អ្នកប្រហែលជាធ្លាប់លឺហើយថា មួយថ្ងៃញ៉ាំផ្លែប៉ោមមួយផ្លែគឺមិនមានជំងឺជាប់ខ្លួនឡើយ ប៉ុន្តែយោងទៅតាមការស្រាវជ្រាវថ្មីបានឲ្យដឹងថា មួយឃ្លានេះមិនទទួលបានភាពត្រឹមត្រូវនោះឡើយ។ ប៉ុន្តែអ្នកវិទ្យាសាស្រ្តនិយាយថា ដើម្បីកុំឲ្យមានជំងឺគឺត្រូវញ៉ាំផ្លែប៉ោមពីរផ្លែក្នុងមួយថ្ងៃ ព្រោះវាអាចបន្ថយការប្រឈមនឹងជំងឺបេះដូង ដោយសារតែអាចកាត់បន្ថយកម្រិតកូឡេស្តេរ៉ុលក្នុងឈាមបាន។
សារធាតុគីមីដែលមានក្នុងផ្លែប៉ោមត្រូវបានគេរាយការណ៍ថា អាចជួយបន្ថយការកើតជំងឺបេះដូងតាមរយៈការបន្ថយការកើនឡើងកូឡេស្តេរ៉ុលក្នុងរាងកាយ។ ការញ៉ាំទឹកផ្លែប៉ោមមួយកែវកន្លះជារៀងរាល់ថ្ងៃនឹងផ្តល់ជាអត្ថប្រយោជន៍ធំបំផុត ប៉ុន្តែការញ៉ាំផ្លែប៉ោមពីរផ្លែក៏នាំឲ្យបេះដូងកាន់តែមានសុខភាពល្អដែរ។ ការសិក្សាបានបង្ហាញថា សារធាតុក្នុងផ្លែប៉ោមដើរតួនាទីដូចជាអង់ទីអុកស៊ីដង់ក្នុងស្រាក្រហម និងតែដែឬ ក្នុងការបង្ការកុំឲ្យមានការកកកុញកូឡេស្តេរ៉ុលក្នុងសរសៃឈាមអាក់ទែ។ ដូច្នេះការបង្ការជំងឺបេះដូងនឹងកើតឡើង។
អ្វីដែលកាន់តែសំខាន់បំផុតនោះគឺថា ថ្វីបើការឡើងខ្ពស់របស់កូឡេស្តេរ៉ុលត្រូវបានគេដឹងថា ជាកត្តាប្រឈមមុខមួយសម្រាប់ជំងឺបេះដូងសរសៃឈាមក៏ដោយ ក៏ការសិក្សានេះមិនបានវាស់វែងទៅលើលទ្ធផលនៃសុខភាពឡើយ ដូច្នេះវាអាចនឹងទទួលបានភាពខុសៗគ្នាចំពោះលទ្ធផលកូឡេស្តេរ៉ុលក្នុងការបន្ថយការប្រឈមនឹងជំងឺបេះដូង។ ទោះបីជាយ៉ាងណាក៏ដោយ ការសិក្សានេះបានគាំទ្រទៅលើសារសុខភាពទូទៅ ដែលថា របបអាហារដែលមានបន្លែនិងផ្លែឈើខ្ពស់ និងមានតុល្យភាព ហាត់ប្រាណទៀងទាត់ និងរបៀបរស់នៅផ្តល់សុខភាព គឺជាមធ្យោបាយដ៏ល្អបំផុតក្នុងការរស់នៅប្រកបដោយសុខភាព និងបន្ថយការប្រឈមនឹងជំងឺបេះដូង៕