ភាពស្ត្រេសខ្លាំង និងសឹងតែជាប្រចាំនៅកន្លែងធ្វើការអាចជះផលប៉ះពាល់គួរឱ្យព្រួយបារម្ភចំពោះសុខភាពរាងកាយ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីបញ្ហាសុខភាពដែលអាចលេចឡើងដោយសារភាពស្ត្រេសនៅកន្លែងធ្វើការ ៖
១. ជំងឺបេះដូង
វាធម្មតាណាស់ដែលកម្រិតនៃសម្ពាធឈាមនឹងកើនឡើងខ្ពស់ប្រសិនបើអ្នកនឿយហត់, ថប់បារម្ភ, ខឹង ឬសូម្បីតែរំភើប។ ទោះជាយ៉ាងណាសម្ពាធឈាមនឹងធ្លាក់ចុះមកត្រឹមកម្រិតធម្មតាដូចដើមនៅពេលកត្តាទាំងប៉ុន្មានខាងលើបាត់ទៅវិញ។ ប៉ុន្តែវាខុសគ្នាប្រសិនបើអ្នកតែងជួបប្រទះនូវភាពតានតឹងក្នុងអារម្មណ៍ ឬស្ត្រេសជាប់ជានិច្ច ខណៈដែលសម្ពាធឈាមអាចនឹងមិនត្រឡប់មកក្នុងកម្រិតប្រក្រតីមានសុខភាពល្អឡើយ។ នេះហៅថា ជំងឺលើសសម្ពាធឈាម ដែលជាកត្តាហានិភ័យនៃបញ្ហាសុខភាពជាច្រើនរួមបញ្ចូលទាំងជំងឺបេះដូង។ បន្ថែមពីនេះភាពស្ត្រេសជាមួយនឹងការងារ ឬកន្លែងធ្វើការក៏អាចបង្កើបកម្រិតនៃកូឡេស្តេរ៉ូលក្នុងឈាមដែលជាកត្តាចម្បងមួយទៀតនៃជំងឺបេះដូង។
២. ជំងឺទឹកនោមផ្អែមប្រភេទទី ២
ក្រៅពីសម្ពាធឈាមនិងកម្រិតនៃកូឡេស្តេរ៉ូលមិនល្អហើយនោះ ភាពស្ត្រេសខ្លាំងពេក ឬលើសកម្រិតនៅកន្លែងធ្វើការក៏អាចបណ្ដាលឱ្យកម្រិតនៃជាតិស្ករក្នុងឈាមកើនឡើងផងដែរ។ ភាគច្រើននៃពួកយើងសុទ្ធតែដឹងហើយថា កម្រិតនៃជាតិស្ករក្នុងឈាមឡើងខ្ពស់អាចបង្កើនហានិភ័យនៃជំងឺទឹកនោមផ្អែមគួរឱ្យបារម្ភ។ បន្ថែមពីនេះការគ្រប់គ្រងកម្រិតនៃជាតិស្ករក្នុងឈាមមិនបានត្រឹមត្រូវអាចបង្កបញ្ហាសុខភាពជាច្រើនរួមមានគាំងបេះដូង, ដាច់សសៃឈាមក្នុងខួរក្បាល, ខូចខាតប្រព័ន្ធប្រសាទ, ខ្សោយក្រលៀន, ខ្សោយការមើលឃើញ, របួសយូរជាសះស្បើយ និងអាចឈាមដល់កាត់ដៃ ឬជើងជាដើម។
៣. ប្រព័ន្ធភាពស៊ាំរាងកាយចុះខ្សោយ
លំហូរឈាមនឹងពោរពេញទៅដោយអ័រម៉ូនស្ត្រេស corticosteroid នៅពេលអ្នកស្ត្រេសខ្លាំង។ សម្រាប់រយៈពេលយូរទៅវាអាចជាអ្វីមួយដែលអាចនាំឱ្យប្រព័ន្ធភាពស៊ាំរាងកាយចុះខ្សោយដែលបង្កើនហានិភ័យនៃជំងឺជាច្រើន។
៤. ជំងឺគេងមិនលក់
ប្រសិនអ្នកគិតថាភាពនឿយហត់ពេញមួយថ្ងៃអាចជួយឱ្យអ្នកគេងឆាប់លក់បានស្កប់នៅពេលគ្រាន់តែដាក់ក្បាលលើខ្នើយនោះ ចូរគិតម្ដងទៀត។ ភាពស្ត្រេសអាចជាមូលហេតុមួយនាំឱ្យអ្នកគេងមិនលក់នៅពេលយប់។ ទោះបីជាអ្នកអាចបិទភ្នែកបានខ្លះពីយប់ក៏ដោយ ក៏ព្រឹកឡើងអាចក្រោកមកជាមួយនឹងអារម្មណ៍អស់កម្លាំងនៅឡើយដែរ ខណៈដែលស្ត្រេសកាត់បន្ថយគុណភាពនៃការគេង។
ការណែនាំ ៖ ប្រសិនបើអ្នកមានបន្ទុកការងារច្រើនហួសនឹងទ្រាំបានដែលនាំឱ្យស្ត្រេសសឹងតែគ្រប់ពេល, ចូរសាកល្បងបង្ហាញប្រាប់ដល់ប្រធានរបស់អ្នកឱ្យយោគយល់ខ្លះដើម្បីគាត់អាចបន្ថយទំហំការងារ ឬផ្ដល់ច្បាប់សម្រាកប៉ុន្មានថ្ងៃ។ ប៉ុន្តែពេលខ្លះអ្នកក៏គួរស្វែងរកវិធីផ្សេងរួមមានការហាត់យូហ្កា, ការធ្វើលំហាត់ប្រាណ, ទទួលការម៉ាស្សា ឬការងូតទឹកក្ដៅឧណ្ហៗ ដើម្បីកាត់បន្ថយកម្រិតនៃភាពស្ត្រេសបន្ទាប់ពីចេញពីធ្វើការផងដែរ។
កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕