ការដើរគឺជាមធ្យោបាយដ៏ល្អបំផុតក្នុងការរស់នៅប្រកបដោយសុខភាពល្អ និងបង្កើនការមានអាយុវែង។ ការហាត់ប្រាណពីកម្រិតមធ្យមទៅខ្លាំងក្លា ការដើរលឿនៗរាល់ថ្ងៃរយៈពេលយ៉ាងហោចណាស់ ៣០នាទី នឹងជួយបន្ថយការឡើងទម្ងន់ និងទប់ស្កាត់ជំងឺជាច្រើនផងដែរដូចជា ជំងឺលើសសម្ពាធឈាម ជំងឺទឹកនោមផ្អែម និងបញ្ហាបេះដូងជាដើម។
ដើម្បីជួយឲ្យរាងកាយមានសុខភាពល្អ និងមានរៀងសមសួនទៀត អ្នកត្រូវតែហាត់ប្រាណដើម្បីរាងកាយ និងអាចប្រើវិធីដើរលឿនៗបាន។ ខាងក្រោមនេះគឺជាអត្ថប្រយោជន៍មួយចំនួនក្នុងការជ្រើសរើសការដើរត្រឹម ៣០នាទីជារៀងរាល់ថ្ងៃ៖
បង្កើនមុខងារប្រព័ន្ធភាពស៊ាំ
ការសិក្សាថ្មីបានឲ្យដឹងថា ការហាត់ប្រាណទៀងទាត់អាចជួយបន្ថយភាពញឹកញាប់នៃការកើតជំងឺផ្តាសាយប្រចាំឆ្នាំបាន។ ការហាត់ប្រាណទៀងទាត់ អាចជួយទ្រទ្រង់ដល់ប្រព័ន្ធភាពស៊ាំ តាមរយៈការពង្រឹងដល់កោសិកាជាច្រើនដែលវាយប្រហាទៅលើបាក់តេរីក្នុងរាងកាយ។ ដើម្បីទទួលបានប្រយោជន៍ទាំងនេះ ការដើរត្រូវតែធ្វើជារៀងរាល់ថ្ងៃ។
ពង្រឹងសុខភាពបេះដូង
អ្នកវិទ្យាសាស្រ្តបាននិយាយថា ការដើរគឺជាទម្រងនៃការហាត់ប្រាណល្អបំផុតសម្រាប់មនុស្សដែលមានរបៀបរស់នៅបែបស៊ីដេក ជាពិសេសមនុស្សពេញវ័យ ក្នុងការបន្ថយការប្រឈមនឹងជំងឺបេះដូងសរសៃឈាម និងជំងឺបេះដូង។ ជាមួយគ្នានេះដែរ ការសិក្សាមួយផ្សេងទៀតដែលបានចុះផ្សាយក្នុងសារព័ត៌មាន American Geriatrics Society បានបញ្ជាក់ថា ទាំងបុរស និងស្រ្តីដែលមានអាយុចាប់ពី ៦៥ឆ្នាំឡើងទៅ ដែលធ្វើការយ៉ាងហោចណាស់ ៤ម៉ោងក្នុងមួយសប្តាហ៍ អាចបន្ថយការប្រឈមនឹងជំងឺបេះដូងសរសៃឈាមបានយ៉ាងល្អ។ ដើម្បីទទួលបានប្រយោជន៍នេះ គួរតែដើរឲ្យបានយ៉ាងហោចណាស់ ៤ម៉ោងក្នុងមួយសប្តាហ៍។
បង្ការភាពភ្លេចភ្លាំង
នៅពេលអ្នកអាយុច្រើន កំហាប់ខួរក្បាលក្នុងតំបន់ Gray Matter នឹងថយចុះ ដែលជាហេតុនាំឲ្យមានបញ្ហានៃភាពឆ្លាតវៃ ជាពិសេសភាពភ្លេចភ្លាំងកើតច្រើន។ ជំងឺជាច្រើនដូចជា ភាពភ្លេច អាចបន្ថយគុណភាពរបស់ជីវិតរស់នៅផង និងមនុស្សដែលយើងស្រឡាញ់ផង។ ដូច្នេះមុនពេលបញ្ហានេះកាន់តែធ្ងន់ធ្ងរ យកល្អគួរតែព្យាយាមដើរប្រកបដោយភាពអត់ធ្មត់ឲ្យបានច្រើនទៅ។
ជួយសម្រួលដល់សម្ពាធឈាម
អ្នកស្រាវជ្រាវបានធ្វើការពិសោធន៍មួយទៅលើអ្នកមានជំងឺលើសសម្ពាធឈាមតិចតួចចំនួន ៨៣នាក់ ដែលតម្រូវឲ្យដើរ ១០០០០ជំហ៊ានជារៀងរាល់ថ្ងៃរយៈពេល ១២សប្តាហ៍។ ចុងបញ្ចប់នៃការសិក្សា អ្នកចូលរួមសិក្សាទាំងនោះមានការថយចុះសម្ពាធឈាម និងមានកម្លាំងក្នុងខ្លួនយ៉ាងគួរឲ្យកត់សម្គាល់។ ទោះបីជាអ្នកមិនអាចធ្វើដល់ ១០០០០ជំហ៊ានរាល់ថ្ងៃក៏ដោយ អ្នកគួរតែអាចដើររយៈពេលយ៉ាងហោចណាស់ ៦០នាទីជារៀងរាល់ថ្ងៃបានដែរដើម្បីជួយគ្រប់គ្រងសម្ពាធឈាម។
បន្ថយស្រ្តេស
ស្រ្តេសផ្លូវចិត្តគឺជាបញ្ហាមួយសម្រាប់មនុស្សគ្រប់គ្នានាពេលបច្ចុប្បន្ននេះ។ មានរឿងច្រើនណាស់ដែលអ្នកអាចធ្វើបានដើម្បីដោះស្រាយរឿងនេះ។ ការសិក្សាបានបង្ហាញថា ការដើរលឿនៗ ២០ ទៅ៣០នាទីរាល់ថ្ងៃ អាចជួយបន្ថយស្រ្តេសផ្លូវចិត្តបាន។ វាត្រូវបានគេនិយាយថា ការដើរបែបនេះមានប្រសិទ្ធភាពស្រដៀងគ្នានឹងថ្នាំរំងាប់អារម្មណ៍កម្រិតតិចតួចដែរ។
ពង្រឹងដល់សុខភាពឆ្អឹង
ការបង្កើតឆ្អឹងថ្មីឆ្លើយតបយ៉ាងល្អនៅពេលមានសម្ពាធបន្ថែមទៅលើគ្រោងឆ្អឹង។ មានន័យថា បើសិនជាអ្នកមិនធ្លាប់ដើរទេ ហើយចាប់ផ្តើមដើរវិញ ឆ្អឹងអ្នកនឹងកាន់តែរឹងមាំទៅៗដោយសារតែអ្នកកំពុងតែបន្ថែមសម្ពាធដល់គ្រោងឆ្អឹង។ ការដើរគឺជាមធ្យោបាយដ៏ល្អបំផុតដើម្បីទទួលបានប្រយោជន៍មួយនេះ។
សម្រកទម្ងន់
មធ្យោបាយមួយដែលផ្តល់អត្ថប្រយោជន៍ជាក់ស្តែងបំផុតលើការសម្រកទម្ងន់គឺការដើរជារៀងរាល់ថ្ងៃ។ បើសិនជាអ្នកជាមនុស្សដែលចូលចិត្តដើរ យកល្អគួរតែដើរពី ៣០ ទៅ ៤៥នាទីជារៀងរាល់ថ្ងៃ នោះអ្នកនឹងចាប់ផ្តើមសម្គាល់ឃើញថា ខោអាវដែលអ្នកស្លៀកចាប់ផ្តើមរលង់ជាងមុនបន្តិចហើយ៕