ការមករដូវច្រើនខ្លាំងកំឡុងពេលរដូវប្រចាំខែអាចធ្វើឱ្យអ្នកមានអារម្មណ៍មិនស្រួល និងពិបាកក្នុងការបំពេញភារកិច្ចប្រចាំថ្ងៃ។ ក្រៅពីការលេបថ្នាំដើម្បីបន្ថយឈាមរដូវ, អ្នកក៏អាចទាញយកអត្ថប្រយោជន៍ពីរូបមន្តបែបធម្មជាតិមួយចំនួនផងដែរដើម្បីទប់ទល់បញ្ហាលើ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តធម្មជាតិព្យាបាលបញ្ហាមករដូវច្រើនៗ ៖
១. ទឹកខ្មេះផ្លែប៉ោម
អាចរកទិញបាននៅតាមបណ្ដាផ្សារទំនើប។ អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោមឆៅពី ១ ទៅ ២ស្លាបព្រាបាយក្នុងទឹកក្ដៅឧណ្ហៗ ១ពែង។ កូរឱ្យសព្វ សឹមទទួលទានឱ្យបាន ៣ដងក្នុងមួយថ្ងៃដើម្បីបន្ថយការហូរឈាម។
២. ស្អំត្រជាក់
សីតុណ្ហភាពត្រជាក់អាចរឹតបន្តឹងលំហូរឈាមទៅកាន់ផ្នែកខាងក្រោមនៃពោះ ហើយកាត់បន្ថយការហូរឈាមច្រើនខ្លាំងដែលអ្នកកំពុងជួបប្រទះ។ វាក៏ជួយបន្ថយអាការៈឈឺចាប់បានផងដែរ។ អ្វីដែលអ្នកត្រូវធ្វើ គឺគ្រាន់តែរុំទឹកកកប៉ុន្មានដុំក្នុងកន្សែង ឬក្រណាត់ស្អាតមួយ រួចដាក់ស្អំលើផ្នែកខាងក្រោមនៃពោះសម្រាប់រយៈពេលពី ២ ទៅ ៣នាទី។
៣. ម៉ាញ៉េស្យូម
កង្វះម៉ាញ៉េស្យូមអាចជាមូលហេតុមួយនាំឱ្យអ្នកមានបញ្ហាមករដូវច្រើនខ្លាំងកំឡុងពេលរដូវប្រចាំខែ។ នេះមានន័យថាអ្នកចាំបាច់ត្រូវបង្កើនការទទួលទានអាហារសម្បូរជាតិម៉ាញ៉េស្យូមដើម្បីគ្រប់គ្រងអ័រម៉ូន។ ផ្លែបឺរ, គ្រាប់ធញ្ញជាតិ, សូកូឡាខ្មៅ និងសូម្បីតែគ្រាប់ពូជដូចជាគ្រាប់ឪឡឹក, គ្រាបល្ពៅ គឺសុទ្ធតែមានផ្ទុកសម្បូរដោយម៉ាញ៉េស្យូម។ ប្រសិនបើអ្នកកំពុងគិតដល់ការប្រើប្រាស់ថ្នាំគ្រាប់ម៉ាញ៉េស្យូម ចាំបាច់ត្រូវតែពិគ្រោះយោបល់ជាមួយគ្រពេទ្យជាមុនសិន។
៤. អាហារសម្បូរជាតិដែក
ក្រៅពីម៉ាញ៉េស្យូមអ្នកក៏ចាំបាច់ត្រូវទទួលទានអាហារសម្បូរជាតិដែកឱ្យបានច្រើនគ្រប់គ្រាន់ផងដែរដើម្បីគ្រប់គ្រងការហូរឈាម។ ជាតិដែកថែមទាំងជួយទប់ស្កាត់បញ្ហានៃជំងឺខ្វះគ្រាប់ឈាមក្រហមដោយសារកង្វះជាតិដែកថែមទៀតផង។ បន្លែបៃតងចាស់, ថ្លើមសត្វ, ផ្នែកពណ៌លឿងនៃស៊ុត និងសូម្បីតែសាច់ក្រហម គឺសុទ្ធតែមានផ្ទុកជាតិដែកខ្ពស់។
កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕