សព្វថ្ងៃនេះគីមឈីត្រូវបានគេចាត់ទុកថាជាអាហារជាតិរបស់ប្រទេសកូរ៉េ។ បើសិនជាអ្នកមិនបានសាករសជាតិរបស់វាពីមុនមកទេនោះ អ្នកពិតជាមិនទាន់ដឹងអំពីឱជារសរបស់វាដែរ។ ក្រៅពីរសជាតិហឹរដ៏ពេញនិយមនោះ វាក៏ផ្ទុកទៅដោយអត្ថប្រយោជន៍ជាច្រើនដល់រាងកាយផងដែរ។
ការរំលាយអាហារ
គីមឈីគឺជាអាហារដ៏ពិសេសសម្រាប់ជំនួយដល់ការរំលាយអាហារ ដោយសារតែវាមានសារធាតុប្រូបាយអូទិច ដែលអាចនាំឱ្យក្លាយទៅជាមេបាន ព្រមទាំងផ្តល់ជារសជាតិដល់វាផងដែរ។ ប៉ុន្តែមិនមែនមានតែប៉ុនហ្នឹងទេ។ បែបផែនជាមេនេះក៏បង្កើតបានជាបាក់តេរីល្អៗផងដែរដែលមានឈ្មោះថា Lactobacillus ដែលរាងកាយត្រូវការដើម្បីរក្សាបាក់តេរីក្នុងពោះវៀន។
ច្រោះជាតិពុល
ធាតុផ្សំសំខាន់ៗរបស់គីមឈីគឺស្ពៃបូកគោដែលត្រូវបានគេស្គាល់ថាមានសមត្ថភាពច្រោះជាតិពុល។ ការញ៉ាំគីមឈីអាចជួយលុបបំបាត់ជាតិពុល និងកាកសំណល់ពីក្នុងរាងកាយបាន។ រាងកាយដែលកាន់តែស្អាតនឹងមានការបឺតស្រូបជីវជាតិបានកាន់តែល្អ។
ចលនាពោះវៀន
គីមឈីសម្បូរទៅដោយជាតិសរសៃដែលជំនួយដល់ការធ្វើចលនារបស់ពោះវៀនកាន់តែល្អ។ ការញ៉ាំ គីមឈីជាទៀងទាត់អាចជួយទប់ស្កាត់ការទល់លាមកបាន។
កូឡេស្តេរ៉ុល
ការញ៉ាំគីមឈីអាចមានប្រយោជន៍មួយដល់កូឡេស្តេរ៉ុលដែរ។ អាហារកូរ៉េមួយនេះផ្ទុកទៅដោយគ្រឿងផ្សំម្ហូបបែបផ្តល់សុខភាពដូចជា ខ្ទឹមស ដែលមានសារធាតុ Allicin និង Selenium។ សារធាតុ Allicin ត្រូវបានគេស្គាល់ថាអាចជួយបន្ថយកូឡេស្តេរ៉ុលក្នុងឈាម។ ការញ៉ាំគីមឈីទៀងទាត់អាចជួយកាត់បន្ថយជំងឺបេះដូងដូចជា ជំងឺគាំងបេះដូង និងដាច់សរសៃឈាមខួរក្បាល។ ម្យ៉ាងវិញទៀត សេឡេញ៉ូមអាចជួយការពារជញ្ជាំងសរសៃឈាមអាក់ទែបានតាមរយៈការបង្កកុំឱ្យមានកំណកកើនឡើងក្នុងសរសៃឈាម និងកាត់បន្ថយការកើតជំងឺក្រិនរឹងសរសៃឈាមផងដែរ។
អង់ទីអុកស៊ីដង់
គីមឈីមានអង់ទីអុកស៊ីដង់ជាច្រើនដែលអាចការពាររាងកាយពីរ៉ាឌីកាលសេរីបាន។ អង់ទីអុកស៊ីដង់ក្នុងអាហារនេះមានដូចជា Flavonoids និង Phenols ដែលការពាររាងកាយប្រឆាំងនឹងប្រតិកម្មសម្ពាធអុកស៊ីតកម្ម។
សុខភាពស្បែក
បាក់តេរីដែលមានក្នុងគីមឈីមិនមែនគ្រាន់តែមានប្រយោជន៍ចំពោះពោះវៀនប៉ុណ្ណោះទេ តែក៏ល្អចំពោះស្បែកដែរ។ បាក់តេរី Lactobacillus អាចជួយបង្ការបញ្ហាលើស្បែក ហើយភាគច្រើនគឺការរលាកស្បែកដែលបណ្តាលមកពីការកើនឡើងចំនួន Immunoglobulin E។ ដំបៅនៅស្បែកដូចជាការហូរឈាម និងហើមក៏អាចការពារជាមួយនឹងការញ៉ាំគីមឈីបានដែរ៕