Join with Health.com.kh on Telegram

ខេត្តក្រចេះ ៖ សម្តេច​តេ​ជោ ហ៊ុន សែន នាយក​រដ្ឋមន្ត្រី​នៃ​កម្ពុជា​នឹង​ជួប​ក្មួយ​ៗ ចៅ​ៗ​ប្រលង​បាក់​ឌុ​ប​បាន​និទ្ទេស A ជាង​១​ពាន់​នាក់ នៅ​ថ្ងៃ​ទី​២៨ ខែកុម្ភៈ ខាង​មុខ​នេះ នៅ​រាជធានី​ភ្នំពេញ ។ នេះ​បើ​យោង​តាម​ផេ​ក​សម្តេច ។

នាយក​រដ្ឋមន្ត្រី​នៃ​កម្ពុជា​បាន​ថ្លែង​ក្នុង​ពិធី​សម្ពោធ​ដាក់​ឱ្យ​ប្រើប្រាស់​ជា​ផ្លូវការ​កំណាត់​ផ្លូវជាតិ​លេខ​៧ ពី​ចំណុច​រង្វង់​មូល​ខ្លា​ស្ទុះ ក្រុង​ក្រចេះ ទៅ​ភូមិ​រមាត ឃុំ​អូរ​គ្រៀង ស្រុក​សំបូរ ខេត្តក្រចេះ ប្រវែង​ប្រមាណ ៩៣.៥៦​គីឡូម៉ែត្រ ដែល​សាងសង់​ក្រោម​ជំនួយ​ឥត​សំណង​របស់​រដ្ឋាភិបាល​ចិន ក្នុង​ទឹកប្រាក់​ប្រមាណ​ជាង ៣៣​លាន​ដុល្លារ​អា​មេ​រិ​ក​។

នៅ​ថ្ងៃនេះ សម្តេច​តេ​ជោ បាន​មាន​ប្រសាសន៍​អបអរសាទរ​ចំពោះ​ក្មួយ​ៗ ចៅ​ៗ​សិស្ស​និ​ន្ទេ​ស A ទាំងអស់ ដែល​ទើបបាន​ប្រឡង​ជាប់​មធ្យមសិក្សា​ទុតិយភូមិ ដែល​ឆ្នាំ​នេះ​មាន​សិស្ស​និ​ន្ទេ​ស A ជិត​២​ពាន់​នាក់ ។

សម្តេច​តេ​ជោ​ថ្លែង​ថា ទោះបីជា​មានការ​សិក្សា​តាម​ប្រព័ន្ធ​អន​ឡាញ​យ៉ាងណា​ក៏​ដោយ​ក៏​ក្មួយ​ៗ ចៅ​ៗ បាន​ខិតខំ​ប្រឹងប្រែង​រៀនសូត្រ រហូត​ទទួល​បាន​លទ្ធផល​ល្អជា​ច្រើន​នាក់ ។ សម្តេច​បាន​ថ្លែង​ទៀត​ថា នៅ​ថ្ងៃ​ទី​២៨ ខែកុម្ភៈ​ខាង​មុខ​នេះ សម្តេច​នឹង​ជួប​ជាមួយ​ក្មួយ​ៗ ចៅ​ៗ សិស្ស​និ​ន្ទេ​ស A ជាង​១​ពាន់​នាក់​នៅ​ភ្នំពេញ ដើម្បី​ជា​ការ​លើកទឹកចិត្ត​ចំពោះ​ការ​ខិតខំ​ប្រឹងប្រែង​រៀនសូត្រ​របស់​ក្មួយ​ៗ ចៅ​ៗ​ទាំងអស់​។

សូម​រំលឹក​ថា ៖ សិស្ស​ជាប់​និ​ន្ទេ​ស A រហូត​ដល់​ទៅ ១៧៥៣ នាក់​នៅ​ក្នុង​ឆ្នាំ​សិក្សា​២០២១ គ្រប់​រាជធានី ខេត្ត ៕