ពពែភ្នែក ឬពពែឆ្កែ គឺជារោគឆ្លងមួយនៃក្រពេញខ្លាញ់ដែលស្ថិតក្នុងត្របកភ្នែក។ ជាទូទៅជំងឺនេះនឹងបាត់ទៅវិញ ឬជាសះស្បើយឯកឯងក្នុងកំឡុងពេលមិនយូរជាង ១ ឬ ២ សប្តាហ៍ឡើយ។ (អាន ៖ ដេកមិនលក់នាំអោយឈឺច្រើន! នេះជាដំណោះស្រាយ) ប៉ុន្តែទោះជាយ៉ាងណា នៅមានវិធីព្យាបាលបែបធម្មជាតិមួយចំនួនដែលជួយឲ្យជំងឺនេះកាន់តែឆាប់ជាសះស្បើយ និងជួយកាត់បន្ថយការឈឺចាប់បានផងដែរ។ ខាងក្រោមវេបសាយសុខភាព Health.com.kh នឹងបង្ហាញឲ្យដឹងពីវិធីសាស្ត្របែបធម្មជាតិមួយចំនួនដើម្បីព្យាបាលជំងឺពពែភ្នែក ឬពពែឆ្កែ ៖

១. ស្អំកម្ដៅ

ការស្អំកម្ដៅលើពពែភ្នែក ឬពពែឆ្កែ ជួយបង្កើនល្បឿននៃការធ្លាយបែក និងការហូរខ្ទុះ។ អ្វីដែលអ្នកត្រូវធ្វើ គឺគ្រាន់តែជ្រលក់ក្រណាត់ស្អាតមួយក្នុងទឹកក្ដៅឧណ្ហៗ ហើយពូតឲ្យស្ងួតសិនសឹមដាក់ស្អំលើត្របកភ្នែក។ ទុកចោលសម្រាប់រយៈពេល ៥នាទី ឬរហូតដល់អស់ក្ដៅ សឹមដកចេញ។ ព្យាយាមធ្វើស្អំឲ្យបានពី ៣ ទៅ ៤ ដង ជាប្រចាំរហូតដល់ខ្ទុះធ្លាយ។

២. តែបៃតង

ការប្រើប្រាស់តែបៃតងព្យាបាលជំងឺពពែភ្នែក ឬពពែឆ្កែ គឺដូចនឹងការស្អំកម្ដៅដែរ។ ប៉ុន្តែអ្វីដែលខុសគ្នានោះ គឺតែបៃតងជួយកាត់បន្ថយការហើម និងឈឺចាប់។ អ្វីដែលអ្នកត្រូវធ្វើ គឺឆុងតែនៅក្នុងទឹកក្ដៅឧណ្ហ បន្ទាប់មកជ្រលក់ក្រណាត់ស្អាតចូល ហើយពូតឲ្យស្ងួតទឹកខ្លះសិន សឹមដាក់ស្អំលើត្របកភ្នែកសម្រាប់រយៈពេល ៥នាទី។ អនុវត្តន៍សារឡើងវិញឲ្យបានច្រើនដងរាល់ថ្ងៃ រហូតដល់ខ្ទុះចេញអស់។

៣. រមៀត

រមៀតមានផ្ទុកសារធាតុប្រឆាំងនឹងការរលាក។ ដូច្នេះហើយទើបការប្រើប្រាស់វាដើម្បីជូតលាងសម្អាតត្របកភ្នែកដែលទទួលរងផលប៉ះពាល់អាចជួយឲ្យឆាប់ជាសះស្បើយបាន។ អ្វីដែលអ្នកត្រូវធ្វើ គឺដាំទឹក ២ ពែងក្នុងឆ្នាំង រួចបន្ថែមរមៀត ១ ស្លាបព្រាបាយចួល។ ទុកឲ្យចុះត្រជាក់បន្តិចសិន សឹមយកស្បៃក្រណាត់ស្អាតមកច្រោះ ហើយប្រើប្រាស់ទឹករមៀតកម្ចាត់មេរោគលើត្របកភ្នែក។ អ្នកក៏គួរទទួលទានអាហារលាយជាមួយរមៀតផងដែរ ដើម្បីឲ្យឆាប់ជាពីខាងក្នុង។

៤. ប្រទាលកន្ទុយក្រពើ

អ្វីដែលអ្នកត្រូវធ្វើ គឺយកសាច់ប្រទាលកន្ទុយក្រពើបិតលើពពែឆ្កែ និងទុកចោលសម្រាប់រយៈពេល ២០ នាទីសិន សឹមលាងសម្អាតចេញជាមួយទឹកធម្មតា។ សាច់ប្រទាលកន្ទុយក្រពើជួយសម្លាប់បាក់តេរី ការពារការឆ្លងមេរោគ កាត់បន្ថយការរលាក និងជួយឲ្យឆាប់ជាសះស្បើយ។

៥. ស្លឹកត្របែក

អ្វីដែលអ្នកត្រូវធ្វើ គឺលាងស្លឹកត្របែកមួយស្លឹកឲ្យស្អាត។ បន្ទាប់មកដាក់វារុំក្នុងក្រណាត់ហើយជ្រលក់ចូលក្នុងទឹកក្ដៅ។ ទុកឲ្យក្រណាត់ចុះត្រជាក់បន្តិចសិន សឹមដាក់ស្អំលើត្របកភ្នែកដែលមានពពែឆ្កែ។ អនុវត្តន៍ ២ ដងក្នុងមួយថ្ងៃជាប្រចាំ រហូតដល់ជា។

ទំនាក់ទំនងផ្សាយពាណិជ្ជកម្មសូមទូរស័ព្ទមកលេខ 011688855
អត្ថបទទាក់ទង