អ្នកស្រាវជ្រាវជាច្រើនបានមានជំនឿជាយូរមកហើយថា សារធាតុជាច្រើនដែលមានក្នុងស្រាក្រហមប្រហែលជាមានប្រយោជន៍ដល់សុខភាពបេះដូង។ ការទទួលទានស្រាក្រហមក្នុងកម្រិតមធ្យមប្រហែលជាមានជាប់ទាក់ទងនឹងការកាត់បន្ថយការប្រឈមនឹងជំងឺបេះដូងបានទៀត។ ចាប់ពីឆ្នាំ ១៩៩០មក អ្នកឯកទេសជាច្រើនបានចាប់ផ្តើមផ្តោតសំខាន់ទៅលើសារធាតុ Resveratrol ដែលជាកំផោនអង់ទីអុកស៊ីដង់មួយប្រភេទក្នុងស្រាក្រហម។ បន្ទាប់មក ការសិក្សាតាមមន្ទីរពិសោធន៍ និងសត្វមួយចំនួនបានបង្ហាញថា សារធាតុមួយនេះមានឥទ្ធិពលប្រឆាំងនឹងវីរុស, ប្រឆាំងការរលាក និងប្រឆាំងនឹងជំងឺមហារីកដែរ។
ទោះបីជាយ៉ាងណាក៏ដោយ ថ្នាំបំប៉នប្រភេទ Resveratrol មិនបានធ្វើការសិក្សាយ៉ាងល្អទៅលើមនុស្សឡើយ។ យើងមិនបានដឹងច្បាស់អំពីអត្ថប្រយោជន៍ និងការប្រឈមមុខអ្វីខ្លះដែលវាអាចនឹងមាននោះទេ។ យើងក៏មិនដឹងថាតើសារធាតុ Resveratrol មានសារៈសំខាន់ជាងសារធាតុធម្មជាតិផ្សេងៗទៀតដែលមានក្នុងស្រាដែរ។
ទោះបីជាយ៉ាងណាក៏ដោយ សារធាតុ Resveratrol បានក្លាយទៅជាថ្នាំបំប៉នដ៏ពេញនិយមមួយ។ ប្រជាជនប្រើប្រាស់វាសម្រាប់បញ្ហាជំងឺជាច្រើនខុសៗគ្នា។ អ្នកខ្លះប្រើដើម្បីព្យាយាមបង្ការ ឬព្យាបាលជំងឺធ្ងន់ៗដូចជា ជំងឺមហារីក ឬជំងឺបេះដូងជាដើម។ អ្នកខ្លះទៀតសង្ឃឹមថា ពួកគេនឹងអាចបន្ថយដំណើរនៃការចាស់ទោតាមអាយុបាន។ ឥឡូវនេះ ការប្រើប្រាស់ទាំងនេះមិនមានអំណះអំណាងអ្វីដើម្បីគាំទ្រនោះទេ។
សារធាតុ Resveratrol មិនមានអំណះអំណាងអ្វីដើម្បីយកទៅព្យាបាលជំងឺឡើយ ហើយក៏គ្មានកម្រិតប្រើប្រាស់តាមលក្ខណៈស្តង់ដារអ្វីដែរ។ អ្នកខ្លះធ្វើការប៉ាន់ស្មានទៅលើកម្រិតប្រើប្រាស់ដែលកើតចេញពីការសិក្សាស្រាវជ្រាវដំបូងម្ល៉េះ។ ដូច្នេះចូរសុំយោបលពីគ្រូពេទ្យបន្ថែមទៀតដើម្បីទទួលបានដំបូន្មាននៃការប្រើប្រាស់។
សារធាតុ Resveratrol កើតមានពីធម្មជាតិក្នុងស្រាក្រហម, សម្បកផ្លែទំពាំងបាយជូរក្រហម, ទឹកទំពាំងបាយជូ, សណ្តែកដី និងមើមថ្នាំចិនមួយចំនួន។
អ្នកខ្លះឆ្ងល់ថាតើពួកគេគួរតែផឹកស្រាក្រហមអោយកាន់តែច្រើនដើម្បីទទួលបានសារធាតុ Resveratrol កាន់ច្រើន និងល្អចំពោះសុខភាពកាន់តែខ្លាំងបានដែរឬទេ។ ទោះបីជាយ៉ាងណាក៏ដោយ អ្នកឯកទេស និងអង្គការភាគច្រើនដូចជា សមាគមន៍ជំងឺបេះដូងអាមេរិកនៅតែណែនាំថា ស្ត្រីដែលនិយមផឹកគ្រឿងស្រវឹងបែបនេះគួរតែផឹកតែម្តងក្នុងមួយថ្ងៃបានហើយ ចំណែកឯបុរសអាចដល់ពីរដង។ ការទទួលទានជាតិស្រាច្រើនពេកមានផលអាក្រក់ និងការប្រឈមមុខនឹងបញ្ហាសុខភាពធ្ងន់ធ្ងរ។
ការប្រឈមមុខ
ផលរំខាន៖ នៅពេលសារធាតុ Resveratrol ត្រូវបានទទួលទានក្នុងចំនួនធម្មតាតាមរយៈអាហារ ជាទូទៅគឺជារឿងធម្មតា និងមានសុវត្ថិភាព។ វាអាចមានប្រតិកម្មចំពោះអ្នកដែលអាឡែហ្ស៊ីនឹងទំពាំងបាយជូរ ឬស្រាបាន។
ការប្រឈមមុខ៖ អ្នកដែលមានបញ្ហាសុខភាពដូចជា ហូរឈាមមិនធម្មតាមិនគួរណាទទួលទានសារធាតុ Resveratrol ដោយគ្មានការពិគ្រោះជាមួយគ្រូពេទ្យជាមុនឡើយ។ ស្ត្រីដែលមានបញ្ហាជាមួយអ័រម៉ូនដូចជា ជំងឺEndometriosis ឬជំងឺមហារីកសុដន់, មហារីកក្រពេញអូវ៉ែ ឬមហារីកស្បូនត្រូវតែទៅទទួលការណែនាំពីគ្រូពេទ្យសិនមុនពេលប្រើប្រាស់ថ្នាំបំប៉ន Resveratrol នេះ។
ការប្រតិកម្ម៖ បើសិនជាអ្នកប្រើថ្នាំ ឬអាហារបំប៉នផ្សេងៗជាទៀងទាត់ ចូរពិគ្រោះជាមួយគ្រូពេទ្យសិនមុនពេលចាប់ផ្តើមប្រើ Resveratrol។ ព្រោះវាអាចមានប្រតិកម្មជាមួយថ្នាំផ្សេងៗបានដូចជា ថ្នាំរំលាយកំណកឈាម, ថ្នាំបញ្ចុះសម្ពាធ, ថ្នាំព្យាបាលជំងឺមហារីក, ថ្នាំ MAOI, ថ្នាំប្រឆាំងការបាក់ទឹកចិត្ត, ថ្នាំប្រឆាំងវីរ៉ុស និងថ្នាំប្រឆាំងរោគផ្សិត, ថ្នាំបំបាត់ការឈឺចាប់ NSAID៕
ដោយសារតែកង្វះនូវអំណះអំណាងអំពីសុវត្ថិភាពរបស់វា ធ្វើអោយថ្នាំបំប៉ន Resveratrol មិនត្រូវបានណែនាំសម្រាប់ប្រើប្រាស់លើកូនក្មេង ឬស្ត្រីមានផ្ទៃពោះ ឬបំបៅដោះកូនឡើយ៕
