បុរសគ្រប់រូបដែលធ្លាប់ធ្វើដំណើរផ្លូវឆ្ងាយជាមួយស្ត្រីប្រាកដជាដឹងថាស្ត្រីត្រូវការនោមញយដងជាងបុរស។ យើងឆ្ងល់ថាតើនេះបណ្តាលមកពីភាពខុសគ្នានៃភេទ ឬកម្រិតនៃការទទួលទានទឹក?
អ្នកនឹងដឹងពីចម្លើយរបស់វា ប្រសិនបើអ្នកធ្លាប់អានអត្ថបទស្តីពីមូត្រសាស្ត្រ (The Journal of Urology) ចេញផ្សាយថ្ងៃទី ៥ ខែកុម្ភៈ ឆ្នាំ ២០០៥។ ក្រុមគ្រូពេទ្យបានសិក្សាលើកំណត់ហេតុការនោមរបស់បុរសនិងស្ត្រី និងបានកត់ត្រានូវកម្រិតទទួលទានទឹកនិងចំនួននៃការនោម។ ពួកគេបានរកឃើញថា ស្ត្រីនោមច្រើនដងជាងបុរស មិនមែនដោយសារការទទួលទានទឹកច្រើនជាងនោះទេ។ ការពិតទៅ ជាទូទៅ បុរសទទួលទានទឹកច្រើនជាងស្ត្រី ប៉ុន្តែមិនត្រូវការនោមញយដងពេកនោះទេ។
ពេលដែលបុរសត្រូវការនោម ពួកគេនោមក្នុងបរិមាណច្រើនជាងស្ត្រី។ នេះគឺដោយសារប្លោកនោមរបស់បុរសផ្ទុកទឹកនោមបានច្រើនជាងស្ត្រី ដែលមានន័យថា ស្ត្រីមានប្លោកនោមតូចជាងបុរស។ ចម្លើយបានបកស្រាយរួចហើយ ដូច្នេះ អ្នកប្រាកដជាមិនមានចម្ងល់ទៀតទេថាហេតុអ្វីបានជាបន្ទប់ទឹកស្ត្រីតែងតែមានមនុស្សច្រើនជាងខាងបុរស។