ការវិលមុខអាចជាអារម្មណ៍មួយ ឬរោគសញ្ញាមួយនៃ ការបាត់បង់ លំនឹងធ្ងន់ធ្ងរ ដែលធ្វើអោយមុខងារសាមញ្ញ មួយចំនួនមិនអាច ប្រព្រឹត្តទៅបានដូចពេលធម្មតា។ ប្រហែលពាក់កណ្តាលនៃមនុស្សពេញវ័យទាំងអស់នឹងមានរយៈពេលនៃការវិលមុខ ក្នុងកម្រិតធ្ងន់ធ្ងរណាមួយ ដែលអាចត្រូវបានបញ្ចូនទៅកាន់មន្ទីរពេទ្យ។
ការវិលមុខជាធម្មតាសំដៅទៅលើអារម្មណ៍ជាក់លាក់បី ៖
- ខ្យល់គ ៖ ប្រភេទមួយនៃការវិលមុខត្រូវបានពិពណ៌នា ថាជាការមានអារម្មណ៍ងងឹតមុខ។
- បាត់បង់លំនឹង៖ ប្រភេទដទៃទៀតនៃការវិលមុខត្រូវបានសំគាល់ដោយការមានអារម្មណ៍ញ័រលើជើង
- ការវិលមុខៈ អ្នកមានអារម្មណ៍ថាពិភពលោកកំពុងតែវិលជុំវិញអ្នក ឬអ្នកមានអារម្មណ៍ថាកំពុងតែវិល។
ការពិពណ៌នានៃការវិលមុខនឹងធ្វើអោយគ្រូពេទ្យងាយស្រួលធ្វើរោគវិនិច្ឆ័យពីមូលហេតុ និងព្យាបាលវា។
មូលហេតុ
មួលហេតុនៃការវិលមុខគឺមានភាពផ្សេងៗពីគ្នាទៅតាមរោគសញ្ញារបស់វា។ ការវិលមុខអាចជាលទ្ធផល មកពីបញ្ហាអ្វីមួយ។ ឬវាអាចត្រូវបានបង្កឡើងដោយបញ្ហានៃផលវិបាករ៉ាំរ៉ៃជាមួយនឹងការរក្សាលំនឹង នៅក្នុងត្រចៀករបស់អ្នក។ ការវិលមុខក៏ជារឿងមួយកម្រកើតមានផងដែរ ប៉ុន្តែ វាអាចជារោគសញ្ញានៃជំងឺធ្ងន់ធ្ងរមួយចំនួនដូចជា ៖ ជំងឺដាច់សរសៃឈាមក្នុងខួរក្បាល និងជំងឺនៃបេះដូង និងសរសៃឈាម។
មូលហេតុមួយចំនួននៃការវិលមុខរួមមាន៖
បញ្ហាត្រចៀក
ករណីជាច្រើននៃការវិលមុខត្រូវបានបង្កឡើងដោយបញ្ហាដែលប៉ះពាល់ទៅលើចលនការនៃលំនឹងនៅក្នុងត្រចៀករបស់អ្នក។ ឧទាហរណ៍រួមមានៈ
- ការឆ្លងមេរោគនៅនឹងត្រចៀក
- ជំងឺ Meniere
ការថយចុះលំហូរឈាម
ការវិលមុខអាចត្រូវបានបង្កឡើងប្រសិនបើខួរក្បាលរបស់អ្នកមិនទទួលបានឈាមគ្រប់គ្រាន់។ នេះអាចកើតឡើងក្នុងមូលហេតុផ្សេងៗគ្នារួមមាន៖
- ជំងឺស្ទះសរសៃឈាម
- ខ្វះជាតិទឹក
- ជំងឺចង្វាក់បេះដូងមិនធម្មតា
- ការថយចុះសម្ពាធឈាមពេលឈរ
- ជំងឺដាច់សរសៃឈាមខួរក្បាល
- ជំងឺស្ទះសរសៃឈាមក្នុងខួរក្បាលបណ្តោះអាសន្ត
ថ្នាំមួយចំនួន
ប្រភេទនៃថ្នាំមួយចំនួនបណ្តាលអោយវិលមុខផងដែររួមមានៈ
- ថ្នាំប្រឆាំងនឹងជំងឺធ្លាក់ទឹកចិត្ត
- ថ្នាំប្រឆាំងនឹងការប្រកាច់
- ថ្នាំរក្សាសម្ពាធឈាម
- ថ្នាំសណ្តំ
មូលហេតុដទៃទៀតនៃការវិលមុខ
- ការស្លេកស្លាំង
- ជំងឺថប់បារម្ភទូទៅ
- ជាតិស្ករនៅក្នុងឈាមធ្លាក់ចុះ
- ជំងឺឈឺក្បាលប្រកាំង
- ជំងឺខ្លាច
នៅពេលណាដែលគួរទៅជួបនឹងគ្រូពេទ្យ
ជារឿយៗ ការវិលមុខគឺជារឿងមួយបណ្តោះអាសន្ត និងនឹងបាត់ទៅវិញដោយខ្លួនវាផ្ទាល់។ របៀបនៃការថែរក្សាខាងក្រោមនេះអាចជួយបាន។
- ធ្វើចលនាយឺតៗៈ នៅពេលដែលអ្នកក្រោកឈរ, សូមធ្វើវាយឺតៗ។ មនុស្សជាច្រើននាក់មានការវិលមុខប្រសិនបើពួកគេក្រោកឈរលឿនពេក
- ផឹកទឹកអោយបានច្រើនៈ ការមានជាតិទឹកគ្រប់គ្រាន់អាចជួយការពារ ឬបន្ថយប្រភេទនៃការវិលមុខនានា
- ជៀសវាងការទទួលទានជាតិកាហ្វេអ៊ីន និងថ្នាំជក់ៈ ដោយការត្បៀតសរសៃឈាម, សារធាតុទាំងនោះអាចធ្វើអោយរោគសញ្ញាកាន់តែអាក្រក់ទៅៗ ។
សូមធ្វើការណាត់ជួបជាមួយនឹងគ្រូពេទ្យ
សូមទាក់ទងទៅគ្រូពេទ្យប្រសិនបើការវិលមុខរបស់អ្នកត្រូវបានគួបផ្សំដោយៈ
- កើតមានថ្មីៗ, ឈឺក្បាលខ្លាំង
- ដួល ឬបញ្ហានៃការដើរ
- បាត់បង់នូវការស្តាប់លឺ
សូមរកការសង្គ្រោះបន្ទាន់ភ្លាមៗ
ការវិលមុខអាចជារោគសញ្ញានៃបញ្ហាសុខភាពធ្ងន់ធ្ងរមួយចំនួន ដូចជាការគាំងបេះដូង ឬជំងឺដាច់សរសៃឈាមខួរក្បាល។ សូមរកការសង្គ្រោះបន្ទាន់ភ្លាមៗប្រសិនបើការវិលមុខរបស់អ្នកត្រូវបានផ្សារភ្ជាប់ជាមួយនឹងៈ
- ការឈឺទ្រូង
- ញ័រទ្រូង
- ដកដង្ហើមខ្លីៗ
- ផ្លាស់ប្តូរគំហើញ ឬការនិយាយ
- គ្រោះថ្នាក់ក្បាលធ្ងន់ធ្ងរ
- ខ្សោយដៃ ឬជើង
- បាត់បង់ស្មារតីដែលមានរយៈពេលលើសពីពីរ ឬបីនាទី
- ប្រកាច់ ។
