ស្ពៃពួយឡេង គឺជាបន្លែមួយប្រភេទដែលអាចផ្ដល់សារធាតុចិញ្ចឹមចាំបាច់ជាច្រើនដល់រាងកាយ។ ទោះជាយ៉ាងណា ការទទួលទានច្រើនពេកអាចបង្កជាផលប៉ះពាល់គួរឱ្យបារម្ភ ជាពិសេសប្រសិនបើអ្នកកំពុងមានបញ្ហាក្រួសតម្រងនោមស្រាប់។ តាមពិតទៅមិនថាជាអាហារសុខភាពល្អអ្វីក៏ដោយ បើញ៊ាំលើសកម្រិត គឺនឹងផ្ដល់ផលអវិជ្ជមានមកជាមិនខាន។ ដូច្នេះការទទួលទានក្នុងកម្រិតមធ្យមជាគន្លឹះដ៏ល្អបំផុត! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកមិនគួរញ៊ាំស្ពៃពួយឡេងច្រើនពេក ៖
១. បង្កើនហានិភ័យនៃជំងឺក្រួសក្នុងតម្រងនោម
បន្លែនេះមានផ្ទុកសារធាតុ oxalates ដែលអាចប្រែក្លាយជាក្រួសក្នុងប្រព័ន្ធរាងកាយមនុស្សប្រសិនបើទទួលទានចូលច្រើនពេក។ ក្រួសទាំងនេះអាចត្រូវបានបង្កឡើងដោយសារកំណើននៃបរិមាណសារធាតុ oxalates ក្នុងទឹកនោម។ ប្រភេទទូទៅបំផុតនៃជំងឺក្រួសក្នុងតម្រងនោម គឺក្រួសកាល់ស្យូម oxalate។ ១០០ក្រាមនៃស្ពៃពួយឡេងមានផ្ទុកសារធាតុ oxalate ប្រមាណ ៩៧០មីលីក្រាម។ ទោះជាយ៉ាងណាការស្ងោរ ឬស្រុសស្ពៃពួយឡេងអាចជួយកាត់បន្ថយកំហាប់នៃសារធាតុ oxalate បានយ៉ាងប្រសើរ។ ប្រសិនបើអ្នកកំពុងមានបញ្ហាសុខភាពណាមួយនោះ ចូរពិគ្រោះជាមួយគ្រូពេទ្យសិនមុននឹងរួមបញ្ចូលស្ពៃពួយឡេងក្នុងរបបអាហារប្រចាំថ្ងៃ។ គួរចាំថាស្ថានភាពនៃសុខភាពមនុស្សម្នាក់ៗ គឺអាចបង្កប្រតិកម្មឆ្លើយតបមិនដូចគ្នាឡើយ។
២. បង្កផលរំខានជាមួយថ្នាំពង្រាវឈាម
ស្ពៃពួយឡេងមានផ្ទុកបរិមាណនៃវីតាមីន K ដែលជាជាតិរ៉ែមួយប្រភេទអាចកាត់បន្ថយប្រសិទ្ធិភាពនៃការពង្រាវឈាម។ ភាគច្រើននៃថ្នាំពង្រាវឈាមអាចត្រូវបានប្រើប្រាស់សម្រាប់ទប់ស្កាត់ប្រឆាំងនឹងជំងឺដាច់សសៃឈាមខួរក្បាល។ ដូច្នេះដើម្បីជាការប្រសើរ បុគ្គលដែលងាយរងគ្រោះគួរកាត់បន្ថយការទទួលទានស្ពៃពួយឡេង។ ថ្នាំពង្រាវឈាម ឬប្រឆាំងការកកឈាម Warfarin ដែលត្រូវបានចេញវេជ្ជបញ្ជាសម្រាប់បុគ្គលកំពុងប្រឈមមុខនឹងការកកឈាមគ្រោះថ្នាក់អាចថយចុះនូវប្រសិទ្ធិភាពដោយសារតែវីតាមីន K។ នេះក៏ព្រោះតែវីតាមីន K ដើរតួនាទីចាំបាច់មួយក្នុងការធ្វើឱ្យឈាមកកក្នុងរាងកាយ។ កន្លះពែងនៃស្ពៃពួយឡេងចម្អិនរួចមានផ្ទុកវីតាមីន K ០.៤៤៤មីលីក្រាម, មួយពែងនៃស្ពៃពួយឡេងស្រស់មានផ្ទុក ០.១៤៥មីលីក្រាមនៃវីតាមីននេះ។ ស្ពៃពួយឡេងដែលឆ្អិនអាចមានផ្ទុកវីតាមីន K ខ្ពស់ជាងនៅស្រស់ដោយសារតែកំណើននៃកម្ដៅបង្កើនកម្រិតនៃការស្រូបយកវីតាមីន K។ ទោះជាយ៉ាងណាអ្នកមិនគួរបំបាត់អាហារសម្បូរវីតាមីន K ដូចស្ពៃពួយឡេងចេញពីរបបអាហារទាំងស្រុងតែម្ដងឡើយ គ្រាន់តែកម្រិតការទទួលទានជាការស្រេច។ ទោះជាយ៉ាងណាដើម្បីជាការប្រសើរប្រសិនបើអ្នកកំពុងប្រើប្រាស់ថ្នាំប្រភេទណាមួយ ចូរពិគ្រោះជាមួយគ្រូពេទ្យសិនមុនរួមបញ្ចូលស្ពៃពួយឡេងក្នុងរបបអាហារ។
៣. អាចរារាំងការស្រូបយកជាតិរ៉ែសំខាន់ៗ
ការសិក្សាស្រាវជ្រាវមួយចំនួនបានបង្ហាញថា ការទទួលទានអាហារសម្បូរសារធាតុ oxalate អាចរារាំងដល់ការស្រូបយកនូវជាតិរ៉ែ។ សារធាតុ oxalate ក្នុងស្ពៃពួយឡេងអាចរារាំងដល់ការស្រូបយកនូវជាតិរ៉ែដូចជាកាល់ស្យូម។ ស្ពៃពួយឡេងមានផ្ទុកទាំងសារធាតុ oxalate និងកាល់ស្យូម ហើយការទទួលទានបន្លែនេះក្នុងបរិមាណខ្ពស់អាចបង្អាក់ការស្រូបយកកាល់ស្យូមក្នុងប្រព័ន្ធរាងកាយ។ សារធាតុ oxalate ក្នុងស្ពៃពួយឡេងក៏អាចបង្កប្រតិកម្មនឹងជាតិដែក ហើយរារាំងការស្រូបយកសារធាតុចិញ្ចឹមនេះដោយបង្កើតនូវដុំគ្រីស្ទាល់។ នៅពេលទទួលទានច្រើនពេក ស្ពៃពួយឡេងក៏អាចបង្កផលប៉ះពាល់ដល់មុខងារនៃក្រពេញទីរ៉ូអ៊ីតផងដែរ ខណៈដែលបន្លែនេះមានផ្ទុកសមាសធាតុម្យ៉ាងហៅថា goitrogens។ ដើម្បីជាការប្រសើរប្រសិនបើអ្នកកំពុងជួបប្រទះបញ្ហាក្រពេញទីរ៉ូអ៊ីត មុនពេលទទួលទាន ឬរួមបញ្ចូលស្ពៃពួយឡេងក្នុងរបបអាហារប្រចាំថ្ងៃចូរពិគ្រោះជាមួយគ្រូពេទ្យសិន។
៤. ធ្វើឱ្យរោគសញ្ញានៃជំងឺរលាកសន្លាកហ្គោដ (Gout) កាន់តែធ្ងន់ធ្ងរឡើង
ស្ពៃពួយឡេងមានផ្ទុកសមាសធាតុគីមីហៅថា purines ដែលរួមចំណែកបង្កជំងឺរលាកសន្លាក់ហ្គោដ។ បន្លែនេះក៏មានឥទ្ធិពលលើប្រសិទ្ធិភាពនៃថ្នាំមួយចំនួនផងដែរ ដូច្នេះដើម្បីជាការប្រសើរប្រសិនបើអ្នកកំពុងមានបញ្ហាពាក់ព័ន្ធនឹងជំងឺរលាកសន្លាក់ហ្គោដ ចូរពិគ្រោះជាមួយគ្រូពេទ្យសិនមុននឹងរួមបញ្ចូលស្ពៃពួយឡេងក្នុងរបបអាហារប្រចាំថ្ងៃ។
កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕