អ្នកប្រយុទ្ធដោយប្រើដាវសាម៉ូរ៉ៃពីបុរាណ តែងប្រើនូវទឹកត្រជាក់មួយធុង មកចាក់ស្រោចពីលើខ្លួន របស់ពួកគេ ជារៀងរាល់ព្រឹក ដោយពួកគេជឿថា ការធ្វើដូចនេះ អាចធ្វើអោយអារម្មណ៍បរិសុទ្ធ និង សម្អាតខ្លួនប្រាណរបស់ពួកគេ បានយ៉ាងល្អ។
មិនថា វាពិតជាដូចនេះមែនឬក៏អត់ វាប្រាកដជាអាចជួយ អោយពួកគេភ្លឺស្វាងអារម្មណ៍បានល្អ ។ យ៉ាងហោចណាស់ វាពិតជារបស់ដ៏សំខាន់ ដែលអ្នកនឹងត្រូវការ នៅក្នុងពេលព្រឹក ប៉ុន្តែក្រៅពីនេះទៀត ការងូតទឹកត្រជាក់ គឺនឹងអាចផ្តល់អោយ អ្នកនូវអត្ថប្រយោជន៍ជា ច្រើន ។ ទោះជាយ៉ាងណាក៏ដោយ ការងូតទឹកត្រជាក់នេះ មិនមែនបានន័យថា អ្នកត្រូវយកទឹកត្រជាក់ មកចាក់ស្រោចលើខ្លួន ដូចជាអ្នកប្រយុទ្ធដាវសាម៉ូរ៉ៃនោះទេ ប៉ុន្តែអ្នកអាច ចាប់ផ្តើមជាមួយនឹង ការងូតទឹក ក្តៅឧណ្ណៗ និង បន្ទាប់មកបញ្ចប់វា ជាមួយនឹងការងូតទឹកត្រជាក់។ អ្នកគ្រាន់តែ បញ្ចប់ការងូតទឹក នៅរយៈពេលប៉ុន្មាននាទីចុងក្រោយ ជាមួយនឹងទឹកត្រជាក់ នោះវាក៏អាចនឹងផ្តល់អោយ អ្នកនូវ ផលជាទីគាប់ចិត្តបានផងដែរ។
ខាងក្រោមនេះ គឺជាអត្ថប្រយោជន៍មួយចំនួន ពីការងូតទឹក ត្រជាក់ ៖
១. ធ្វើអោយដំណើរឈាមរត់ប្រសើរជាងមុន
ទឹកក្តៅឧណ្ណៗ គឺអាចធ្វើអោយចរន្តឈាម រត់ទៅកាន់ស្បែករបស់អ្នក ខណៈពេល ដែលទឹកត្រជាក់ ធ្វើចលនាបញ្ច្រាសមកវិញ ដោយធ្វើអោយចរន្តឈាម រត់ត្រលប់មករក សិរីរៈរបស់អ្នកវិញ ដោយការ រក្សាអោយពួកវា មានមានភាពកក់ក្តៅ ។ វិធីនេះ អាចជម្រុញអោយប្រព័ន្ធឈាមរត់របស់អ្នក មានភាពល្អ ប្រសើរឡើង ដែលវានឹងជួយ បញ្ចេញមកវិញនូវ ជាតិពុលចេញពីខ្លួនរបស់អ្នក។ ប្រព័ន្ធដំណើរឈាមរត់ ដែលមានសុខភាពល្អ នឹង ជួយការពារជំងឺលើសសម្ពាធឈាម, ការឡើងរឹងសសៃអាទែ និង ជួយបង្កើន ល្បឿន នៃការជាសះស្បើយ ពីលំហាត់ប្រាណដ៏សកម្ម ។
២. ធ្វើអោយស្បែក និង សក់មានសុខភាពល្អ
អ្នកតែងតែត្រូវបានផ្តល់យោបល់ អោយធ្វើការលាងសម្អាតមុខរបស់អ្នក ជាមួយនឹងទឹកក្តៅឧណ្ណៗ ដោយសារតែវា អាចបើករន្ធញើសរបស់អ្នកបាន។ រន្ធញើសរបស់អ្នក គប្បីត្រូវបានធ្វើការសម្អាត អោយ បានស្អាតល្អ ប៉ុន្តែ វាក៏ចាំបាច់ផងដែរ ក្នុងការបិទភ្ជិតវាទៅវិញ ជាមួយនឹងការប្រើទឹកត្រជាក់ យកមកលុប មុខ។ វិធីនេះ អាចការពាររន្ធញើស របស់អ្នកពីការកកស្ទះនូវជាតិប្រេង និង ធូលីបានយ៉ាងងាយ ដែលវា អាចនឹងបង្ក អោយអ្នកចេញមុនបាន។ វាក៏អាចនឹង បង្រួមសសៃឈាម ដែលអាចនឹងកាត់បន្ថយនូវ ភាពហើមប៉ោង នៅលើផ្ទៃមុខ និង ការពារបានផងដែរនូវ ស្នាមជាំខ្មៅដែលអាចនឹងលេចមាន នៅជុំវិញរង្វង់ភ្នែក ។ សម្រាប់សុខភាពសក់ វាក៏អាចជះឥទ្ធិពលបានដូចគ្នានេះ ផងដែរ។ វាបិទនូវ រន្ធញើសដែល មាននៅជុំវិញឬសសក់ ដែលវា នឹងជួយរក្សាអោយ ស្បែកក្បាលរបស់អ្នកមានសុខភាពល្អជាងមុន និង ការពារបានយ៉ាងងាយ នូវការប្រមូលផ្តុំនូវធូលី នៅលើស្បែកក្បាល។ ទឹកក្តៅឧណ្ណៗ ត្រូវបានដឹងថា វាអាច ប្រើបានដើម្បីសម្អាតនូវ ជាតិប្រេងពីធម្មជាតិ ចេញពីស្បែក ដែលរាងកាយអ្នក នឹងធ្វើការបង្កើត វា កាន់តែច្រើនជាងមុន។ បញ្ហានេះ នឹងធ្វើអោយស្បែកក្បាលរបស់អ្នក ក្លាយជាកាន់តែស្ងួត ឬ មានជាតិប្រេងច្រើនជាងមុន ។ដូច្នេះ ការងូតទឹកត្រជាក់ គឺជាជម្រើសដ៏សាកសមសម្រាប់អ្នក។
៣. ធ្វើអោយប្រព័ន្ធភាពសាំរឹងមាំឡើង
ការសិក្សាបានបង្ហាញថា ស្ត្រីដែលតែងតែ ងូតទឹកជាមួយនឹង ទឹកត្រជាក់ជាទៀតទាត់ នឹងអាចមាន ចំនួន កោសិកាគ្រាប់ឈាមស ខ្ពស់ជាង បើធ្វើការប្រៀបធៀបជាមួយនឹង ស្ត្រីដែលជ្រើសរើសយក ការងូតទឹកក្តៅឧណ្ណៗ ។ កោសិកាគ្រាប់ឈាមស គឺជាកោសិការបស់ ប្រព័ន្ធភាពសាំ ដែលនឹង ចូលរួម ក្នុងការ ការពាររាងកាយ អ្នកប្រឆាំងនឹង ការបង្ករោគ, ការប្រឈមនឹងវត្ថុចម្លែកនៅក្នុងរាងកាយ និង ជំងឺផ្សេងៗទៀតមួយចំនួន។ កម្រិតមេតាបូលីស ដែលត្រូវបានកើនឡើង ដោយការងូតទឹកត្រជាក់ ដែល នឹងកើតឡើង ដោយសារតែរាងកាយអ្នក បានព្យាយាម បង្កើតកម្តៅសម្រាប់ខ្លួនវា គឺអាចធ្វើអោយ ប្រព័ន្ធភាពសាំ កាន់តែសកម្មឡើង និង បង្កើតបានផងដែរនូវ កោសិកាគ្រាប់ឈាមសបន្ថែមទៀត ។
៤. បង្ការនូវបញ្ហាធ្លាក់ទឹកចិត្ត និង ជម្រុញធ្វើអោយសុខុមាលភាពជាទូទៅមានភាពប្រសើរឡើង
ការងូតទឹកត្រជាក់ ក្នុងរយៈពេលខ្លីមួយ គឺត្រូវបានគេអះអាងថា វាអាចរំញោចដល់ ចំណុចសំខាន់របស់ ប្រព័ន្ធខួរក្បាល ដែលនឹងអាចជួយសម្រាលដល់ ស្ថានភាពនៃជំងឺធ្លាក់ទឹកចិត្ត។ វាក៏អាចនឹង រក្សាបានផងដែរនូវ លំនឹងនៃប្រព័ន្ធប្រសាទស្វយ័ត ដែលវាមិនត្រឹមតែអាចធ្វើអោយ ស្មារតីអ្នកភ្លឺស្វាងល្អ នោះទេ តែវាថែមទាំងអាច មានអារម្មណ៍ធូរស្រាល និង បញ្ចេញបានផងដែរនូវស្ថានភាពស្ត្រេស។ផ្នែកដ៏ពិបាក នៃការងូតទឹកត្រជាក់នោះគឺ ចំណុចចាប់ផ្តើមដំបូង នៅពេលដែលខ្លួនប្រាណអ្នកត្រូវបាន ទឹកត្រជាក់ស្រោចពីលើខ្លួន ។ ប៉ុន្តែវាជាធម្មជាតិ រាងកាយអ្នក នឹងផ្សាំខ្លួនវា បានទៅនឹងស្ថានភាពបែប នោះនៅពេលក្រោយមកទៀត ៕
