មូលហេតុដែលនាំអោយបែកបាក់ស្នេហាគ្នាដែលគេជួបប្រទះញឹកញាប់ជាគេនោះគឺការប្រច័ណ្ឌ។ ការប្រច័ណ្ឌប្រៀបដូចជាមេរោគផ្សិតក្នុងទំនាក់ទំនងស្នេហាគ្រប់ប្រភេទអញ្ចឹង ហើយបើសិនជាមិនដោះស្រាយវាអោយបានល្អទេ វាអាចនឹងបំផ្លាញស្នេហារបស់អ្នកបាន។
ពេលខ្លះដៃគូម្ខាងនឹងព្យាយាមផ្តល់នូវភាពសំខាន់ដល់ទំនាក់ទំនងស្នេហារបស់គេ។ អ្នកខ្លះមិនបណ្តោយអោយដៃគូរខ្លួនដើរចេញនោះទេ ហើយខ្លះទៀតព្យាយាមគ្រប់គ្រងរឿងតូចតាចដូចជារឿងសម្លៀកបំពាក់របស់ដៃគូជាដើម។ ដូច្នេះតើមានអ្វីអាចដោះស្រាយការប្រច័ណ្ឌបានទៅ?
រកមើលមូលហេតុ
ការប្រច័ណ្ធច្រើនតែផ្តើមចេញពីការអសន្តិសុខរបស់ដៃគូម្ខាង។ ហេតុផលមួយចំនួនគឺថា៖ ដៃគូរបស់អ្នកយល់ថា ពួកគេមិនគួរអោយស្រឡាញ់ ឬមិនកំពុងតែត្រូវបានគេយកចិត្តទុកដាក់ដូចមុនទៀតទេ។ យកល្អគួរតែនិយាយជាមួយដៃគូ និងពិភាក្សាគ្នានូវអ្វីដែលធ្វើអោយការប្រច័ណ្ឌចាប់ផ្តើមកើតមាន និងរបៀបបំបាត់នូវអារម្មណ៍អវិជ្ជមានរបស់ពួកគេ។
ស្វែងយល់នូវបញ្ហា
មិនត្រូវគិតថា ការប្រច័ណ្ឌគឺជាសញ្ញារបស់ដៃគូអ្នកយកចិត្តទុកដាក់ខ្លាំងចំពោះអ្នកឡើយ។ ចូរជួយដៃគូអោយបានយល់ដឹងថាវាគឺជាបញ្ហាមួយ។ ការប្រច័ណ្ឌច្រើនតែជាសញ្ញាមួយនៃភាពអាត្មានិយម និងផ្តោតសំខាន់ទៅលើអ្វីដែលពួកគេគួរតែនិយាយ។ ការស្តាប់ដៃគូ និងការជម្រុញអោយគេនិយាយចេញពីបេះដូងនឹងជួយអោយអ្នកយល់ដឹងពីឬសគល់នៃបញ្ហាដែលធ្វើអោយរឿងនោះដោះស្រាយកាន់តែស្រួល។
បង្កើតលេខកូដប្រច័ណ្ឌ
នេះគឺជារឿងមួយថ្មី ហើយប្រហែលជាស្តាប់ទៅដូចជាប្លែកបន្តិចដែរ ប៉ុន្តែវាគឺជារឿងមួយដែលមានតម្លៃពេលយកទៅសាកល្បង។ ចូរយល់ព្រមនូវសញ្ញាមួយជាមួយដៃគូដែលអាចធ្វើបានគ្រប់គ្រងភាពប្រច័ណ្ឌកុំអោយក្លាយទៅជាបញ្ហាបាន។ វាអាចជាសញ្ញាកាយវិការណាមួយដែលមានតែអ្នក និងដៃគូទេដែលដឹងនោះ។ វាអាចជាសញ្ញាគ្រោះថ្នាក់មួយ និងអោយដៃគូដឹងថាពួកគេត្រូវការគាំទ្រពីអ្នក។
ចៀសវាងស្និទ្ធស្នាលជាមួយអ្នកដទៃហួសហេតុពេក
អ្នកខ្លះមានភាពរីករាយនឹងភាពប្រច័ណ្ឌរបស់ដៃគូពួកគេ និងមានចេតនាធ្វើអោយរឿងនោះកើតមានតែម្តង។ រឿងនេះប្រហែលជាជួយអោយមានតម្រូវការភ្លាមៗដើម្បីមានការយកចិត្តទុកដាក់ ប៉ុន្តែរយៈពេលយូរទៅវានឹងធ្វើអោយស្ថានភាពកាន់តែធ្ងន់ធ្ងរទៅវិញទេ។ ចូរបញ្ឈប់នូវកាយវិការស្និទ្ធស្នាលជ្រុលជាមួយអ្នកដទៃទៅ។ ចូរចៀសវាងការចែចង់ និងប្តេជ្ញាចិត្តជាមួយដៃគូ។ មិនត្រូវប្រងើយកន្តើយឬធ្វើឬកឈ្លើយជាមួយអ្នកដទៃទេ ប៉ុន្តែការដែលធ្វើចឬកស្និទ្ធស្នាលគួរតែមានដែនកំណត់ត្រឹមនាមជាមិត្តភក្តិបានហើយ។
បើកចិត្តអោយទូលាយជាមួយដៃគូ
មិនត្រូវព្យាយាមលាក់បាំងអ្វីៗទាំងអស់ពីដៃគូឡើយ។ ការលាក់បាំងគ្នាអាចធ្វើអោយសម្ពាធក្នុងទំនាក់ទំនងស្នេហាកាន់តែឆេះឡើងបាន។ ចូរបើកចិត្តអោយទូលាយជាមួយដៃគូ និងចៀសវាងការកុហកអោយបាន។ ចូរបើកចិត្តអោយទូលាយចំពោះអារម្មណ៍របស់អ្នកដើម្បីចៀសវាងការឈ្លោះគ្នា និងអ្វីដែលខុសៗគ្នា៕
