ថាតើវីតាមីនអ្វីខ្លះល្អចំពោះស្បែកជួយឱ្យស្រស់ស្អាត? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីវីតាមីន ៤ប្រភេទដែលស្បែកត្រូវការ ៖
១. វីតាមីន A
ប្រសិនបើអ្នកសម្គាល់ឃើញថា ស្បែកហាក់ដូជជាស្ងួតនិងរបក, រាងកាយប្រហែលជាកំពុងខ្វះវីតាមីន A ហើយ។ ជាពិសេសប្រសិនបើអ្នកឧស្សាហ៍ឡើងមុន ឬកំពុងជួបប្រទះបញ្ហាមុន អ្នកចាំបាច់គួរបង្កើនការទទួលទានអាហារដែលមានផ្ទុកសម្បូរដោយវីតាមីននេះ។ វីតាមីន A ចាំបាច់ណាស់សម្រាប់ស្បែកមានសុខភាពល្អ ដោយវាជួយដល់ការបង្កើតជាលិកាឡើងវិញ និងពន្លឿនភាពជាសះស្បើយនៅពេលស្បែករងរបួស។ អាហារដែលជាប្រភពដ៏ប្រសើរបំផុយនៃវីតាមីនរួមមានស៊ុត, ល្ពៅ, ទឹកដោះគោ, ការ៉ុត, បន្លែបៃតង និងថ្លើមសត្វជាដើម។
២. វីតាមីន B
កុំភ្លេចរួមបញ្ចូលអាហារដែលមានផ្ទុកវីតាមីនក្រុម B ក្នុងរបបអាហារប្រចាំថ្ងៃ ប្រសិនបើអ្នកចង់ឱ្យស្បែកមានសុខភាពល្អ។ ជាឧទាហរណ៍ វីតាមីន B1 ជម្រុញចរន្តឈាមរត់ក្នុងរាងកាយដែលនេះនាំឱ្យស្បែកមានពន្លឺបែបធម្មជាតិ។ គ្រាប់ធញ្ញជាតិ និងផ្នែកពណ៌លឿងជាប្រភពដ៏ប្រសើរនៃវីតាមីននេះ។ វីតាមីន B3 មានផ្ទុកសម្បូរដោយសារធាតុ Niacin ដែលជួយរាងកាយ រួមទាំងស្បែកឱ្យទទួលបាននូវបរិមាណអុកស៊ីសែនខ្ពស់។ ជាលទ្ធផលអាចទប់ស្កាត់បញ្ហាមុន ក៏ដូចជាស្ថានភាពស្បែកផ្សេងទៀត។ ប្រូខូលី, ប៉េងប៉ោះ និងការ៉ុតជាប្រភពដ៏ប្រសើរនៃវីតាមីននេះ។
៣. វីតាមីន C
វីតាមីន C ក៏ជាសារធាតុចិញ្ចឹមដ៏ចាំបាច់មួយប្រភេទទៀតសម្រាប់ស្បែកដែរ។ វាផ្ដល់នូវសារធាតុប្រឆាំងអុកស៊ីតកម្មដែលជួយរក្សានិងគ្រប់គ្រងវត្តមាននៃរ៉ាឌីកាល់សេរីក្នុងរាងកាយ។ រ៉ាឌីកាល់សេរី គឺជាម៉ូលេគុលដែលអាចបង្កបញ្ហាសុខភាពជាច្រើន រួមបញ្ចូលទាំងបញ្ហាចាស់មុនវ័យផងដែរ។ បន្ថែមពីនេះវីតាមីន C ក៏ជួយជម្រុញដល់ការផលិតកូឡាជែនឱ្យមានលក្ខណៈកាន់តែប្រសើរឡើង។ កូឡាជែនជាប្រូតេអ៊ីនមួយប្រភេទទទួលខុសត្រូវសម្រាប់ភាពតឹងណែននៃស្បែក។ ផ្លែឈើភាគច្រើនមានផ្ទុកសម្បូរដោយវីតាមីន C។ ប៉េងប៉ោះ, ត្រសក់, ផ្កាខាត់ណា និងប្រូខូលីក៏ជាប្រភពដ៏ប្រសើរនៃវីតាមីន C ដែរ។
៤. វីតាមីន E
វីតាមីន E ក៏ជាប្រភេទនៃវីតាមីនល្បីមួយសម្រាប់សុខភាពស្បែកគួរឱ្យកត់សម្គាល់។ មិនខុសពីវីតាមិន C ឡើយ វាក៏ជាសារធាតុប្រឆាំងអុកស៊ីតកម្មសំខាន់មួយក្នុងរាងកាយជួយកម្ចាត់រ៉ាឌីកាល់សេរីផងដែរ។ ជាលទ្ធផលទប់ស្កាត់បញ្ហាចាស់ជាងវ័យ, បំបាត់ស្នាមសង្វារ, ស្នាមខ្សែ និងស្នាមជ្រីវជ្រួញ។ ប្រេងអូលីវ, សណ្ដែកដី, ស្រូវសាឡី, បន្លែបៃតង និងគ្រាប់អាល់ម៉ុនជាប្រភពដ៏ប្រសើរបំផុតនៃវីតាមីន E។
កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕