អ្វីនឹងកើតឡើងចំពោះរាងកាយ ពេលអ្នកញ៊ាំតែ “អាហារបួស” ? អាចផ្ដល់ផលល្អ និងអាក្រក់ ៧នេះ

ថាតើនឹងមានអ្វីកើតឡើងចំពោះសុខភាពរាងកាយនៅពេលអ្នកជ្រើសរើសទទួលទានអាហារបួសជាប្រចាំ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលល្អនិងអាក្រក់នៃការទទួលទានអាហារបួសរាល់ថ្ងៃ ៖

១. គេងស្រួលជាងមុន

នេះក៏ព្រោះតែភាគច្រើននៃអាហារបួសផ្ដល់ឱ្យអ្នកនូវជាតិសសៃខ្ពស់ ប៉ុន្តែជាតិខ្លាញ់ឆ្អែតទាប។ ការសិក្សាស្រាវជ្រាវមួយបានរកឃើញថា ការញ៊ាំអាហារបែបនេះជារូបមន្តដ៏ល្អសម្រាប់ការគេងលក់បានស្កប់ស្រួល។ ជាមួយនឹងរបបអាហារគ្មានសាច់ អ្នកអាចទទួលទានកាបូអ៊ីដ្រាតស្មុគស្មាញកាន់តែច្រើនដែលរំញោចដល់ការបញ្ចេញអ័រម៉ូនសេរ៉ូតូនីនដែលជួយដល់ការគេង។ នេះមានន័យថាការទទួលទានអាហារម្សៅៗដូចជាបាយនិងដំឡូងបារាំងមុនពេលគេងអាចជួយឱ្យអ្នកគេងលក់បានស្រួល។

២. អាចស្រកទម្ងន់បានខ្លះ

ការសិក្សាស្រាវជ្រាវមួយចំនួនបានបង្ហាញថាការញ៊ាំអាហារបួសអាចមានឥទ្ធិពលលើទម្ងន់របស់អ្នក។ ក្នុងការសិក្សាស្រាវជ្រាវមួយបានរកឃើញថា ទាំងមនុស្សពេញវ័យនិងកុមារដែលញ៊ាំអាហារបួស គឺបានទទួលទានប្រូតេអ៊ីន, កូឡេស្តេរ៉ូល និងជាតិខ្លាញ់មិនល្អ ឬខ្លាញ់ឆ្អែតតិច។ ជាក់ស្ដែងកុមារដែលញ៊ាំអាហារបួសស្រកទម្ងន់បាន ៣​.១គីឡូក្រាមជាមធ្យមកំឡុងពេលធ្វើការស្រាវជ្រាវនោះ។

៣. អ័រម៉ូនអាចប្រែប្រួល

ខណៈដែលសណ្ដែកសៀងអាចជាប្រភេទនៃអាហារដ៏ល្អសម្រាប់ផ្ដល់ប្រូតេអ៊ីនដល់រាងកាយជំនួសឱ្យសាច់, ការទទួលទានវាច្រើនពេកអាចជះផលប៉ះពាលអវិជ្ជមានលើរាងកាយ។ នេះអាចកើតឡើងប្រសិនបើអ្នកជំនួសប្រូតេអ៊ីនពីសាច់ជាមួយប្រូតេអ៊ីនសណ្ដែកសៀងរាល់ថ្ងៃ។ វាត្រូវបានរកឃើញថាការទទួលទានសណ្ដែកសៀងក្នុងបរិមាណច្រើនអាចបង្កការរំខានដល់ក្រពេញទីរ៉ូអ៊ីតដែលទទួលខុសត្រូវចំពោះការគ្រប់គ្រងនិងរក្សាតុល្យភាពនៃអ័រម៉ូន។ ជាលទ្ធផលអាចបង្កបញ្ហាអតុល្យភាពអ័រម៉ូនដែលនេះមានន័យថាដើម្បីអាចរក្សាបាននូវសុខភាពល្អប្រសើរ អ្នកគួរទទួលទានអាហារដែលផ្ដល់ប្រូតេអ៊ីនជំនួសផ្សេងទៀត។

៤. សន្លាក់លែងសូវទទួលរងការរលាក

អាហារដែលមានផ្ទុកជាតិខ្លាញ់ឆ្អែត ឬខ្លាញ់មិនល្អអាចបង្កការរលាកសន្លាក់។ ដូច្នេះការទទួលទានអាហារបួសដែលសម្បូរបន្លែផ្លែឈើដែលមានលក្ខណៈសម្បត្តិប្រឆាំងការរលាកអាចជួយសម្រាលអាការៈនៃបញ្ហារលាកសន្លាក់ឆ្អឹង។

៥. ងាយហើមពោះជាងមុន

ការទទួលទានបន្លែដូចជាប្រូខូលី និងស្ពៃក្ដោបច្រើនអាចធ្វើឱ្យក្រពះមានផ្ទុកពោរពេញទៅដោយជាតិហ្គាស។ ជាលទ្ធផលបណ្ដាលឱ្យហើមពោះ ខណៈដែលរាងកាយមិនអាចដំណើរការរំលាយជាតិសសៃទាំងអស់បាន។ ដូច្នេះអ្នកចាំបាច់គួរទទួលទានទឹកឱ្យបានច្រើនផងនៅពេលប្រកាន់យកនូវរបបអាហារបួសដើម្បីប្រាកដថាប្រព័ន្ធរំលាយអាហារ គឺមានសុខភាពល្អអាចរំលាយអាហារប្រកបដោយប្រសិទ្ធិភាពខ្ពស់។

៦. ក្លិនខ្លួនប្រែប្រួល

ទោះបីជាការទទួលទានសាច់អាចធ្វើឱ្យអ្នកបញ្ចេញនូវក្លិនជាតិពុល, ការទទួលទានបន្លែនិងគ្រាប់ធញ្ញជាតិក៏អាចបង្កភាពប្រែប្រួលនៃក្លិនខ្លួនផងដែរ។ បន្លែខ្លះមានផ្ទុកជាតិស្ពាន់ធ័រធម្មជាតិដូចជាស្ពៃក្ដោបនិងខ្ទឹមបារាំងដែលនៅពេលរួមបញ្ចូលក្នុងរបបអាហារធ្វើឱ្យញើស ក៏ដូចជាខ្យល់ដង្ហើមរបស់អ្នកចាប់ផ្ដើមមានក្លិនឈួលដូចអាហារដែលបានទទួលទានចូលនោះ។

៧. ឆ្អឹងងាយនឹងបាក់

របបអាហារបួសអាចមានន័យថាអ្នកអាចទទួលបានជាតិកាល់ស្យូមនិងវីតាមីន D ទាបជាងរបបអាហារធម្មតា។ ជាលទ្ធផលអាចធ្វើឱ្យអ្នកប្រឈមមុខខ្ពស់នឹងហានិភ័យនៃជំងឺពុកឆ្អឹងដែលដង់ស៊ីតេឆ្អឹងថយចុះ ហើយឆ្អឹងងាយនឹងបាក់។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕