សូមក្រឡេកមើលសញ្ញានៅលើក្រចករបស់អ្នក ដែលប្រាប់អ្នកពីអ្វីដែលមានបញ្ហាក្នុងរាងកាយរបស់អ្នក។ តោះពិនិត្យទាំងអស់គ្នា!
ក្រចកជាមួយឆ្នូតខ្មៅបញ្ឈរ
ប្រសិនបើថ្ងៃណាមួយស្រាប់តែមានឆ្នូតបញ្ឈរខ្មៅនៅលើក្រចក អាចជាសញ្ញានៃជំងឺមហារីកស្បែក។ តើអ្នកដឹងទេថា ជំងឺមហារីកស្បែកប្រភេទ Melanoma ដែលជាទម្រង់ធ្ងន់ធ្ងរបំផុតនៃជំងឺមហារីកស្បែក អាចបង្ហាញខ្លួនវានៅក្នុងការផ្លាស់ប្តូរនៅលើក្រចកដៃ? ក្នុងករណីនេះ យកល្អគួរតែទៅជួបគ្រូពេទ្យដើម្បីពិនិត្យឱ្យបានឆាប់តាមដែលអាចធ្វើទៅបាន។
ក្រចកពាក់កណ្តាលរង្វង់ធំ
ប្រសិនបើក្រចកលេចចេញជារង្វង់ភ្លុក-ស និងមានប្រវែងប្រហែល 1/5 នៃក្រចកនោះ អ្នកមានសុខភាពធម្មតា។ ប៉ុន្តែប្រសិនបើទំហំរបស់វាធំជាងធម្មតា អ្នកអាចនឹងមានបញ្ហាជាមួយនឹងថ្លើមរបស់អ្នក។
ក្រចកដែលមានឆ្នូតពណ៌សផ្ដេក
ប្រសិនបើមានឆ្នូតពណ៌សផ្ដេកនៅលើក្រចក វាអាចជាសញ្ញាបង្ហាញថារាងកាយខ្វះជាតិស័ង្កសី ឬប្រូតេអ៊ីន។ លើសពីនេះ វាក៏អាចជាសញ្ញានៃបញ្ហាធ្ងន់ធ្ងរបន្ថែមទៀត ដូចជាបញ្ហាតម្រងនោម ឬថ្លើមជាដើម។
ក្រចកដែលមានឆ្នូតបញ្ឈរជាច្រើន
ក្រចកដែលមានឆ្នូតបញ្ឈរជាច្រើន ហើយកាន់តែស្ងួត និងគ្រើមអាចជាសញ្ញានៃអាយុ។ ឆ្នូតបញ្ឈរនៅលើក្រចក ក៏ដូចជាស្នាមជ្រីវជ្រួញនៅលើស្បែកនឹងលេចឡើងកាន់តែច្រើននៅពេលអ្នកកាន់តែចាស់ ជាពិសេសនៅពេលដែលអ្នកមានអាយុ 50 ឆ្នាំ។
ក្រចកមានរាងប៉ោង
វាអាចទៅរួចដែលថានេះគឺជាលទ្ធផលនៃស្ថានភាពសួតដែលនាំឱ្យមានកម្រិតអុកស៊ីសែនក្នុងឈាមទាបជាងធម្មតា។ មហារីកសួតអាចជាមូលហេតុទូទៅ ប៉ុន្តែវាក៏អាចទាក់ទងនឹងជំងឺថ្លើម ឬក្រពេញទីរ៉ូអ៊ីតផងដែរ។
លើសពីនេះ អ្នកអាចនឹងទទួលរងពីកង្វះជាតិដែក ភាពស្លេកស្លាំង។
ក្រចករាងកោង
រូបរាងនៃក្រចកនេះអាចជាសញ្ញានៃភាពស្លេកស្លាំង និងកង្វះជាតិដែក។ នៅពេលនោះ ក្រចកនឹងស្តើងណាស់ ដែលវាមានរាងកោង ជំនួសឱ្យការលើកឡើងបន្តិច។
ក្រចកផុយស្រួយ
សារធាតុ Biotin ដែលត្រូវបានគេស្គាល់ថាជាវីតាមីន H ឬវីតាមីន B7 ជួយចិញ្ចឹមស្បែក សក់ ក្រចក និងក្រចកជើងឱ្យស្រស់ស្អាត។ ក្រចកនឹងបែកងាយជាងធម្មតា ហើយមូលហេតុសំខាន់បំផុតអាចជាកង្វះសារធាតុ biotin ។
សញ្ញានេះក៏អាចជាសញ្ញានៃភាពចាស់ ឬជាលទ្ធផលនៃការប៉ះពាល់ខ្លាំងពេកទៅនឹងថ្នាំលុបក្រចក ឬឧបករណ៍សម្អាត៕