ធ្លាប់ញ៊ាំឬអត់? ទំពាំងបាយជូរក្រៀម អាចទប់ស្កាត់ ជំងឺលើសឈាម និងជំងឺមហារីក

ទោះបីជាស្គាល់ និងឧស្សាហ៍ញ៊ាំអាហារសម្រន់នេះញឹកញាប់ប៉ុណ្ណាក៏ដោយ ក៏ភាគច្រើននៃពួកយើងប្រហែលជាមិនធ្លាប់ដឹងទេថា ទំពាំងបាយជូរក្រៀមអាចផ្ដល់អត្ថប្រយោជន៍ល្អៗចំពោះសុខភាព។ អ្នកអាចទទួលទានទំពាំងបាយជូរក្រៀមចំនួនមួយក្ដាប់ដៃក្នុងមួយថ្ងៃប្រសិនបើអ្នកមានរបបអាហារតុល្យភាព។ ទោះជាយ៉ាងណាប្រសិនបើអ្នកទទួលទានស្ករ ឬផ្លែឈើផ្សេងៗច្រើនហើយនោះ ចូរកាត់បន្ថយបរិមាណនៃការទទួលទានទំពាំងបាយជូរក្រៀម។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរញ៊ាំទំពាំងបាយជូរក្រៀម ៖

១. កាត់បន្ថយហានិភ័យនៃជំងឺលើសសម្ពាធឈាម

កម្រិតនៃជាតិប៉ូតាស្យូមខ្ពស់, សារធាតុប្រឆាំងអុកស៊ីតកម្ម និងវីតាមីន B ក្នុងទំពាំងបាយជូរក្រៀម គឺមានអត្ថប្រយោជន៍ណាស់សម្រាប់គ្រប់គ្រងកម្រិតនៃសម្ពាធឈាមល្អសម្រាប់អ្នកជំងឺលើសឈាម។ វាជួយបន្ថយភាពតានតឹងនៃសសៃឈាម ព្រមទាំងបញ្ចុះសម្ពាធឈាម។ អាហារសម្រន់នេះក៏ជាប្រភពដ៏ប្រសើរនៃជាតិសសៃដែលកាត់បន្ថយភាពឡើងរឹងនៃសសៃឈាម ព្រមទាំងការឡើងខ្ពស់នៃសម្ពាធឈាមផងដែរ។

២. ទប់ស្កាត់ជំងឺខ្វះគ្រាប់ឈាមក្រហម

ទំពាំងបាយជូរក្រៀមជាប្រភពដ៏ប្រសើរនៃជាតិដែកដែលជួយព្យាបាលនិងទប់ស្កាត់ជំងឺខ្វះគ្រាប់ឈាមក្រហម។ វាក៏មានផ្ទុកសម្បូរទៅដោយវីតាមីន B និងជាតិទង់ដែងដែលចាំបាច់សម្រាប់ការផលិតឈាមថ្មី និងកោសិកាគ្រាប់ឈាមក្រហមថ្មី។

៣. ទប់ស្កាត់ជំងឺមហារីក

ទំពាំងបាយជូរក្រៀមក៏ជាប្រភពដ៏ប្រសើរនៃសារធាតុប្រឆាំងអុកស៊ីតកម្ម catechins ដែលជួយកម្ចាត់រ៉ាឌីកាល់សេរីគ្រោះថ្នាក់។ ជាលទ្ធផលធ្វើឱ្យប្រព័ន្ធសរីរាង្គនិងកោសិកាក្នុងរាងកាយមានភាពប្រសើរឡើង។ រ៉ាឌីកាល់សេីអាចនាំឱ្យកោសិកាមហារីកលូតលាស់។ ការរួមបញ្ចូលទំពាំងជូរក្រៀមក្នុងរបបអាហារប្រចាំអាចកាត់បន្ថយហានិភ័យនៃជំងឺមហារីក ឬពន្យឺតដំណើរការលូតលាស់នៃជំងឺនេះ។

៤. ព្យាបាលនិងទប់ស្កាត់អាការៈទល់លាមក

ទំពាំងបាយជូរក្រៀមមានផ្ទុកសម្បូរដោយជាតិសសៃដែលជួយសម្រួលចលនាពោះវៀនព្យាបាលនិងទប់ស្កាត់អាការៈទល់លាមកគួរឱ្យកត់សម្គាល់។ វាក៏ជួយបញ្ឈប់លាមករាវខ្លាំងកាត់បន្ថយអាការៈរាគរូសផងដែរ។

៥. ពង្រឹងសុខភាពឆ្អឹង

ជាតិកាល់ស្យូមក្នុងទំពាំងបាយជូរក្រៀម គឺចាំបាច់ណាស់សម្រាប់សុខភាពឆ្អឹងរឹងមាំ។ វាក៏មានផ្ទុកសារធាតុ boron ដែលសំខាន់សម្រាប់ការលូតលាស់ឆ្អឹងនិងការស្រូបយកនូវជាតិកាល់ស្យូម។ សារធាតុ Boron ជួយទប់ស្កាត់ជំងឺពុកឆ្អឹងកំឡុងពេលអស់រដូវនិងល្អសម្រាប់ឆ្អឹង ព្រមទាំងសន្លាក់។ ប៉ូតាស្យូមក៏ត្រូវបានរកឃើញក្នុងទំពាំងបាយជូរក្រៀមដែលអាចពង្រឹងសុខភាពឆ្អឹងនិងការលូតលាស់នៃឆ្អឹង។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕