តើអ្នកចូលចិត្ត ធ្វើការតុបតែងមុខណាស់ តើមែនទេ? តើអ្នកចូលចិត្តសាកល្បង ផលិតផលគ្រឿងសម្អាង ម៉ាកចេញថ្មី ដែរឬទេ? ប្រសិនបើចម្លើយគឺថា ចាស នោះអ្នកត្រូវតែដឹងថា ផលិតផលនៃគ្រឿងសម្អាងមុខ ទាំងនេះ គឺមិនតែងតែល្អចំពោះសុខភាពស្បែកមុខ របស់អ្នកឡើយ បើទោះជាវា ធ្វើអោយអ្នកមានភាព ស្រស់ស្អាតបានប៉ុណ្ណាក៏ដោយ ។
ខាងក្រោមនេះ គឺជាមូលហេតុ ដែលអ្នកមិនគួរធ្វើការប្រើគ្រឿងសម្អាង នៅលើផ្ទៃមុខ ញឹកញាប់ពេកនោះទេ ៖
១. គ្រឿងសម្អាងតែងធ្វើការបិទជិតនូវរន្ធញើសលើស្បែក
ប្រសិនបើអ្នកគិតថា ការតុបតែងមុខ តាមបែបធម្មជាតិ នឹងមិនប៉ះពាល់ដល់សុខភាពស្បែក នោះអ្នក ពិតជាយល់ច្រលំហើយ។ មិនថាគ្រឿងសម្អាងប្រភេទណានោះទេ គឺសុទ្ធតែផ្សំឡើងពីសារធាតុគីមីទាំងអស់ បើទោះជាមានកម្រិត តិច ឬ ច្រើន វាសុទ្ធតែអាចធ្វើអោយរន្ធញើសអ្នក ស្ទះបានជានិច្ច។ ជាលទ្ធផល វានឹងធ្វើអោយស្បែកអ្នក កើតមាននូវកន្ទួលរមាស់ និង ចេញមុនបាន ។
២. ការតុបតែងមុខច្រើនពេកធ្វើអោយស្បែកអ្នកឆាប់ចាស់
តើអ្នកធ្លាប់លឺពីវាទេ? កាលបើអ្នកប្រើគ្រឿងសម្អាងកាន់តែច្រើន នោះវានឹងកាន់តែប៉ះពាល់ទៅ ដល់ស្បែកមុខរបស់អ្នក។ ការផាត់មុខគ្រប់ពេលនោះ នឹងធ្វើអោយស្បែកអ្នកស្ងួត និង មិនអាចដកដង្ហើមបានល្អនោះទេ។ បញ្ហានៃការខ្វះជាតិទឹកនៅលើស្បែកនេះ នឹងធ្វើអោយស្បែកអ្នក ឆាប់ជ្រាវជ្រួញ ដែលជាសញ្ញានៃភាពចាស់មុនអាយុបាន ។ វាជាការល្អ ប្រសិនបើអ្នកអាចចៀសវាងនូវការប្រើវា ប្រសិនបើវា មិនចាំបាច់។
៣.ការតុបតែងមុខអោយបានល្អ គឺអាស្រ័យទៅលើការដឹងនូវវិធីនៃការលាបអោយបានត្រឹមត្រូវ
ភាគច្រើននៃស្ត្រី តែងធ្វើការតុបតែងមុខដោយខ្លួនឯង ដោយមិនបានដឹងពីវិធី ឬ ជំនាញក្នុងការលាបវា អោយបានត្រឹមត្រូវ។ បញ្ហានេះ នឹងអាចធ្វើអោយពួកគេ មើលទៅកាន់តែអាក្រក់ជាងមុន ។ យើងមាន នូវវិធីក្នុងការតុបតែងមុខ អោយត្រឹមត្រូវតាមជំនាញ ដែលស្ត្រីភាគច្រើន មិនសូវបានដឹងនោះទេ។ ការមិនចេះលាបវា អោយបានត្រឹមត្រូវ វាអាចនឹង ធ្វើអោយមនុស្សរាល់គ្នាសើចចំអកនឹងអ្នកវិញ។
៤. គ្រឿងសម្អាងធ្វើអោយស្បែកអ្នកមានប្រតិកម្ម
ប្រសិនបើអ្នកមានស្បែក ឆាប់មានប្រតិកម្ម នោះអ្នកគួរតែចៀសវាងនូវការប្រើ ផលិតផលគ្រឿងសម្អាង ។ ភាគច្រើន នៃផលិតផលគ្រឿងសម្អាង អាចធ្វើអោយស្បែកអ្នកមានប្រតិកម្មបាន។ ការប្រើ ប្រាស់គ្រឿងសម្អាង ក្នុងរយៈពេលយូរពេក អាចបណ្តាលអោយស្បែកអ្នកមានកន្ទួលរមាស់ និង មានស្នាមក្រហម នៅលើស្បែកបាន។ ដូច្នេះ ប្រសិនបើវាមិនសាកសមនឹងអ្នកនោះទេ អ្នកមិនគួរប្រើវាឡើយ ។
៥. ការតុបតែងមុខនឹងមិនផ្តល់អោយអ្នកនូវសម្រស់ពីធម្មជាតិរបស់អ្នកឡើយ
សម្រស់ពីធម្មជាតិ គឺតែងទទួលបាននូវភាពទាក់ទាញជាង ការប្រើគ្រឿងសម្អាងផ្តល់នូវភាពស្រស់ស្អាត។ ការផាត់មុខ នឹងបិទបាំងនូវអ្វី ដែលអ្នកមានពីធម្មជាតិ។ ប្រសិនបើអ្នកមានស្បែកល្អ នោះហេតុអី្វ អ្នកចាំបាច់ធ្វើការលាបអ្វីបន្ថែមទៀតនោះ ? ភាពស្រស់ស្អាតពីធម្មជាតិ គឺអ្វីដែលអ្នកគួរថែរក្សាអោយបានល្អ ៕