រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានមានប្រសាសន៍ថា នៅថ្ងៃទី៣០ ខែមីនានេះ ជាថ្ងៃដែលសម្តេចសប្បាយចិត្តខ្លាំងជាងគេ ដោយសារពន្ធដារបានបំបែកឯកទគ្គកម្មសម្រាប់ចំណូលផ្ទៃក្នុង ដោយប្រមូលបាន ២៣៦លានដុល្លារ ។
សម្តេចតេជោ ថ្លែងក្នុងពិធីសម្ពោធដាក់ឱ្យប្រើប្រាស់ ស្ពានអាកាស និងផ្លូវក្រោមដីចោមចៅ នាព្រឹកថ្ងៃទី៣១ ខែមីនា ឆ្នាំ២០២២ សម្តេចតេជោហ៊ុន សែនបន្ថែមថា ក្នុងរយៈពេលមួយ ខែមីនានេះ អាចបានចំណូលប្រមាណ៧០០លានដុល្លារ ។
នាយករដ្ឋមន្ត្រីបន្តថា ជាក់ស្តែងចំណូល ខែមករា ប្រមាណ២៨៨លាន ខែកុម្ភៈប្រមាណ២២៣លាន ខែមីនា ប្រមាណ៧០០លាន ។ សរុបរយៈពេល៣ខែឆ្នាំ២០២២ ចំណូលបានជាង១២០០លានដុល្លារ ។
សម្តេចតេជោ ហ៊ុន សែន បានថ្លែងប្រៀបធៀបលើចំណូល-ចំណាយរបស់រាជរដ្ឋាភិបាល នៅឆ្នាំ២០២១ និងឆ្នាំ២០២២នេះថា នៅឆ្នាំមុនរាជរដ្ឋាភិបាលបានចំណាយច្រើន លើការប្រយុទ្ធប្រឆាំងកូវីដ១៩ ហើយការប្រមូលចំណូលត្រឡប់មានចំនួនតិច ប៉ុន្តែសម្រាប់ឆ្នាំនេះវិញ រាជរដ្ឋាភិបាលក៏នៅចំណាយច្រើនដដែល ប៉ុន្តែចំណូលសារពើពន្ធក៏ទទួលបានមកវិញច្រើន តាមរយៈការបើកដំណើរការសេដ្ឋកិច្ចពេញលេញឡើងវិញ ៕