យើងតែងឮគេនិយាយថា រាងកាយរបស់យើងត្រូវការទឹកចំនួន៨កែវក្នុងមួយថ្ងៃៗ មួយកែវៗមានចំណុះប្រមាណជា២២៥មីល្លីលីត្រ។
ក៏ប៉ុន្តែលោកសាស្ត្រាចារ្យ Robert A. Huggins, Ph.D. នៃសាកលវិទ្យាល័យ University of Connecticut បាននិយាយថា បរិមាណដែលយើងត្រូវការវាប្រែប្រួលទៅតាមមនុស្សម្នាក់ៗ និងទៅតាមសកម្មភាពដែលយើងបានធ្វើ(តាំងពីសកម្មភាពខាងផ្លូវភេទ រហូតដល់ការហាត់ប្រាណ) ស្ថានភាពរបស់បរិស្ថាន ការងារ អាយុ និងរបបហូបចុកថែមទៀត។ លោកសាស្ត្រាចារ្យបាននិយាយថែមទៀតថា យើងត្រូវផឹកទឹកទៅតាមការស្រេករបស់យើង និងពិនិត្យមើលបរិមាណទឹកមូត្រដែលបានបន្ទោរបង់ចេញ បានសេចក្តីថាបើនោមអស់ប៉ុនណា ផឹកវិញប៉ុននោះ។
បើចង់ផឹកទឹកឱ្យបានគ្រប់គ្រាន់នៅពេលហាត់ប្រាណ លោកសាស្ត្រាចារ្យ Huggins បានណែនាំឱ្យថ្លឹងខ្លួនសិនមុននឹងចាប់ហាត់ រួចថ្លឹងម្តងទៀតក្រោយពីហាត់ចប់។ ទម្ងន់ស្រកអស់ប៉ុនណា ត្រូវផឹកទឹកទៅវិញប៉ុននោះ។
ចុះហេតុអ្វីចាំបាច់ផឹកទឹកគ្រាន់តែឱ្យបានគ្រប់គ្រាន់?
យើងបានដឹងហើយថាការខ្សោះជាតិទឹកមិនល្អទេចំពោះសុខភាព ហើយវារឹតតែអាក្រក់ណាស់ទៅទៀតបើសិនជាខ្វះជាតិទឹកខ្លាំងពេក។ ក៏ប៉ុន្តែបើផឹកទឹកច្រើនខ្លាំងពេក វាអាចនឹងធ្វើឱ្យបាត់តុល្យភាពអេឡោកត្រូលីតក្នុងខ្លួន ដែលនឹងធ្វើឱ្យក្អួតចង្អោរ ឈឺក្បាល ជួនកាលទៅជាសន្លប់ ឬស្លាប់បានដែរ នេះបើតាមរបាយការណ៍របស់ British Journal of Sports Medicine ។
ដូច្នេះ តើត្រូវផឹកទឹកប៉ុនណាៗ សំខាន់ត្រូវស្តាប់ការទាមទាររបស់រាងកាយ គឺកាលណាស្រេក៕
