ជំងឺមុនអាចកើតឡើងគ្រប់កន្លែងនៃរាងកាយ ហើយវាក៏ឃើញមាននៅលើបបូរមាត់ផងដែរ។ មុននេះចង់សម្តៅទៅលើប្រភេទមុន ដែលមានផ្នែកកណ្តាលជាពណ៌ស ដែលវាកើតឡើងដោយសារតែស្ទះគល់រោម រហូតដល់រលាក។ មុននេះអាចទៅជាមានការបង្ករោគបាននៅពេលបាក់តេរីជ្រៀតចូលទៅខាងក្នុងបាន។ មុននេះនឹងកើតឡើងកាន់តែច្រើនបើសិនជាអ្នកញិចវារហូតដល់ខូចខាតស្បែក។ ការបង្ករោគអាចធ្វើឲ្យទៅជាឡើងក្រហម និងហើម។ ខាងក្រោមនេះ ខ្ញុំសូមណែនាំពីវិធីខ្លះៗដែលអាចព្យាបាលជំងឺមុនប្រភេទនេះបាន៖
ស្អំទឹកក្តៅ ឬត្រជាក់
ការស្អំទឹកត្រជាក់នៅលើបបូរមាត់ដែលកើតមុនអាចជួយបំបាត់ការហើម និងក្រហមបាន ហើយក៏ធ្វើឲ្យមិនសូវមើលឃើញដែរ។ ភាពត្រជាក់មានប្រសិទ្ធភាពបំបាត់ការឈឺចាប់។ ចូរស្អំវាមួយនាទី ចំនួនពីរដងក្នុងមួយថ្ងៃ ដើម្បីជួយបន្ថយការរលាក។ ចូរធ្វើឡើងវិញម្តងទៀតបើសិនជាចាំបាច់។ ការស្អំទឹកក្តៅមួយថ្ងៃពីរដង អាចជួយទាញជាតិប្រេង ឬកំទិចកំទីរចេញពីគល់រោមដែលស្ទះនោះបាន។ បើសិនជាមានការបង្ករោគ កំប្រេសក៏អាចជួយជប់ទឹកខ្ទុះចេញ ដែលនឹងបន្ថយការឈឺចាប់ និងក្រហមបានដែរ។
ទឹកឃ្មុំ
តាមការស្រាវជ្រាវបានឲ្យដឹងថា ទឹកឃ្មុំត្រូវបានគេរកឃើញថាមានសមត្ថភាពសម្លាប់មេរោគដែលអាចមានប្រយោជន៍ក្នុងការព្យាបាលជំងឺស្បែកជាច្រើនប្រភេទ។ ក្នុងការសិក្សាបានរកឃើញថា ទឹកឃ្មុំមានសមត្ថភាពសម្លាប់បាក់តេរីមួយចំនួនដែលធ្វើឲ្យកើតមុនបាន។ ដើម្បីប្រើទឹកឃ្មុំព្យាបាលមុនលើបបូរមាត់ យកល្អគួរតែធ្វើដូចខាងក្រោម៖
- ចូរដាក់ម្រាមដៃចូលទៅក្នុងទឹកឃ្មុំ
- ចូរយកទឹកឃ្មុំជាប់ចុងម្រាមដៃនោះទៅលាបលើមុន និងទុកវាចោល
- ចូរធ្វើបែបនេះម្តងទៀត ពីរទៅបីដងក្នុងមួយថ្ងៃ។
ប៉េងប៉ោះ
ប៉េងប៉ោះផ្ទុកទៅដោយសារធាតុ Salicylic Acid ដែលជាវិធីព្យាបាលជំងឺមុនយ៉ាងមានប្រសិទ្ធផាព និងពេញនិយម។ Salicylic Acid មាននាទីទប់ស្កាត់បាក់តេរីដែលធ្វើឲ្យកើតមុន និងបំបាត់ការស្ទះរន្ធញើស។ ចូរប្រើប្រាស់ប៉េងប៉ោះព្យាបាលមុនបបូរមាត់ដូចខាងក្រោម៖
- ចូរហាន់ប៉េងប៉ោះជាបំណែកតូចៗ ហើយតប់វាឲ្យម៉ត់
- ចូរលាបវានៅលើមុន
- ចូរលាងសម្អាតវាជាមួយទឹកក្តៅឧណ្ហៗក្រោយពីលាបរួចបាន ១០នាទី
- ចូរធ្វើបែបនេះម្តងទៀត ពីរទៅបីដងក្នុងមួយថ្ងៃ។
ថ្នាំដុសធ្មេញ
ថ្នាំដុសធ្មេញផ្ទុកទៅដោយគ្រឿងផ្សំជាច្រើនដែលត្រូវបានគេដឹងថា ជួយធ្វើឲ្យស្ងួត។ សារធាតុម៉ង់តុលដែលធ្វើឲ្យក្លិនមាត់ប្រហើ ក៏អាចផ្តល់ភាពត្រជាក់ដល់ស្បែក និងបំបាត់ការឈឺចាប់បណ្តោះអាសន្នដែរ៕