Join with Health.com.kh on Telegram

បញ្ហាក្រួសក្នុងតម្រងនោមតែងកើតឡើងនៅពេលជាតិកាល់ស្យូមមានវត្តមានច្រើនលើសពេកក្នុងតម្រងនោម។ ក្រួសក្នុងតម្រងនោមអាចបង្កការឈឺចាប់ខ្លាំងនៅពេលវាប្រែជាមានទំហំធំ។ ការទទួលទានទឹកច្រើនអាចបំបាត់ការឈឺចាប់ដោយសារក្រួសក្នុងតម្រងនោមបាន ប៉ុន្តែក៏នៅមានវិធីងាយៗផ្សេងទៀតដោះស្រាយបញ្ហានេះប្រកបដោយប្រសិទ្ធិភាពខ្ពស់ផងដែរ។ ថាតើវិធីទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអ្វីដែលអ្នកទទួលទានដើម្បីប្រយុទ្ធប្រឆាំងជំងឺនេះ ៖

១. ក្រូចឆ្មារ

ជាប្រភពដ៏ប្រសើរនៃសារធាតុ citrate ដែលរំលាយក្រួសក្នុងតម្រងនោម។ វាក៏មានលក្ខណៈសម្បត្តិប្រឆាំងអុកស៊ីតកម្មនិងបញ្ចុះទឹកនោមបែបធម្មជាតិ ហើយជួយបន្សាបជាតិពុលពីរាងកាយផងដែរ។ រីឯលក្ខណៈសម្បត្តិប្រឆាំងការរលាកនៃក្រូចឆ្មារវិញ គឺកាន់តែល្អសម្រាប់បំបាត់អាការៈឈឺចាប់ពេលនោមដោយសារក្រួស។ អ្វីដែលអ្នកត្រូវធ្វើ គឺគ្រាន់តែច្របាច់ក្រូចឆ្មារស្រស់ម្ខាងក្នុងទឹកក្ដៅឧណ្ហៗ ១កែវ និងបន្ថែមទឹកឃ្មុំបន្តិចចូល។ កូរឱ្យសព្វ សឹមទទួលទានឱ្យបាន ២ដងក្នុងមួយថ្ងៃជាប្រចាំរាល់ព្រឹកពេលមិនទាន់ញ៊ាំអ្វីផ្សេង និងនៅមុនពេលញ៊ាំបាយល្ងាច។

២. ខ្ទឹមស

មានផ្ទុកសារធាតុប្រឆាំងអុកស៊ីតកម្មដែលជួយការពាររាងកាយពីរ៉ាឌីកាល់សេរីដែលបង្កគ្រោះថ្នាក់។ វាក៏មានលក្ខណៈសម្បត្តិបញ្ចុះទឹកនោមដែលជួយកម្ចាត់ជាតិពុលពីតម្រងនោមដែលពន្លឿនភាពជាសះស្បើយផងដែរ។ បន្ថែមពីនេះសារធាតុ allicin ក្នុងខ្ទឹមសនឹងការពារតម្រងនោមពីការឆ្លងមេរោគ។ អ្វីដែលអ្នកត្រូវធ្វើ គឺគ្រាន់តែបកសំបកខ្ទឹមសប្រមាណពី ៥ ទៅ ៦កំពឹស រួចកិនវាជាមួយទឹក ១ពែង និងបន្ថែមទឹកឃ្មុំបន្តិចចូល។ ទទួលទានឱ្យបានម្ដងទៅ ២ដងក្នុងមួយថ្ងៃជាប្រចាំ។

៣. ទឹកប៉េងប៉ោះស្រស់

មានផ្ទុកសម្បូរទៅដោយសារធាតុ lycopene ដែលមានលក្ខណៈសម្បត្តិប្រឆាំងអុកស៊ីតកម្ម និងប្រឆាំងការរលាកអាចជួយទប់ស្កាត់បញ្ហាក្រួសក្នុងតម្រងនោម ព្រមទាំងបំបាត់ការឈឺចាប់។ អ្វីដែលអ្នកត្រូវធ្វើ គឺគ្រាន់តែទទួលទានទឹកប៉េងប៉ោះស្រស់ ១កែវម្ដងក្នុងមួយថ្ងៃជាប្រចាំ។

៤. តែបៃតង

អ្វីដែលអ្នកត្រូវធ្វើ គឺគ្រាន់តែឆុងតែបៃតង ១ស្លាបព្រាកាហ្វេក្នុងទឹក ១ពែងរហូតដល់ពុះដោយរមាស់ ៥នាទី សឹមត្រងកាកចេញ។ ទុកឱ្យចុះត្រជាក់បន្តិចសិន សឹមបន្ថែមទឹកឃ្មុំខ្លះចូល (ដាក់ក៏បានអត់ក៏បាន)។ ទទួលទានឱ្យបានពី ៣ ទៅ ៤ពែងក្នុងជាប្រចាំ។

៥. ទឹកដូង

គឺជាថ្នាំបញ្ចុះទឹកនោមបែបធម្មជាតិដែលមានប្រសិទ្ធិភាពយ៉ាងប្រសើរក្នុងការទប់ស្កាត់ជំងឺតម្រងនោម។ វាក៏ជួយសម្អាតផ្លូវទឹកនោម ផ្លោកនោម និងថែមទាំងអាចបំបែកក្រួសក្នុងតម្រងនោមផងដែរតាមរយៈបរិមាណនៃជាតិប៉ូតាស្យូមដែលមានផ្ទុក។ អ្វីដែលអ្នកត្រូវធ្វើ គឺគ្រាន់តែទទួលទានទឹកដូងឲ្យបានយ៉ាងហោចណាស់ពី ៣ ទៅ ៤ កែវក្នុងមួយថ្ងៃជាប្រចាំ។

ទោះជាយ៉ាងណាដើម្បីកុំឱ្យបញ្ហាកាន់តែស្មុគស្មាញឡើង អ្នកចាំបាច់គួរទៅទទួលការព្យាបាលពីគ្រូពេទ្យជំនាញឱ្យបានលឿនបំផុតតាមដែលអាចធ្វើទៅបាន។ ភាគច្រើននៃពួកយើហមិនសូវខ្វល់ខ្វាយប៉ុន្មានឡើយនៅពេលនិយាយដល់របបអាហារ និងរបៀបរបបរស់នៅមានសុខភាពល្អ។ ជាលទ្ធផលបង្កើនហានិភ័យនៃបញ្ហាសុខភាពផ្សេងៗ។ ជំងឺក្រួសក្នុងតម្រងនោមអាចបង្កផលវិបាកដល់ការរស់នៅរបស់អ្នក ដូច្នេះចាំបាច់គួរទៅទទួលការធ្វើរោគវិនិច្ឆ័យនិងព្យាបាលឱ្យបានត្រឹមត្រូវភ្លាមៗ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕