Join with Health.com.kh on Telegram

រាជធានី​ភ្នំពេញ ៖ រដ្ឋបាល​រាជធានី​ភ្នំពេញ​បាន​ប្រកាស​នៅ​ថ្ងៃ​ទី​១០ ខែកុម្ភៈ​នេះ សូម​ក្រើនរំលឹក​ដល់​ប្រជាពលរដ្ឋ​ពី​ការ​អនុវត្ត​វិធានការ​សុខាភិបាល ដើម្បី​ទប់ស្កាត់​ការ​ចម្លងជំងឺ​កូ​វី​ដ​១៩ ពិសេស​ប្រភេទ​អូ​មី​ក្រុង ក្នុងភូមិ​សាស្ត្រ​រាជធានី​ភ្នំពេញ និង​ណែនាំ​ឲ្យ​រៀបចំ​កៅអីអង្គុយ​មាន​គម្លាត​សុវត្ថិភាព ដោយ​មិន​លើស​ពី ០៧​នាក់​ក្នុង​មួយ​តុ ។

រដ្ឋបាល​រាជធានី​ភ្នំពេញ បាន​បញ្ជាក់​ទៀត​ថា ចំពោះ​ទីតាំង​ដែល​ប្រមូលផ្ដុំ​មនុស្ស​ច្រើន​ជា​ពិសេស កន្លែង​រៀបចំ​ពិធី​មង្គលការ ភោជនីយដ្ឋាន ពិធីបុណ្យ​ទាន កន្លែង​កម្សាន្ត និង​ការ​ជួបជុំ ប្រមូលផ្ដុំ​ផ្សេង​ៗ ដែល​មាន​មនុស្ស​ច្រើន ត្រូវ​ណែនាំ​ឲ្យ​រៀបចំ​កៅអីអង្គុយ​មាន​គម្លាត​សុវត្ថិភាព ដោយ​មិន​លើស​ពី​៧​នាក់ ក្នុង​មួយ​តុ និង​ត្រូវ​ប្រកាន់ខ្ជាប់​នូវ​វិធានការ​សុខាភិបាល​ក្នុង​ការ​ទប់ស្កាត់​ការ​ឆ្លង​រីក​រាលដាល​នៃ​ជំងឺ​កូ​វី​ដ​-១៩ ជា​ពិសេស​អូ​មី​ក្រុង​តែ​ម្តង ។

សូម​បងប្អូន​ទាំងអស់​គ្នា ត្រូវ​បាញ់​អាល់កុល ឬ ជែ​ល​លាងដៃ វាស់​កំ​ដៅ រក្សា​គម្លាត​សុវត្ថិភាព និង​ពាក់​ម៉ាស ហើយ​ការ​ដោះ​ម៉ាស​ចេញ​ក្នុងអំឡុងពេល​ទទួលទាន​អាហារ ត្រូវ​ទុកដាក់​ឲ្យ​បាន​ត្រឹមត្រូវ និង​ត្រូវ​ពាក់​ម៉ាស​វិញ​នៅ​ពេល​ងើប​ចេញពី​តុ ។

លើស​ពី​នេះ​ទៀត ពិនិត្យ​ប័ណ្ណ​ចាក់​វ៉ាក់សាំង បើ​បុគ្គល​ណាមួយ​មិន​បាន​ចាក់​វ៉ាក់សាំង ឬ​ហួស​រយៈពេល​៤​ខែ មិន​បាន​ចាក់​វ៉ាក់សាំង​ដូ​ស​ទី​៣ ឬ​ដូ​ស​ជំរុញ ដោយ​គ្មាន​មូលហេតុ​ត្រឹមត្រូវ បុគ្គល​នោះ​មិន​អនុញ្ញាត​ឲ្យ​ចូល​ទីតាំង ឬ​កន្លែង​ប្រារព្ធ​កម្ម​ពិធី​នោះ​ទេ ។

ជាក់ស្តែង​ថ្ងៃនេះ ក្រសួងសុខាភិបាល​បាន​ប្រកាស​រក​ឃើញ​អ្នក​ឆ្លង​អូ​មី​ក្រុង​រហូត​ដល់​២៦២​នាក់ ក្នុង​នោះ​ឆ្លង​សហគមន៍​២២៦​នាក់​បន្ថែម​ទៀត ដូច្នេះ​ហើយ សូម​បងប្អូន​អនុវត្ត​វិធានការ ៣​កុំ និង​៣​ការពារ​ឲ្យ​បាន​ល្អ ៕