Join with Health.com.kh on Telegram

​ការស្រាវជ្រាវ​ថ្មី​មួយ​បាន​រកឃើញថា កម្រិត​វីតាមីន D ថយចុះ អាចធ្វើអោយ​ការ​សម្រាលកូន​រឹតតែ​ឈឺចាប់​។​ ​កង្វះ​វីតាមីន D គឺ​កើតមាន​ជាទូទៅ អំឡុង​ពេល​មាន​ផ្ទៃពោះ ជាពិសេស​ក្នុង​ចំណោម​ស្ត្រី​ដែល​មាន​ហានិភ័យ​ខ្ពស់ រួម​មាន​អ្នកបួស អ្នក​ដែល​ត្រូវ​នឹង​ពន្លឺព្រះអាទិត្យ​តិច​ជាដើម​។​ ​

ការស្រាវជ្រាវ​ថ្មី​មួយ​បាន​មើល​ទៅលើ​ស្ត្រី​មាន​ផ្ទៃពោះ ៩៣ នាក់ ដែល​កម្រិត​វីតាមីន D ត្រូវ​បាន​ពិនិត្យ​មុន​សម្រាលកូន និង​ដែល​បាន​ទទួល​ការចាក់​ឆ្អឹងខ្នង សម្រាប់​បន្ថយ​ការឈឺចាប់​អំឡុង​ពេល​សម្រាល​។ អ្នកស្រាវជ្រាវ​បាន​បាន​វាស់​ពី​កម្រិត​នៃ​ថ្នាំ​បំបាត់​ការឈឺចាប់​ប៉ុណ្ណា សម្រាប់​ស្ត្រី​ម្នាក់ៗ​ដែល​ត្រូវការ​អំឡុង​ពេល​សម្រាល​នោះ​។​ ​

ស្ត្រី​ដែល​មាន​កម្រិត​វីតាមីន D ទាប តម្រូវ​អោយ​ប្រើ​ថ្នាំ​បំបាត់​ការឈឺចាប់ ច្រើន​ជាង​អ្នក​ដែល​មាន​កម្រិត​វីតាមីន D ខ្ពស់​។​ ​ជារឿយៗ យើង​មាន​កម្រិត​វីតាមីន D ទាប​ជាង​ធម្មតា អំឡុង​ពេល​មាន​ផ្ទៃពោះ​។ វេជ្ជបណ្ឌិត អេ​ដ្រូវ ហ្គឺ​លឺរ (Andrew Geller) បាន​និយាយថា យើង​បាន​រកឃើញថា អ្នកជំងឺ​ដែល​មាន​កម្រិត​វីតាមីន D ទាប មាន​ការកើនឡើង​ការឈឺចាប់​អំឡុង​ពេល​សម្រាលកូន​។​

​គាត់​បាន​បន្ថែមថា ការការពារ និង​ការព្យាបាល​បញ្ហា​ថយ​ចុះ​កម្រិត​វីតាមីន D ចំពោះ​ស្ត្រី​មាន​ផ្ទៃពោះ អាច​មាន​ឥទ្ធិពល​លើ​ការថយចុះ​កម្រិត​នៃ​ការ​ឈឺពោះ​សម្រាល ចំពោះ​ស្ត្រី​ជាច្រើន​លាន​នាក់​ជា​រៀងរាល់ឆ្នាំ​។​ ​វេជ្ជបណ្ឌិត Geller បាន​សរុប​ថា អត្ថបទ​នេះ​តម្រូវ​អោយ​មើល​សារជាថ្មី និង​ការស្រាវជ្រាវ​បន្ថែម​ចាំបាច់​ត្រូវតែ​បង្កើត​ឡើង ដោយ​កំណត់​ថា​តើ យើង​អាច​ផ្តល់​ភាព​ប្រសើរ​ឡើង​ដល់​ការ​សម្រាលកូន​បាន​យ៉ាងដូចម្តេច​៕