ជំងឺឬសដូងបាត ជាបញ្ហាសុខភាពទូទៅបំផុតមួយដែលកើតឡើងក្នុងចំណោមមនុស្សពេញវ័យមិនថាប្រុស ឬស្រីឡើយ។ ជំងឺនេះផ្ដល់អារម្មណ៍មិនស្រួល និងឈឺចាប់គួរឲ្យរំខាន! (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថ្វីបើមានមូលហេតុជាច្រើនពីក្រោយការកើតជាជំងឺឬសដូងបាត ប៉ុន្តែអនាម័យផ្ទាល់ខ្លួន, របបអាហារ និងរបៀបរបបនៃការរស់នៅ គឺជាហេតុបង្កចម្បងបំផុត។ អ្នកគួរដឹងថាមិនមែនគ្រប់ប្រភេទនៃឬសដូងបាតត្រូវតែទទួលការវះកាត់នោះទេ លុះត្រាតែដល់ដំណាក់កាលធ្ងន់ធ្ងរ។ ដូច្នេះមុននឹងស្ថានភាពប្រែជាធ្ងន់ធ្ងរ អ្នកគួរសាកល្បងវិធីធម្មជាតិងាយៗ តែមានប្រសិទ្ធិភាពខ្ពស់មួយចំនួនខាងក្រោមដែលវេបសាយសុខភាព Health.com.kh លើកយកមកបង្ហាញជូន ៖

១. ប្រើប្រាស់អំបិល Epsom និងគ្លីសេរ៊ីន

វិធីនេះជួយបំបាត់ការឈឺចាប់ និងហូរឈាម! អ្វីដែលអ្នកត្រូវធ្វើ គឺគ្រាន់តែលាយអំបិលចំនួន ២ ស្លាបព្រាបាយ ជាមួយនឹងគ្លីសេរ៊ីន (glycerine) ២ ស្លាបព្រាបាយ ចូលគ្នា រួចកូរឲ្យសព្វ។ បន្ទាប់មកដាក់ល្បាយចូលក្នុងក្រណាត់ស្អាតមួយ ហើយដាក់ស្អំវាលើរន្ធគូថរបស់អ្នកសម្រាប់រយៈពេលពី ២០ ទៅ ២៥ នាទី។ អនុវត្តជាប្រចាំប៉ុន្មានថ្ងៃ រហូតទទួលបានលទ្ធផល។

២. ទទួលទានអាហារសម្បូរទៅដោយជាតិសសៃខ្ពស់ជាប្រចាំ

ការទទួលទានអាហារដែលមានផ្ទុកសម្បូរទៅដោយជាសសៃខ្ពស់អាចផ្ដល់អត្ថប្រយោជន៍គួរឲ្យភ្ញាក់ផ្អើលសម្រាប់អ្នកជំងឺឬសដូងបាត ឬអ្នកកំពុងជួបប្រទះបញ្ហាទល់លាមក។ ការកាត់បន្ថយអាការៈទល់លាមក និងភាពពិបាកអំឡុងពេលបត់ជើងធំ គឺជាជំហានដំបូង ហើយសំខាន់បំផុត ដើម្បីទប់ស្កាត់ជំងឺឬសដូងបាតមិនឲ្យកាន់តែធ្ងន់ធ្ងរឡើង។ ជាតិសសៃជួយរក្សាជាតិទឹកក្នុងលាមកដែលធ្វើឲ្យវាទន់ងាយនឹងបញ្ចេញ។ ដូច្នេះដើម្បីជាការប្រសើរអ្នកជំងឺឬសដូងបាតគួរដាក់បញ្ចូលអាហារសម្បូរទៅដោយជាតិសសៃក្នុងរបបអាហារប្រចាំថ្ងៃ។

៣. ប្រេងដូង

អ្វីដែលអ្នកត្រូវធ្វើ គឺគ្រាន់តែយកប្រេងដូងសុទ្ធ ១ ស្លាបព្រាកាហ្វេ រួចលាយម្ស៉ៅរមៀត កន្លះស្លាបព្រាកាហ្វេចូល ហើយកូរឲ្យសព្វ។ បន្ទាប់មកប្រើប្រាស់សំឡីជ្រលក់លាបល្បាយលើរន្ធគូថជាការស្រេច។ អនុវត្តជាប្រចាំរហូតដល់ទទួលបានលទ្ធផលល្អប្រសើរ។

៤. ប្រទាលកន្ទុយក្រពើ

អ្វីដែលអ្នកត្រូវធ្វើ គឺគ្រាន់តែយកជែលប្រទាលកន្ទុយក្រពើស្រស់ មកលាយជាមួយម្ស៉ៅ baking soda និងប្រេងអូលីវ ចំនួន ១ ស្លាបព្រាបាយ។ លាយចូលគ្នាឲ្យសព្វ សឹមយកសំឡីមកជ្រលក់លាបលើរន្ធគូថ ហើយទុកចោលសម្រាប់រយៈពេលពី ២០ ទៅ ២៥ នាទីសិន សឹមលាងចេញជាការស្រេច។

៥. ស្អំទឹកកក

អ្វីដែលអ្នកត្រូវធ្វើ គឺគ្រាន់តែយកទឹកកកប៉ុន្មានដុំដាក់ក្នុងកញ្ចប់បិទជិត រួចរុំវានឹងក្រណាត់ស្អាតមួយ ហើយស្អំលើរន្ធគូថសម្រាប់រយៈពេលពី ១០ ទៅ ១៥ នាទីជាការស្រេច។ វិធីនេះបំបាត់ការឈឺចាប់បានឆាប់រហ័ស៕