​ទោះបីជា​អ្នក​ក្លាយ​ជា​ម្តាយ​របស់​គេ​ជា​លើកដំបូង ឬ​លើក​ទី​ប៉ុន្មាន​ក៏ដោយ​, ថ្ងៃ និង​សប្តាហ៍​នៃ​ការ​ជិត​សម្រាល​អាចជា​រឿង​មួយ​រំភើប​ខ្លាំង​។​

​ស្ត្រី​ជា​ច្រើន​មាន​ការផ្លាស់ប្តូរ​អារម្មណ៍​ក្រោយ​សម្រាលកូន​រួច​, មាន​ការប្រែប្រួល​អារម្មណ៍​ទៅ​ជា​មិន​សប្បាយចិត្ត​, កំសត់​ក្នុង​រយៈពេល​យូរ ដែល​នេះ​ត្រូវបាន​គេ​ស្គាល់​ថា​ជា​ជំងឺ​ធ្លាក់​ទឹកចិត្ត​ក្រោយ​ការ​សម្រាលកូន​។​

​ការ​មាន​អារម្មណ៍​មិន​សប្បាយចិត្ត និង​ធ្លាក់​ទឹកចិត្ត​គឺជា​រឿង​មួយ​កើតមាន​ជា​ញឹកញាប់​ក្រោយ​ពី​សម្រាលកូន​ជាង​មនុស្ស​ជាច្រើន​ដែល​អាច​ដឹង​នោះ​។ វា​ជា​រឿង​សំខាន់​ចំពោះ​អ្នក​ម្តាយ​ថ្មីៗ និង​អ្នក​ដែល​ស្រលាញ់​ពួកគេ ដើម្បី​អោយ​យល់​ពី​រោគសញ្ញា​នៃ​ជំងឺ​ធ្លាក់​ទឹកចិត្ត​ក្រោយ​ការ​សម្រាល និង​អោយ​ដឹង​ដល់​សមាជិក​គ្រួសារ និង​គ្រូពេទ្យ​ដើម្បី​ជួយ​គាត់​។​

​ជាមួយ​នឹង​ការគាំទ្រ​ផ្ទាល់ និង​ការព្យាបាល​, ម្តាយ​ដែល​ធ្លាប់មាន​បញ្ហា​នៃ​ការធ្លាក់​ទឹកចិត្ត​ក្រោយ​ការ​សម្រាល​អាច​បន្ត​រស់​នៅ​ដោយ​មាន​សុខភាព​ល្អ​, ជា​ម្តាយ​ដែល​សប្បាយ​ចិត្ត​មួយ​រូប​។​

​ស្ត្រី​លើសពី​៨០%​មាន​អារម្មណ៍​មិន​សប្បាយចិត្ត និង​ធ្លាក់​ទឹកចិត្ត​នៅ​ថ្ងៃ​ទី​មួយ​ក្រោយ​សម្រាលកូន​។ ជាមួយនឹង​អារម្មណ៍​មិន​សប្បាយ​ចិត្ត​នេះ​, ស្ត្រី​អាចមាន​អារម្មណ៍​ថា​សប្បាយចិត្ត​មួយ​ភ្លេត និង​ស្រក់​ទឹកភ្នែក​ទៅវិញ​នៅពេល​បន្ទាប់​។ គាត់​អាច​មាន​អារម្មណ៍​កំសត់​, ឆាប់​ខឹង​, មិន​សប្បាយចិត្ត​, អស់កម្លាំង​ជាដើម​។ ការ​មាន​អារម្មណ៍​មិន​សប្បាយចិត្ត​ចំពោះ​ស្ត្រី​ក្រោយ​សម្រាលកូន​រួច​ជា​ធម្មតា​មាន​រយៈពេល​តែ​ពីរ ឬ​បី​ថ្ងៃ​ប៉ុណ្ណោះ ប៉ុន្តែ​វា​អាច​យូរ​រហូតដល់​ទៅមួយ ឬ​ពីរ​សប្តាហ៍​ឯណោះ​។​

​ហេតុអ្វី​បានជា​អារម្មណ៍​បែប​នេះ​កើតមានឡើង​?
​ការប្រែប្រួល​អារម្មណ៍​ទាំងនេះ​ត្រូវបាន​គេ​ជឿ​ថា​មក​ពី​ឥទ្ធិពល​នៃ​ការប្រែប្រួល​អរ​ម៉ូ​ន​ដែល​កើតមាន​ឡើង​លើ​ស្ត្រី​មាន​ផ្ទៃពោះ និង​ការ​សម្រាលកូន​។ កម្រិត​នៃ​អរ​ម៉ូ​ន​អ៊ឹ​ស្ត្រូ​សែន និង​ប្រូសេស្តេ​រ៉ូន​ដែល​បានកើនឡើង​អំឡុង​ពេល​មាន​ផ្ទៃពោះបាន​ធ្លាក់ចុះ​ភ្លាមៗ​ក្រោយ​ការ​សម្រាល ហើយ​នេះ​អាច​ធ្វើអោយ​ប៉ះពាល់​ដល់​អារម្មណ៍​។ នៅពេលដែល​កម្រិត​អរ​ម៉ូ​ន​ទាំងនេះ​ត្រឡប់​មក​ធម្មតា​វិញ​, ការប្រែប្រួល​អារម្មណ៍​ទាំងនោះ​ជា​ធម្មតា​ត្រូវបាន​ដោះស្រាយ​ដោយ​មិន​ចាំបាច់​ធ្វើ​អន្តរាគមន៍​ពី​គ្រូពេទ្យ​នោះទេ​។​

​អ្វី​ដែល​ត្រូវ​ធ្វើ​?
​ការ​សម្រាក​, ការ​ញ៉ាំ​អាហារ​ដែល​មាន​ជីជាតិ និង​ការគាំទ្រ​គឺជា​រឿង​សំខាន់ ស្របពេល​ដែល​ការ​គេង​មិន​គ្រប់គ្រាន់ ឬ​ការ​អស់កម្លាំង​អាច​ជម្រុញ​អោយ​រោគសញ្ញា​កាន់តែ​ធ្ងន់ធ្ងរ​។​

​ដើម្បី​ដោះស្រាយ​អំពី​បញ្ហា​នេះ​, ម្តាយ​ថ្មី​នេះ​គួរតែ​ព្យាយាម​ទទួលយក​ជំនួយ​នៅក្នុង​ថ្ងៃ​ដំបូង និង​សប្តាហ៍​ដំបូង​ក្រោយ​សម្រាល​។ ទុក​អោយ​គ្រួសារ និង​មិត្តភិក្ត​ជួយ​ជាមួយនឹង​ការដើរ​ផ្សារ​, រៀបចំ​ផ្ទះ និង​មើលថែទាំ​កូន​។ ទុក​អោយ​នរណា​ម្នាក់​ចម្អិន​អាហារ​អោយ និង​មើល​កូន​ខណៈពេល​ដែល​អ្នក​ស​ម្រាក​ដោយ​ការ​ងូតទឹក ឬ​គេង​ជាដើម​។​

​សូម​គេង​អោយបាន​គ្រប់គ្រាន់ និង​ញ៉ាំ​អាហារ​ដែល​មាន​ជីជាតិ​។ សូម​និយាយ​ទៅកាន់​នរណា​ម្នាក់​ដែល​ជិតស្និទ្ធ​នឹង​អ្នក ឬ​និយាយ​ទៅកាន់​នរណា​ដែល​ទើប​ក្លាយជា​ម្តាយ​របស់​គេ​ថ្មីៗ​ដែរ​។ ការ​ធ្វើ​របៀប​នេះ​អាច​ជួយ​អ្នកទទួលបាន​អារម្មណ៍​នូវ​ការគាំទ្រ និង​រំលឹក​អ្នក​ថា​អ្នក​មិន​មែន​នៅ​តែ​ម្នាក់ឯង​នោះទេ​។​

​នៅពេលណា​ដែល​គួរតែ​ទៅ​ជួប​នឹង​គ្រូពេទ្យ​
​ប្រសិនបើ​ការមិនសប្បាយចិត្ត​នេះ​មាន​រយៈពេល​យូរ​ជាង​២​សប្តាហ៍​, ការនិយាយ​ទៅកាន់​គ្រូពេទ្យ​ដើម្បី​ពិភាក្សា​ថា​តើ​ជំងឺ​ធ្លាក់​ទឹកចិត្ត​ក្រោយ​ការ​សម្រាល​នេះ​អាច​ជា​មូលហេតុ​នៃ​ការថយចុះ​អារម្មណ៍​ឬ​យ៉ាងណា​៕​

ទំនាក់ទំនងផ្សាយពាណិជ្ជកម្មសូមទូរស័ព្ទមកលេខ 011688855
អត្ថបទទាក់ទង