ខាងក្រោមនេះ យើងខ្ញុំនឹងបង្ហាញអ្នកពីរឿងដែលអ្នកមិនគួរធ្វើក្នុងថ្ងៃចូលឆ្នាំចិនថ្ងៃទី១។ តើមានអ្វីខ្លះទៅ?
- ក្នុងថ្ងៃទី១នៃចូលឆ្នាំចិន អ្នកមិនអាចឈ្លោះគ្នា ឬវៃកូនឡើយ ព្រោះអាចបណ្តេញសំណាងល្អពេញមួយឆ្នាំរបស់អ្នកចេញទៅក្រៅផ្ទះទាំងអស់តែម្តង។
- អ្នកមិនអាចបោសផ្ទះក្នុងថ្ងៃទី១នៃចូលឆ្នាំចិនឡើយ ព្រោះអាចបោសលាភសំណាងរបស់អ្នកចេញក្រៅអស់បាន។
- អ្នកក៏មិនអាចពិសារបបរក្នុងថ្ងៃទី១នៃចូលឆ្នាំចិនដែរ ព្រោះវាអាចបង្អាក់មិនឲ្យទ្រព្យចូលមកក្នុងផ្ទះរបស់អ្នកពេញមួយឆ្នាំ។
- អ្នកមិនអាចសម្លាប់សត្វក្នុងថ្ងៃនោះដែរ ព្រោះជាថ្ងៃសំខាន់ណាស់ក្នុងពេញមួយឆ្នាំ។ បើអ្នកល្មើស នោះសំណាងអាក្រក់នឹងអាចចូលមកក្នុងផ្ទះរបស់អ្នកបាន។
- ក្នុងថ្ងៃដំបូងនៃចូលឆ្នាំចិន អ្នកមិនអាចទៅទារលុយនរណាឡើយ ព្រោះមិនត្រឹមតែនាំសំណាងអាក្រក់ដល់អ្នកដទៃទេ ថែមទាំងអាចនាំរឿងមិនល្អមកគ្រួសារអ្នកផងដែរ។
- មិនត្រឹមតែអ្នកមិនអាចទៅទារលុយអ្នកដទៃទេ អ្នកក៏មិនអាចទៅខ្ចីលុយ ឬជំពាក់លុយនរណាដែរ ព្រោះសុទ្ធតែជារឿងដែលមិនល្អចំពោះអ្នក។
- ក្នុងថ្ងៃដំបូងនៃចូលឆ្នាំចិន អ្នកមិនគួរធ្វើឲ្យចានបែក ឬរបស់ផ្សេងៗបែកក្នុងផ្ទះនោះទេ ព្រោះអាចនាំរឿងមិនល្អមកដល់គ្រួសារអ្នកបានក្នុងឆ្នាំនេះ។
- ចំពោះកូនស្រីដែលរៀបការទៅខាងស្វាមី មិនគួរមកផ្ទះម្តាយខ្លួនក្នុងថ្ងៃទី១នេះឡើយ ព្រោះអាចនាំយកទ្រព្យ និងលាភពីផ្ទះម្តាយបង្កើតទៅអស់បាន។
- ក្នុងថ្ងៃចូលឆ្នាំចិននេះ ជាពិសេសថ្ងៃទី១តែម្តង មិនថាអ្នកនិយាយលេង ឬនិយាយមែនទេ ពាក្យមិនល្អទាំងឡាយគួរតែទុកក្នុងមាត់ទាំងអស់ មិនគួរនិយាយចេញមកសូម្បីតែមួយម៉ាត់ឡើយ ទើបមិនបណ្តេញលាភក្នុងផ្ទះអ្នកចេញអស់។
- អាំងប៉ាវដែលអ្នកឲ្យអ្នកដទៃ មិនគួរប្រើជាលេខសេសទេ ត្រូវតែជាលេខគូ ហើយចៀសពីលេខ៤ ព្រោះជាលេខដែលមិនល្អនោះទេ៕