹងថ្លែង​វែកញែក​នូវ​បញ្ហា​គ្រប់​ជំពូក​។​
៨-​ស្តាប់ភ្លេង ព្រោះ​ការស្រាវជ្រាវ​រកឃើញ​ថា ចង្វាក់​របស់​ចម្រៀង ជួយ​រៀប​គំនិត និង​អារម្មណ៍ និង​ជួយ​កាត់បន្ថយ​ភាព​តានតឹងរ​ប់ស​សាច់ដុំ ។​
៩-​ទូរ​សព្ទ​ទៅរក​មិត្តភក្តិ ការសុំ​ជំនួយ​ធ្វើឲ្យ​អ្នក​មានអារម្មណ៍​ជិតស្និទ្ធ​ជាមួយ​អ្នក​ដទៃ និង​កាត់បន្ថយ​នូវ​អារម្មណ៍​ឯកា ហើយ​ការ​ឱបក្រសោប​ជួយ​ឲ្យ​រាងកាយ បញ្ចេញ​អ័រម៉ូន ដែល​ធ្វើឲ្យ​មាន​អារម្មណ៍​ល្អ ដែល​អាច​ជួយ​ទប់ទល់​ជាមួយ​អារម្មណ៍​តានតឹង​បាន ។​
១០-​ចូរ​ស្ថិតក្នុង​ចំណោម​មន​ស្ស​ដែល​មាន​សេចក្តីសុខ ព្រោះ​វា​នឹង​ធ្វើឲ្យ​អ្នក អាច​ចែករំលែក​នូវ​អារម្មណ៍​ទាំងនោះ​ជាមួយ​ពួកគេ​បាន​ផង​ដែរ​៕