ក្រុមអ្នកស្រាវជ្រាវនៅសាកលវិទ្យាល័យ នៃប្រទេសកាណាដា រកឃើញថាពពួកសណ្តែកអាចជួយកាត់បន្ថយអត្រាគ្រោះថ្នាក់នៃជំងឺបេះដូង បានតាមរយៈការជួយធ្វើឱ្យល្អប្រសើរនូវការគ្រប់គ្រងកម្រិតជាតិស្ករ ក្នុងឈាម ។ របបអាហារធ្វើពីពពួកសណ្តែកដែលមានជាតិស្ករទាប ត្រូវគេរកឃើញថា អាចធ្វើឱ្យល្អប្រសើរនូវការគ្រប់គ្រងកម្រិតជាតិស្ករព្រមទាំងអាច កាត់បន្ថយការកើតមានជំងឺបេះដូងចំពោះអ្នកកើតទឹកនោមផ្អែម។
វេជ្ជបណ្ឌិត ដេវីដ ជេកឃិន និងសហការីរបស់ខ្លួនបានពិសោធន៍លើ អ្នកជំងឺទឹកនោមផ្អែមប្រភេទ២ចំនួន១២១នាក់ ជាលទ្ធផលបានបង្ហាញឱ្យ ដឹងថា របបអាហារធ្វើពីពពួកសណ្តែកដែលមានជាតិស្ករទាប គឺអាចកាត់បន្ថយជំងឺបេះដូងបានដល់០,៨ភាគរយ ។
លោកវេជ្ជបណ្ឌិតបានថ្លែងថា ការប្រើប្រាស់បន្លែក្នុងបរិមាណប្រហែលជា ១៩០ក្រាមក្នុងមួយថ្ងៃ (ពេញមួយពែង)ហាក់ដូចជាផ្តល់នូវអត្ថប្រយោជន៍យ៉ាង ពេញលេញ ចំពោះរបបអាហារដែលមានកម្រិតជាតិស្ករទាប និងព្រមទាំងអាចកាត់បន្ថយបាន នូវអត្រាប្រឈមនឹងជំងឺបេះដូងតាមរយៈការកាត់បន្ថយសម្ពាធឈាម។
លោកវេជ្ជបណ្ឌិតបានបន្ថែមថា ការរកឃើញស្តីពីការទទួលទានសណ្តែកជួយកែលំអការគ្រប់គ្រងជាតិស្ករ និងកាត់បន្ថយអត្រាកើតជំងឺបេះដូង គឺពិតជាមានសារសំខាន់ខ្លាំងណាស់ពីព្រោះជំងឺទឹកនោមផ្អែម ប្រភេទ២កំពុងតែកើនឡើងយ៉ាងឆាប់រហ័ស ៕
