នៅពេលអ្នកមានគភ៌ ត្រីមាសទាំង៣គឺជាព្រឹត្តិការណ៍ដ៏សំខាន់របស់អ្នក។ ត្រីមាសទាំងនោះ មិនមែនមានរយៈពេលកំនត់៣ខែដូចៗគ្នានោះទេ ពួកវាមានរយៈពេលកំនត់ផ្សេងៗគ្នា និង កំនត់ទៅតាមការរីកលូតលាស់ និងការរីកធំធាត់របស់ទារកអ្នក។ ត្រីមាសទី១ គឺចាប់ផ្តើមនៅថ្ងៃកំនត់ដំបូងនូវការកកើតនៃគភ៌ ។
នៅក្នុងត្រីមាសទី១ ខ្លួនប្រាណរបស់អ្នក នឹងធ្វើការសម្របសម្រួលទៅនឹងភាពមានគភ៌នេះ។ ជាដំបូង អ្នកនឹងមើលទៅឃើញគ្មានអ្វីប្លែកនោះទេ ហើយអ្នកក៏មិនមានអារម្មណ៍ប្លែកអ្វីផងដែរ ប៉ុន្តែសកម្មភាពរបស់អរម៉ូនអ្នកនឹងឆាប់ចាប់ផ្តើមមានឥទ្ធិពល ទៅលើអ្នកក្នុងវិធីផ្សេងៗគ្នា។ អ្នកប្រហែលជាអាចមានការផ្លាស់ប្តូរអារម្មណ៍ជាច្រើន,អ្នកក៏ប្រហែលជាអាចចង់រួមដំណេកច្រើនជាង ឬ តិចជាងមុន ហើយអ្នកប្រហែលជារកឃើញថាចំណង់បរិភោគអាហាររបស់អ្នកមានការផ្លាស់ប្តូរ អ្នកចាប់ផ្តើមមានអារម្មណ៍សាមញ្ញ និង មិនសូវចូលចិត្តអាហារដូចពេលធម្មតា។
ការកើនទំងន់របស់អ្នក
នៅក្នុងរយៈពេល៣ខែដំបូងនៃការមានគភ៌របស់អ្នក អ្នកនឹងប្រហែលជាឡើងទំងន់ ចន្លោះពី ១ទៅ ២គីឡូក្រាមប្រសិនបើអ្នក មិនមានបញ្ហាខ្លាំងជាមួយនឹងអាការៈចង់ក្អួត។ទារករបស់អ្នកនឹងមានទំងន់ត្រឹមតែ ៤៨ក្រាមប៉ុណ្ណោះ។ ឯទំងន់ដែលនៅសល់ គឺត្រូវបានបង្កើតឡើងពីប្រព័ន្ធទ្រទ្រង់របស់ទារកអ្នក មានដូចជា សុក និង ទឹកភ្លោះ, ការកើនទំហំរបស់ស្បូន និងដើមទ្រូង និងចំនួនឈាមបន្ថែមទៀតដែលមាននៅក្នុងរាងកាយរបស់អ្នក។ ការស្តុកទុកជាតិខ្លាញ់របស់អ្នក ក៏នឹងមានការកើនឡើងប្រហាក់ប្រហែលនឹងទំងន់ដែលទារករបស់អ្នកទទួលបាននោះដែរ ។
ការផ្លាស់ប្តូរផ្នែករាងកាយ
ខ្លួនប្រាណនៃការមានគភ៌របស់អ្នក ត្រូវធ្វើការយ៉ាងសកម្មដើម្បីទទួលយកការរីកលូតលាស់របស់អំប្រ៊ីយូ និងសុក។ នៅពេលអ្នកមានគភ៌ កំរិតមេតាបូលីសរបស់ខ្លួនប្រាណរបស់អ្នក កើនឡើង ហើយវាមានចន្លោះពី ១០ទៅ២៥ភាគរយខ្ពស់ជាងកំរិតធម្មតា។ នេះមានន័យថា គ្រប់ដំណើរការរបស់រាងកាយអ្នកត្រូវបានបង្កើនឡើង។ ការច្របាច់បញ្ចេញឈាមរបស់បេះដូងកើនឡើងយ៉ាងខ្ពស់ ស្ទើរតែទៅដល់កំរិតអតិបរមាដែលវានឹងបន្តឡើងរហូតដល់រយៈពេលចុងក្រោយនៃការមានផ្ទៃពោះ ។ ចង្វាក់បេះដូងរបស់អ្នក ក៏កើនឡើងផងដែរ ហើយនឹងបន្តឡើងរបៀប នេះរហូតដល់ពាក់កណ្តាលនៃត្រីមាសទី២។ ការដកដង្ហើមរបស់អ្នកនឹងកាន់តែញាប់ តាមដែលឥលូវនេះ អ្នកត្រូវបញ្ជូនអុកស៊ីសែនកាន់តែច្រើនឡើងទៅអោយទារករបស់អ្នក និងដកដង្ហើមបញ្ចេញមកវិញនូវ ឧស្ម័នកាបូនិច។
ដោយសារតែសកម្មភាពនៃការកើនឡើងរបស់ កំរិតអរម៉ូនប្រូហ្សែសស្តេរ៉ូន និង អឺសស្ត្រូសែន នៅក្នុងរាងកាយរបស់អ្នក ដើមទ្រូងរបស់អ្នកនឹងឡើងធំ និង កាន់តែធ្ងន់យ៉ាងឆាប់រហ័ស។ ពួកវាជាធម្មតាមានភាពតឹងណែន ក្នុងការប៉ះ តាំងពីពេលដំបូង ។វាក៏មានការកើនឡើង នូវការស្តុកទុកជាតិខ្លាញ់នៅក្នុងដើមទ្រូងរបស់អ្នក និង បំពង់ទឹកដោះថ្មីចាប់លូតលាស់។ Areola នៅជុំវិញក្បាលសុដន់ឡើងពណ៌ឌិត និង លូតលាស់នូវបណ្តុំកោសិកាតូចៗដែលគេហៅថា Montgomery’s tubercles។ នៅក្រោមស្បែករបស់អ្នក បណ្តុំនៃខ្សែពណ៌ខៀវស្រាល នឹងលេចឡើងតាមដែលការផ្គត់ផ្គង់ឈាមទៅកាន់សុដន់មានការកើនឡើង។
ស្បូនរបស់អ្នកនឹងរីកធំជាងមុន ទោះជានៅក្នុងពេលនៃការមានគក៌ដំបូងក៏ដោយ ប៉ុន្តែអ្នកនឹងមិនមានអារម្មណ៍ដឹងពីវា តាមជញ្ជាំងពោះទេ រហូតដល់ចុងនៃត្រីមាសទី១ នៅពេលដែលវាចាប់ផ្តើមឡើងលើសពីបន្ទាត់អាងត្រគាក។នៅពេលដែលស្បូននៅតែនៅទាប នៅក្នុងឆ្អឹងអាងត្រគាក វានឹងចាប់ផ្តើមសង្កត់ទៅលើប្លោកនោមតាមដែលវាកាន់តែរីកធំឡើង ដូច្នេះអ្នកនឹងសំគាល់ឃើញថាខ្លួនអ្នក ត្រូវការបត់ជើងតូចញឹកញាប់ជាងមុន ។សសៃសាច់ដុំស្បូនរបស់អ្នក ចាប់ផ្តើមឡើងក្រាស់ រហូតដល់វាកាន់តែរឹង។ ទោះជាយ៉ាងណា អ្នកប្រហែលជានឹងមិនចាប់អារម្មណ៍នឹងការផ្លាស់ប្តូរទំហំចង្កេះរបស់អ្នក រហូតដល់ចុងត្រីមាសទី១នេះទេ ។
ការថែរក្សាខ្លួនអ្នក
នៅពេលអ្នកមានផ្ទៃពោះ អ្នកនឹងត្រូវការសារជាតិកាបូអ៊ីដ្រាតបន្ថែម និងជាតិប្រូតេអ៊ីនដើម្បីផ្គត់ផ្គង់ដល់ ការរីកលូតលាស់របស់ទារក និង សុក ក៏ដូចជាស្បូន និងសុដន់របស់អ្នកផងដែរ ដូច្នេះវាពិតជាចាំបាច់ណាស់ សំរាប់អ្នកក្នុងបរិភោគអាហារដែលនាំអោយមានសុខភាពល្អ តាំងពីពេលដំបូងមកម្ល៉េះ។ អ្នកក៏នឹងត្រូវការសារធាតុរាវបន្ថែមផងដែរ ដូចនេះចូរព្យាយាមផឹកសារធាតុរាវយ៉ាងតិច ៨កែវ ក្នុងមួយថ្ងៃ។ ចូរជៀសវាងការទទួលទានថ្នាំ, កាហ្វេអ៊ីន,អាហារដែលនៅសល់, សុរា និងការជក់បារីក្នុងកំឡុងពេលនៃការមានគក៌របស់អ្នក។ ចូរប្រាកដផងដែរថា អ្នកនឹងទទួលទានដំណេកអោយបានច្រើន។
សំលៀកបំពាក់ អ្នកនឹងមានអារម្មណ៍រីករាយ នឹងការស្លៀកសំលៀកបំពាក់ដែលមានផាសុកភាព។ ទោះបីជាអ្នកមិនទាន់ចាំបាច់ត្រូវការទិញសំលៀកបំពាក់សំរាប់ការមានគក៌នៅឡើយ វាក៏គ្មានអ្វីអាក្រក់ជាងការស្លៀកសំលៀកបំពាក់ដែលតឹងណែន និងមិនមានផាសុក។ ទោះជាវាមានរយៈពេលត្រឹមតែ២ ឬ៣ថ្ងៃក៏ដោយ ដូច្នេះអ្នកត្រូវតែត្រៀមខ្លួនទុកជាមុន សំរាប់ការកើនឡើងនូវទំហំរបស់អ្នក។ អ្នកនឹងយល់ឃើញថា អ្នកត្រូវការពាក់អាវទ្រនាប់រាងធំជាងមុនតាំងពីពេលដំបូង ហើយវាកាន់តែមានភាពប្រសើរ ប្រសិនបើវាជាអាវទ្រនាប់សំរាប់ស្ត្រីមានផ្ទៃពោះ។
ការថែទាំមុនសម្រាល
វេជ្ជបណ្ឌិតរបស់អ្នក អាចបញ្ជាក់ថាអ្នកមានផ្ទៃពោះ ឬ ក៏អ្នកអាចធ្វើការណាត់ជួបជាមួយ នឹងគ្លីនិកថែទាំមុនសម្រាលអោយបានឆាប់រហ័សតាម ដែលអ្នកបានដឹងពីលទ្ធផលវិជ្ជមានរបស់អ្នក។ នៅពេលអ្នកទៅកាន់គ្លីនិកជាលើកដំបូង ឆ្មបនឹងសាកសួរអ្នកអំពី ប្រវត្តិវេជ្ជសាស្ត្ររបស់អ្នក និង ក្រុមគ្រួសារអ្នក។ អ្នកក៏នឹងត្រូវបានផ្តល់អោយនូវការពិនិត្យរូបរាងកាយយ៉ាងម៉ត់ចត់ រួមមានទាំងការពិនិត្យទឹកនោម និង ឈាមផងដែរ។
ការរៀបចំផែនការ
វេជ្ជបណ្ឌិតរបស់អ្នក នឹងពិភាក្សាជាមួយអ្នកអំពី ជំរើសនៃការផ្តល់កំណើតដែលអ្នកចង់បាននៅក្នុងតំបន់របស់អ្នក តើមន្ទីរពេទ្យមួយណាដែលអ្នកអាចទៅបាន និងការរៀបចំដែលអ្នកអាចធ្វើបាន សំរាប់ការផ្តល់កំណើតនៅផ្ទះ។ឥលូវនេះ គឺជាពេលវេលាដែលអ្នកត្រូវចាប់ផ្តើមគិតពី ប្រភេទនៃការសម្រាលដែលអ្នកចង់បាន និងទីកន្លែងណាដែលអ្នកនឹងអាចទទួលយកវាបាន។ អត្ថបទនេះ អាចជួយអ្នកអោយសំរេចចិត្ត ពីប្រភេទសម្រាលដែលអ្នកចង់បានហើយវាក៏អាចផ្តល់ពត៌មានបានយ៉ាងជ្រាលជ្រៅ អំពីរាល់អ្វីៗដែលអ្នកត្រូវធ្វើជាមួយនឹង ការមានគភ៌, ការប្រសូតនិង ការថែទាំទារក។
មានស្ត្រីខ្លះមានអារម្មណ៍ដូចជាចង់ទិញកាដូតូចមួយ សំរាប់ទារកមិនទាន់កើតរបស់ពួកគេ ដូចជាកូនតុក្កតាខ្លាឃ្មុំ ឆាប់ៗតាមដែលពួកគេដឹងថា គេមានផ្ទៃពោះ ។អ្នកប្រហែលជាចង់ចាប់ផ្តើមសរសេរកំនត់ហេតុប្រចាំថ្ងៃនៃ សុខភាពនិងអារម្មណ៍របស់អ្នក កំឡុងពេលត្រីមាសទី១ដូច្នេះអ្នកនឹងអាចមានកំនត់ត្រាពេញលេញមួយ សំរាប់ការពរពោះរបស់អ្នក។
ការមានគក៌របស់អ្នក
ការរកឃើញថា អ្នកមានផ្ទៃពោះហើយ ពិតជាដំណឹងដ៏គួរអោយរំភើប ជាពិសេសប្រសិនបើនេះជាលើកដំបូងរបស់អ្នក។នេះជាសញ្ញាណដំបូងនៃរូបរាងកាយរបស់អ្នក ដែលអ្នកគួរតែដឹង។
• ដើមទ្រូងរបស់អ្នកនឹង រីកធំ និងធ្ងន់ជាងមុន ហើយនិង ឆាប់ទទួលរំញោច។
• អ្នកនឹងសង្កេតឃើញមានឡើងពណ៌ខ្លាំងនៅក្បាលដោះរបស់អ្នក និងប្រជុយ និងអាចម៍រុយនឹងឡើងកាន់
តែធំជាងមុន។
• អ្នកនឹងអាចមានអារម្មណ៍អស់កំលាំង។
• អ្នកក៏អាចមានអារម្មណ៍ចង់ក្អួត ជាពិសេសនៅពេលព្រឹកព្រលឹម៕
