ការរលាកផ្លោកនោមតិចតួចអាចជាវិញដោយខ្លួនតាមរយៈការព្យាបាលនៅតាមផ្ទះដូចជា ការទទួលទឹកអោយបានច្រើនជាដើម ។ ប៉ុន្តែប្រសិនបើអ្នកមិនអាចបំបាត់រោគសញ្ញាបានក្នុងរយៈពេល ២៤ម៉ោងទេ អ្នកគួរតែទៅទទួលការប្រឹក្សាជាមួយគ្រូពេទ្យអំពីការព្យាបាល ។ ការពន្យាពេលមិនបានព្យាបាលជំងឺអោយជា វាអាចនឹងវិវត្តន៍ទៅជាបញ្ហាធ្ងន់ធ្ងរច្រើនផ្សេងៗទៀត ។
ថ្នាំសម្រាប់ព្យាបាលនៅតាមផ្ទះដែលគេប្រើជាញឹកញាប់ជាគេគឺ Pyridium ។ នេះជាថ្នាំមួយប្រភេទជួយធ្វើអោយផ្លូវតម្រងនោមស្ពឹក និងបំបាត់ការឈឺចាប់ តែមិនអាចព្យាបាលជំងឺដែលបង្កអោយមានរលាកផ្លោកនោមទេ ។ ថ្នាំនេះអាចមានប្រយោជន៍សម្រាប់រង់ចាំទទួលលទ្ធផលនៃថ្នាំអង់ទីបីយ៉ូទិចដែលត្រូវនឹងជំងឺ ។
ជំងឺនៅក្នុងផ្លូវតម្រងនោមមានការប្រើប្រាស់ថ្នាំអង់ទីបីយ៉ូទិចជាច្រើនប្រភេទ ។ ចំពោះការរលាកផ្លោកនោមដែលមិនមានផលវិបាកអាចព្យាបាលជាដោយថ្នាំក្នុងរយៈពេលតែ ៣ថ្ងៃ ។ ពេលខ្លះការប្រើថ្នាំជាមួយនឹងជំងឺបង្កឡើងដោយមេរោគមួយចំនួនត្រូវចំនាយពេលរហូតដល់មួយសប្តាហ៍ក៏មាន ។ ករណីភាគច្រើន អ្នកគួរតែមានអារម្មណ៍ល្អឡើងវិញបន្ទាប់ពីបានប្រើថ្នាំជាលើកដំបូង ។ ចំពោះផលវិបាកជំងឺនេះគួរតែត្រូវការព្យាបាលប្រហែលជាមួយសប្តាហ៍ ចំនែកការរលាកតម្រងនោមប្រហែលជាត្រូវព្យាបាលយូរជាងនេះ ។ មនុស្សចាស់ និងអ្នកមានបញ្ហាសុខភាពរ៉ាំរ៉ៃដូចជាជំងឺទឹកនោមផ្អែម ឬជំងឺអេដស៍ ច្រើនតែចេញអោយប្រើថ្នាំអង់ទីបីយ៉ូទិចរយៈពេលយូរ ហើយពេលខ្លះរហូតដល់ ១៤ថ្ងៃ ។
ក្រោយពីការព្យាបាលតាមដំណើរការបានមួយរយៈ អ្នកគួរតែមកធ្វើការតាមដានបន្តទៀតតាមរយៈតេស្តទឹកនោមដើម្បីប្រាកដថាផ្លោកនោមរបស់អ្នកលែងមានរោគសញ្ញាទៀត ។ អ្នកដែលឧស្សាហ៍រលាកផ្លោកនោមច្រើនតែអោយប្រើថ្នាំអង់ទីបីយ៉ូទិចក្នុងកម្រឹតទាបជារៀងរាលថ្ងៃរយៈពេល ៦ខែ ឬច្រើនជាងនេះបន្ថែម ។ អ្នកជំងឺដែលមានជំងឺដោយសារការរួមភេទប្រហែលជាត្រូវប្រើថ្នាំអង់ទីបីយ៉ូទិចក្នុងកម្រឹតទាបគ្រប់ពេលរួមភេទម្តងៗ ។ ចូរចងចាំថាការដែលឧស្សាហ៍មានរោគសញ្ញារលាកផ្លោកនោមអាចបណ្តាលមកពីបញ្ហាមួយចំនួនដូចជា Interstitial Cystitis និងផលវិបាកនៃជំងឺដែលមិនសំខាន់ ។
គ្រូពេទ្យមួយចំនួនអាចចេញជាថ្នាំអ័រម៉ូន Estrogen ជាក្រែម ឬជាថ្នាំគ្រាប់ដើម្បីបង្ការការរលាកផ្លោកនោមឡើងវិញក្នុងពេលអ្នកជំងឺជាស្ត្រីរាំងរដូវហើយ ។ សម្រាប់ករណីដែលការរលាកកើតឡើងដោយសារការស្ទះដូចជា គ្រួសក្នុងតម្រងនោម ឬរឺកក្រពេញប្រូស្តាត ត្រូវតែធ្វើការព្យាបាលដោយការវះកាត់ ។
ការការពារ
ដំបូន្មានសម្រាប់មនុស្សប្រុស និងស្រី៖
• នោមអោយទៀងទាត់ និងនោមម្តងៗអោយអស់ៗ
• ប្រើសំឡីអនាម័យដែលមិនក្រហាយ និងសើម
• ជាទូទៅត្រូវតែមានអនាម័យអោយបានល្អ
• ផឹកទឹកអោយបានច្រើន ។
• ចៀសវាងទទួលទានសារធាតុដែលប៉ះពាល់ដល់ផ្លោកនោមដូចជា ស្រា និងកាហ្វេ ។
ដំបូន្មានសម្រាប់មនុស្សស្រី
• នោមអោយអស់ពីផ្លោកនោមក្រោយពីរួមភេទរួច
• ចៀសវាការប្រើសាប៊ូក្រអូប ងូតទឹកមានសាប៊ូពពុះ លាងទឹកក្រអូប និងប្រើថ្នាំបំបាត់ក្លិនក្នុងទ្វារមាស ។ សារធាតុទាំងនេះផ្សំឡើងទៅដោយធាតុដែលអាចរលាកបង្ហូរនោម និងងាយនឹងឆ្លងជំងឺ ។
• ប្រសិនបើអ្នកប្រើឧបករណ៍ពន្យាកំណើត ចូរប្រាកដថាការបំពាក់ឧបករណ៍ទាំងនោះបានត្រឹមត្រូវ និងមិនត្រូវដាក់វាយូរពេកទេ ។
• ទទួលទានទឹកដោះគោជូរដែលមានបាក់តេរីមួយប្រភេទឈ្មោះថា Lactobacilli ។ បាក់តេរីទាំងនេះប្រហែលជាជួយការពារការឆ្លងជំងឺបាន ។
ប្រសិនបើអ្នកមានជំងឺក្នុងផ្លូវតម្រងនោម ដំបូន្មានខាងលើនេះគឺមានផលប្រយោជន៍ណាស់សម្រាប់អ្នកព្រោះវាជួយបង្កអ្នកកុំអោយកើតជំងឺរលាកផ្លោកនោមម្តងទៀត ។
