Join with Health.com.kh on Telegram

ភាគច្រើននៃពួកយើងប្រហែលជាមិនធ្លាប់ដឹងទេថា រូបមន្តធម្មជាតិមួយចំនួនអាចជួយដោះស្រាយបញ្ហាឈាមកកនៅជើងគួរឱ្យភ្ញាក់ផ្អើល។ មានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តធម្មជាតិដែលអាចជួយបំបាត់ឈាមកកនៅជើង ៖

១. ខ្ទឹមស

មានផ្ទុកសារធាតុ allicin និងសារធាតុ ajoene ដែលមានលក្ខណៈសម្បត្តិប្រឆាំងការកកឈាមដែលអាចជួយព្យាបាលបញ្ហាឈាមកករបស់អ្នកបានយ៉ាងប្រសើរ។ អ្វីដែលអ្នកត្រូវធ្វើ គឺគ្រាន់តែចិញ្ច្រាំ ឬដំខ្ទឹមសពី ៣ ទៅ ៤កំពឹស រួចចាក់ចូលឆុងក្នុងទឹកក្ដៅ ១ពែង។ រងចាំឱ្យវាចេញជាតិសិន និងទទួលទានឱ្យទាន់នៅក្ដៅឧណ្ហៗ។ អ្នកក៏អាចបន្ថែមទឹកឃ្មុំចូលបន្តិចដើម្បីបង្កើនរសជាតិផងដែរ។ ដើម្បីទទួលបានលទ្ធផលគាប់ចិត្ត ចូរទទួលទានតែខ្ទឹមសនេះឱ្យបានពី ៣ ទៅ ៤ដងជាប្រចាំ។

២. តែបៃតង

លក្ខណៈសម្បត្តិប្រឆាំងអុកស៊ីតកម្មនៃតែបៃតង គឺល្អណាស់សម្រាប់ទប់ស្កាត់ និងព្យាបាលបញ្ហាឈាមកក។ អ្វីដែលអ្នកត្រូវធ្វើ គឺគ្រាន់តែឆុងតែបៃតង ១ស្លាបព្រាកាហ្វេក្នុងទឹកក្ដៅ ១ពែង និងទទួលទានឱ្យទាន់ក្ដៅឧណ្ហៗយ៉ាងហោចណាស់ ៣ដងជាប្រចាំ។

៣. រមៀត

មានផ្ទុកសមាសធាតុ curcumin ដែលអាចផ្ដល់អត្ថប្រយោជន៍ជាច្រើនចំពោះសុខភាព និងជួយព្យាបាលបញ្ហាឈាមកកនៅជើងផងដែរ។ អ្វីដែលអ្នកត្រូវធ្វើ គឺគ្រាន់តែលាយម្សៅរមៀត ១ស្លាបព្រាកាហ្វេជាមួយទឹកដោះគោក្ដៅឧណ្ហៗ ១កែវ រួចកូរឱ្យសព្វ សឹមទទួលទានភ្លាមៗពី ១ ទៅ ២ដងជាប្រចាំ។

៤. ខ្ញី

មានផ្ទុកសមាសធាតុ salicylate ដែលជួយពង្រាវឈាមព្យាបាលការកកឈាមក្នុងជើង។ អ្វីដែលអ្នកត្រូវធ្វើ គឺគ្រាន់តែឆុងខ្ញីដែលកោសសំបករួចប្រវែង ២.៥សង់ទីម៉ែត្រក្នុងទឹកក្ដៅ ១ពែងសម្រាប់រយៈពេល ១៥នាទី។ ទទួលទានឱ្យទាន់នៅក្ដៅឧណ្ហៗពី ២ ទៅ ៣ដងក្នុងមួយថ្ងៃ។ អ្នកក៏អាចបន្ថែមទឹកឃ្មុំចូលបង្កើនរសជាតិផងដែរ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕