ជំងឺមុនគឺជាប្រភពមួយនៃការរលាកស្បែក ដែលមានលក្ខណៈតិចតួចរហូតដល់ធ្ងន់ធ្ងរ។ វាច្រើនតែបង្កឡើងដោយសារតែការកើនឡើងនៃអ័រម៉ូន Androgen ដែលជាអ័រម៉ូនភេទប្រុស។ អ័រម៉ូននេះក៏មានក្នុងខ្លួនមនុស្សស្រីដែរ ហើយក៏មានភាពសកម្មក្នុងវ័យជាយុវវ័យទាំងប្រុស និងស្រ្តី។ វានឹងធ្វើឲ្យក្រពេញផលិតជាតិខ្លាញ់សេបូមកាន់តែច្រើន។ ជាតិអ័រម៉ូនសំយោគដែលមានក្នុងថ្នាំពន្យាកំណើត អាចជួយបន្ថយការបញ្ចេញជាតិខ្លាញ់សេបូមនេះបាន ដូច្នេះក៏បន្ថយការកើតមុនដែរ។ យ៉ាងណាមិញ ការងារចំបងរបស់ថ្នាំពន្យាកំណើតគឺ៖
- បញ្ឈប់ក្រពេញអូវ៉ែកុំឲ្យបញ្ចេញមេជីវិតញី
- ផ្លាស់ប្តូរលក្ខណៈរបស់ភាពរំអិលនៅមាត់ស្បូន ដើម្បីផ្តល់ភាពកាន់តែលំបាកដល់មេជីវិតឈ្មោលឆ្លងកាត់
- ផ្លាស់ប្តូរកម្រាលរបស់ស្បូនដើម្បីកុំឲ្យមានការកាច់សម្បុកកូនបាន។
ក្រៅពីនេះ ថ្នាំគ្រាប់ពន្យាកំណើតអាចផ្តល់អត្ថប្រយោជន៍ច្រើនប្រភេទទៀតដែរដូចជា៖
- ធ្វើឲ្យរដូវមកកាន់តែតិច និងកាន់តែទៀងទាត់
- មិនសូវមានការឈឺចាប់ពេលមករដូវ
- បន្ថយការប្រឈមនឹងជំងឺមហារីកដូចជា មហារីកក្រពេញអូវ៉ែ ស្បូន និងពោះវៀនធំ
- សម្រួលដល់ការកើតមុន
ថ្នាំគ្រាប់ពន្យាកំណើតភាគច្រើនគឺមានឥទ្ធិពលស្មើៗគ្នាក្នុងការជួយដល់ការកើតមុន។ តាមការសិក្សាឡើងវិញរបស់ Cochrane Reviews ក្នុងឆ្នាំ ២០១២ ដែលពិនិត្យទៅលើការសិក្សាចំនួន ៣១ ក្នុងនោះមានការប្រើប្រាស់ប្រើថ្នាំគ្រាប់ពន្យាកំណើតដើម្បីព្យាបាលមុន បានរកឃើញថា រាល់ថ្នាំគ្រាប់ពន្យាកំណើតទាំងអស់ អាចគ្រប់គ្រង និងព្យាបាលជំងឺមុនដែលកើតឡើងទាំងរលាក និងមិនរលាកបាន។
ការសិក្សានេះក៏បានណែនាំថា មានអំណះអំណាងតិចតួចដែរ ដែលបញ្ជាក់ថា ថ្នាំគ្រាប់ពន្យាកំណើតដែលផ្ទុកទៅដោយសារធាតុ Dropsirenone គឺមានប្រសិទ្ធភាពជាងថ្នាំដែលផ្ទុកដោយ Norgestimate ឬ Nomegestrol Acetate plus 17 beta-estradiol។ បន្ទាប់មក ថ្នាំដែលផ្ទុកសារធាតុ Drospirenone ត្រូវបានគេរកឃើញទៀតថា មិនសូវមានប្រសិទ្ធភាពជាងថ្នាំដែលមានសារធាតុ Cyproterone Acetate ទេ។
និយាយរួមការសិក្សានេះបានសន្និដ្ឋានឃើញថា រាល់ការនិយាយថា ថ្នាំគ្រាប់ពន្យាកំណើតដែលអាចជួយឲ្យស្បែកកាន់តែមានសុខភាពល្អជាងមុន គួរតែប្រើប្រាស់ដោយប្រុងប្រយ័ត្ន។ តាមការសិក្សាក្នុងឆ្នាំ ២០១៨ បានបញ្ជាក់ថា រាល់អ័រម៉ូនខុសៗគ្នាដែលមានក្នុងថ្នាំគ្រាប់ពន្យាកំណើតគឺមានប្រសិទ្ធភាពក្នុងការបន្ថយការកើតមុនដែលជាការរលាក៕