Join with Health.com.kh on Telegram

ការ​ក្រហាយ​ទ្រូង​រ៉ាំរ៉ៃ ប្រសិនបើ​មិន​ព្យាបាល​ទេ​នោះ​, អាច​បណ្តាល​អោយ​មាន​បញ្ហា​ធ្ងន់ធ្ងរ​។ រោគសញ្ញា​នៃ​ការ​ចាល់​អាស៊ីត​ក្រពះ រួម​មាន​មាន​អារម្មណ៍​ក្រហាយ​ទ្រូង និង​ភើ​ជូរ​។ ជួនកាល​, អ្នកជំងឺ​ភ្ញាក់​ពី​គេង​អំឡុង​ពេល​យប់​ដោយសារតែ​រោគសញ្ញា​ទាំងនោះ​។ ជួប​មិន​សូវ​ជា​ញឹកញាប់​នោះទេ​, ការ​ចាល់​អាស៊ីត​ក្រពះ​អាច​បណ្តាលអោយ​ក្អួត​, ហូរឈាម ឬ​ពិបាក​លេប​។​


​រលាក​បំពង់​អាហារ​
​នៅពេល​ដែល​អាស៊ីត​ក្រពះ​មក​ប៉ះពាល់​លើ​ស្រទាប់​នៃ​បំពង់​អាហារ​ជា​ច្រើនលើក​ច្រើនសា​, វា​អាច​បណ្តាលអោយ​ប៉ះពាល់​ដែល​អាច​នាំ​អោយ​រលាក ឬ​ដំបៅ​។ ការ​រលាក​បំពង់​អាហារ​អាច​បណ្តាលអោយមាន​រោគ​សញ្ញា​មួយ​ចំនួន​ដូចជា ការ​ក្រហាយ​ទ្រូង​, ឈឺ​ទ្រូង​, ពិបាក​លេប ឬ​ហូរឈាម​។​

បំពង់​អាហារ Barrett
​បំពង់​អាហារ Barrett គឺ​ជា​ជំងឺ​មួយ​ដែល​វិវត្ត​មានចំពោះ​អ្នកជំងឺ​មួយចំនួន​ដែល​មាន​ការ​ចាល់​អាស៊ីត​ក្រពះ​រយៈពេល​យូរ​។ វា​ជា​កត្តា​ហានិភ័យ​មួយ​ចំពោះ​ជំងឺមហារីក​បំពង់​អាហារ​។​

ការខូចខាត​ពី​ការ​ចាល់​អាស៊ីត​ក្រពះ​អាច​បណ្តាល​អោយ​ផ្លាស់ប្តូរ​មិនធម្មតា​នៃ​ស្រទាប់​បំពង់​អាហារ​។ កោសិកា​ធម្មតា​ដែល​មាន​នៅក្នុង​បំពង់​អាហារ ត្រូវបាន​ជំនួស​ដោយ​ប្រភេទ​នៃ​កោសិកា​មិនធម្មតា​ដែល​មិន​ត្រូវបាន​រកឃើញ​នៅក្នុង​បំពង់​អាហារ​នោះទេ​។​

អ្នក​ដែល​ធ្លាប់​មាន​ការ​ក្រហាយ​ទ្រូង​អស់​រយៈពេល​ជាច្រើន​ឆ្នាំ អាច​មាន​ហានិភ័យ​ខ្ពស់​ចំពោះ​បំពង់​អាហារ Barrett នេះ​។ បំពង់​អាហារ Barrett ជាទូទៅ​ត្រូវបាន​គេ​ធ្វើ​រោគវិនិច្ឆ័យ​ចំពោះ​អ្នក​ដែល​មាន​អាយុ​វ័យ​កណ្តាល ឬ​មនុស្ស​ចាស់​។ វា​កើត​មាន​ជា​ញឹកញាប់​លើ​បុរស​ច្រើន​ជាង​ស្ត្រី​។​

បំពង់​អាហារ Barrett ត្រូវបាន​គេ​ធ្វើ​រោគវិនិច្ឆ័យ​ដោយ​ការឆ្លុះ​មើល​បំពង់​អាហារ​ដើម្បី​មើល​លើ​ស្រទាប់​នៃ​បំពង់​អាហារ និង​ធ្វើការ​ច្រិបសាច់​ដើម្បី​ពិនិត្យមើល​លើ​ជាលិកា​។ អ្នកឯកទេស​ជាច្រើន​ណែនាំ​អោយ​ធ្វើ​ការឆ្លុះ​នេះ​ដើម្បី​ពិនិត្យមើល​លើ​បំពង់​អាហារ Barrett ចំពោះ​អ្នក​ដែល​មាន​កត្តា​ហានិភ័យ​ដូចជា ការ​ក្រហាយ​ទ្រូង​ជា​យូរ​ឆ្នាំ (​ច្រើនជាង​១០​ឆ្នាំ​), ពូជ​ស្បែក​ស​, បុរស និង​លើស​ទម្ងន់​។ ការតាមដាន​មើល​បំពង់​អាហារ Barrett មិន​ត្រូវបាន​គេ​ណែនាំ​ចំពោះ​មនុស្ស​ទូទៅ​ដែល​មាន​បញ្ហា​ក្រហាយ​ទ្រូង​ម្តងម្កាល​នោះទេ​។​

ទោះបីជា​មិន​កើត​ជា​ញឹកញាប់​ក៏ដោយ​, ប៉ុន្តែ​បំពង់​អាហារ Barrett អាច​នាំអោយ​កើត​មាន​ជំងឺមហារីក​ចំពោះ​មនុស្ស​មួយចំនួន​។ ម្នាក់​ក្នុងចំនោម​មនុស្ស​៣០០​នាក់​ដែល​មាន​បំពង់​អាហារ Barrett នឹង​វិវត្ត​ទៅ​ជា​ជំងឺ​មហារីក​បំព​ង់​អាហារ​ក្នុង​មួយឆ្នាំៗ​។ ដោយសារ​តែ​ហានិភ័យ​នៃ​ជំងឺមហារីក​, អ្នក​ដែល​មាន​បំពង់​អាហារ Barrett ជាធម្មតា​ត្រូវបាន​គេ​ពិនិត្យ​ជា​ទៀងទាត់​ដោយ​ការឆ្លុះ​នោះ​។​

គោលបំនង​នៃ​ការព្យាបាល​បំពង់​អាហារ Barrett គឺ​ដើម្បី​ការពារ​ការខូចខាត​នៅ​ថ្ងៃ​មុខ​ដោយ​បញ្ឈប់​ការ​ចាល់​អាស៊ីត​ក្រពះ​។ ថ្នាំ Proton pump inhibitor ដូចជា Omeprazol, Nexium, Protonix, Prevacid, Prilosec និង Aciphex គឺជា​ថ្នាំ​សម្រាប់​ព្យាបាល​បញ្ហា​នេះ​។ ថ្នាំ​ទាំង​នេះ​បន្ថយ​បរិមាណ​អាស៊ី​ត​ដែល​ត្រូវបាន​ផលិត​ដោយ​ក្រពះ​។ ចំពោះ​អ្នកជំងឺ​មួយចំនួន​, ការវះកាត់​ដើម្បី​ពង្រឹង​ទ្វារ​សាច់ដុំ​ចន្លោះ​បំពង់​អាហារ និង​ក្រពះ​អាច​ជា​ជម្រើស​មួយ​ដើម្បី​ការពារ​ការ​ចាល់​នោះ​ផង​ដែរ​។​
 

​គ្រូពេទ្យ​ក៏​កំពុងតែ​ប្រើប្រាស់​បច្ចេកទេស​ថ្មី​ដែល​គេ​ហៅថា កាត់​កោសិកា​មិនធម្មតា​ចោល​។ បច្ចេកទេស​នេះ​ជាធម្មតា​ត្រូវបានធ្វើ​លើ​អ្នកជំងឺ​ដែល​មាន​ស្ថានភាព​ពិសេស​ដូចជា អ្នក​ដែល​មាន​ហានិភ័យ​ខ្ពស់​នៃ​ការវិវត្ត​ទៅជា​ជំងឺមហារីក​បំពង់​អាហារ ឬ​អ្នក​ដែល​មិន​អាច​ទ្រទ្រង់​នឹង​ការវះកាត់​ធំៗ​បាន​។​

ការរួម​តូច​
​ជួនកាល ស្រទាប់​បំពង់​អាហារ​ដែល​ត្រូវបាន​ខូចខាត​ក្លាយ​ជា​សន្លាក ដែល​បណ្តាល​អោយ​រួម​តូច​នៃ​បំពង់​អាហារ​។ ការរួម​តូច​នេះ​អាច​រំខាន​ដល់​ការ​ញ៉ាំ ឬ​ផឹកទឹក​ដោយ​ការពារ​អាហារ និង​ទឹក​មិន​អាច​ទៅដល់​ក្រពះ​។ ការរួម​តូច​អាច​ត្រូវបាន​ព្យាបាល​ដោយ​ការពង្រីក​។​

ជំងឺមហារីក​បំពង់​អាហារ​
​ជំងឺមហារីក​ដែល​ចាប់ផ្តើម​ពី​បំពង់​អាហារ​ត្រូវបាន​គេ​ចែកជា​២​ប្រភេទ​ធំៗ​៖
– Squamous cell carcinoma : ប្រភេទ​នៃ​ជំងឺមហារីក​នេះ​ចាប់ផ្តើម​ចំពោះ​កោសិកា​ពិសេស​ដែល​ត្រូវបាន​គេ​ស្គាល់​ថា កោសិកា Squamous ដែល​មាន​លើ​បំពង់​អាហារ​។ ជំងឺមហារីក​នេះ​ជាធម្មតា​ប៉ះពាល់​លើ​ផ្នែក​ខាងលើ និង​កណ្តាល​នៃ​បំពង់​អាហារ​។ កត្តា​ហានិភ័យ​រួមមាន ការជក់បារី

និង​ការ​ផឹកស្រា​រ៉ាំរ៉ៃ​
– Adenocarcinoma : ប្រភេទ​នៃ​ជំងឺមហារីក​នេះ​ជា​ធម្មតា​បាន​វិវត្តនៅ​ផ្នែក​ខាងក្រោម​នៃ​បំពង់​អាហារ​។ វា​អាច​កើតចេញ​ពី​បំពង់​អាហារ Barrett
​ជំងឺមហារីក​បំពង់​អាហារ​ក្នុងដំណាក់កាល​ដំបូង​ជារឿយៗ​មិន​មាន​រោគសញ្ញា​នោះទេ​។ ការពិបាក​លេប គឺជា​រោគសញ្ញា​ទូទៅ​បំផុត​នៃ​ជំងឺមហារីក​បំពង់​អាហារ​។ នៅពេលដែល​ជំងឺមហារីក​បាន​រីក​ធំ​, វា​ធ្វើអោយ​រួម​តូច​នៃ​បំពង់​អាហារ​ដែល​នេះ​បង្ក​អោយ​ពិបាក​លេប និង​ឈឺ​៕