អាហារមួយចំនួនអាចបណ្ដាលឱ្យបញ្ហានៃជំងឺក្រួសក្នុងតម្រងនោមដែលមានស្រាប់កាន់តែធ្ងន់ធ្ងរឡើយ។ មានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីដែលអ្នកជំងឺក្រួសក្នុងតម្រងនោមត្រូវប្រយ័ត្នក្នុងការទទួលទាន ៖
១. ស្ពៃពួយឡេង
បន្លែនេះមានផ្ទុកសារធាតុ oxalates ដែលអាចប្រែក្លាយជាក្រួសក្នុងប្រព័ន្ធរាងកាយមនុស្សប្រសិនបើទទួលទានចូលច្រើនពេក។ ក្រួសទាំងនេះអាចត្រូវបានបង្កឡើងដោយសារកំណើននៃបរិមាណសារធាតុ oxalates ក្នុងទឹកនោម។ ប្រភេទទូទៅបំផុតនៃជំងឺក្រួសក្នុងតម្រងនោម គឺក្រួសកាល់ស្យូម oxalate។ ១០០ក្រាមនៃស្ពៃពួយឡេងមានផ្ទុកសារធាតុ oxalate ប្រមាណ ៩៧០មីលីក្រាម។ ទោះជាយ៉ាងណាការស្ងោរ ឬស្រុសស្ពៃពួយឡេងអាចជួយកាត់បន្ថយកំហាប់នៃសារធាតុ oxalate បានយ៉ាងប្រសើរ។ ប្រសិនបើអ្នកកំពុងមានបញ្ហាសុខភាពណាមួយនោះ ចូរពិគ្រោះជាមួយគ្រូពេទ្យសិនមុននឹងរួមបញ្ចូលស្ពៃពួយឡេងក្នុងរបបអាហារប្រចាំថ្ងៃ។ គួរចាំថាស្ថានភាពនៃសុខភាពមនុស្សម្នាក់ៗ គឺអាចបង្កប្រតិកម្មឆ្លើយតបមិនដូចគ្នាឡើយ។
២. ប៉េងប៉ោះ
ប៉េងប៉ោះក៏ជាប្រភពនៃសារធាតុ oxalate គួរឱ្យកត់សម្គាល់។ ក្រៅពីកម្រិតការទទួលទាន អ្នកក៏គួរយកគ្រាប់ប៉េងប៉ោះចេញផងដែរដើម្បីបន្ថយបរិមាណនៃសារធាតុ oxalate ។ បន្ថែមពីនេះបុគ្គលងាយរងគ្រោះគួរចៀសវាងទទួលទានទឹកប៉េងប៉ោះផងដែរ ខណៈដែលវាក៏មានផ្ទុកសារធាតុ oxalate ខ្ពស់។
៣. សូកូឡា
អ្នកជំងឺក្រួសតម្រងនោមគួរចៀសវាង ឬកម្រិតការទទួលទានសូកូឡាត្រឹមតែម្ដងក្នុងមួយសប្តាហ៍បានហើយ។ ខណៈដែលអាហារសម្រន់នេះមានផ្ទុកសារធាតុ oxalates ខ្ពស់។
៤. តែ
ប្រភពនៃតែភាគច្រើនអាចផ្ដល់ផលល្អៗចំពោះសុខភាព។ ទោះជាយ៉ាងណាវាមិនល្អសម្រាប់អ្នកជំងឹក្រួសតម្រងនោមឡើយ ខណៈដែលភេសជ្ជៈនេះអាចបង្កើនទំហំនៃក្រួស។
៥. អាហារសមុទ្រ
អ្នកជំងឺក្រួសតម្រងនោមចាំបាច់ត្រូវតែកម្រិតបរិមាណនៃគ្រឿងសមុទ្រដែលពួកគេទទួលទាន ហើយក៏គួរតែចៀសវាងសាច់ក្រហមនិងអាហារដែលសម្បូរប្រូតេអ៊ីនខ្ពស់ផងដែរ។ មិនដូច្នេះទេកម្រិតនៃសារធាតុ purine នឹងកើនឡើងបង្កបញ្ហាអាស៊ីតអ៊ុយរិកជះឥទ្ធិពលលើក្រួសតម្រងនោមគួរឱ្យបារម្ភ។
៦. អាហារប្រៃ
អាហារប្រភេទនេះ គឺគ្មានសុខភាពល្អឡើយដោយសារសម្បូរជាតិសូដ្យូម ហើយកាន់តែគ្រោះថ្នាក់ចំពោះអ្នកជំងឺក្រួសក្នុងតម្រងនោម។ សូដ្យូមអាចបង្កការផលិតកាល់ស្យូមដែលស្អិតជាប់នឹងសារធាតុ oxalates បង្កជាក្រួស។
កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕