Join with Health.com.kh on Telegram

ជាមួយនឹង​ការថែរក្សា​បាន​ត្រឹមត្រូវ ធ្មេញ​និង​អញ្ចាញធ្មេញ​របស់​អ្នក​អាច​មាន​សុខភាព​ល្អ​បាន​ពេញ​មួយ​ជីវិត​របស់​អ្នក​។ ធ្មេញ​និង​អញ្ចាញធ្មេញ​របស់​អ្នក​កាន់តែ​មាន​សុខភាព​ល្អ អ្នក​នឹង​មាន​ហានិភ័យ​បញ្ហា​ដង្កូវ​ស៊ី​ធ្មេញ ពុក​ធ្មេញ និង​ជំងឺ​អញ្ចាញធ្មេញ​កាន់តែ​ទាប ដែល​បញ្ហា​ទាំងអស់​នេះ​អាច​ធ្វើឱ្យ​មាត់​អ្នក​មាន​ក្លិន​មិន​ល្អ​និង​មាន​ធ្មេញ​ដែល​មិន​ស្រស់ស្អាត​។ បញ្ហា​ក្លិន​មាត់​និង​សោភ័ណភាព​ធ្មេញ​ក៏​មាន​តួនាទី​លើ​សម្រស់​អ្នក​ទាំងមូល​ផងដែរ​។ បើ​អ្នក​មាន​ក្លិន​មាត់​មិន​ល្អ​និង​រាល់ពេល​និយាយ ញញឹម ឬ​សើច បញ្ចេញ​ធ្មេញ​ដែល​មិន​ស្អាត​មិន​នោះមក វា​អាច​ប៉ះពាល់​ដល់​ចំណាប់អារម្មណ៍​របស់​អ្នកដទៃ​មកលើ​អ្នក​។​

​តើ​ខ្ញុំ​គួរ​ថែរក្សា​ធ្មេញ​និង​អញ្ចាញធ្មេញ​ដោយ​វិធី​ណា​?

​ ​ជំហាន​សំខាន់​ទាំង​ប្រាំ​ក្នុង​ការថែរក្សា​ធ្មេញ​និង​អញ្ចាញធ្មេញ​មាន​៖

១. ដុស​ធ្មេញ​

២. ប្រើ​ខ្សែ​សម្អាត​ធ្មេញ​

៣. បរិភោគ​ឱ្យបាន​ត្រឹមត្រូវ​

៤. ទៅ​ជួប​ពេទ្យ​ធ្មេញ​

៥. ការលាង​សម្អាត​។​

ការណែនាំ​ក្នុងការ​ដុស​ធ្មេញ​

​ ​ដុសធ្មេញ​យ៉ាងតិច​ពីរ​ដង​ក្នុង​មួយថ្ងៃ​។ ប្រសិនបើ​អាច ចូរ​ដុសធ្មេញ​រាល់​ក្រោយពេល​បរិភោគ​អាហារ​។ ការ​ដុសធ្មេញ​ជួយ​សម្អាត​កំណក កំទេច​អាហារ ឬ​មេរោគ​ដែល​តោង​ជាប់​នឹង​ធ្មេញ​របស់​អ្នក​។ នៅពេល​ដែល​មេរោគ​នោះ​ប៉ះ​ជាមួយនឹង​អាហារ វា​នឹង​ផលិត​ជាតិ​អាស៊ី​ត​ដែល​ធ្វើឱ្យ​ធ្មេញ​ពុក​ឬ​ហៅ​ថា​ដង្កូវ​ស៊ី​។ ដើម្បី​ដុសធ្មេញ​បាន​ត្រឹមត្រូវ​៖

  •   ដាក់​ថ្នាំដុសធ្មេញ​មាន​ជាតិ​ហ្ល័​រ​អរ​រ៉ា​យ​ប៉ុន​គ្រាប់សណ្តែក​លើ​ក្បាល​ច្រាស់​ដុសធ្មេញ (​ប្រើ​ច្រាស់​ដុស​ដែល​ទន់​)​។​
  •   យក​ច្រាស់​ដុស​លើ​ធ្មេញ​ក្នុង​ចលនា​ជា​រង្វង់​តូច​មួយ​។ បន្ត​ដុស​ដោយ​ចលនា​នេះ​ដោយ​សម្អាត​ធ្មេញ​ម្តង​មួយៗ​។​
  •   ដុសធ្មេញ​ក្នុង​ចលនា​ជា​រង្វង់​តូចៗ​ទាំង​ខាង​លើ​និង​ខាងក្រោម ហើយ​ទាំង​ផ្នែក​ខាងក្រៅ​និង​ផ្នែក​ខាង​ក្នុង​ដែល​បែរ​ទៅ​រក​អណ្តាត​។​
  •   ក្រោយពេល​ដុសធ្មេញ​របស់​អ្នក​ពី​ពីរ​ទៅ​បី​នាទី លាង​សម្អាត​មាត់​របស់​អ្នក​ជាមួយ​នឹង​ទឹក​។​
  •   ប្តូរ​ច្រាស់​ដុសធ្មេញ​របស់​អ្នក​រៀងរាល់​បី​ទៅ​បួន​ខែ​ម្តង​។​

ការណែនាំ​ក្នុង​ការប្រើ​ខ្សែ​សម្អាត​ធ្មេញ​

​ ​ប្រើ​ខ្សែ​សម្អាត​រូស​ធ្មេញ​ម្តង​ក្នុង​មួយ​ថ្ងៃ​។ ការប្រើ​ខ្សែ​រូស​សម្អាត​ធ្មេញ​ជួយ​បំបាត់​កំទេច​អាហារ​ឬ​កំណក​ដែល​ជាប់​នៅ​ចន្លោះ​ធ្មេញ​ដែល​ច្រាស់​ដុសធ្មេញ​មិនអាច​ចូល​ទៅ​ដល់​។ ប្រសិនបើ​កំណក​នោះ​ជាប់​នៅក្នុង​ធ្មេញ វា​អាច​ឡើង​រឹង​ទៅជា​ក្រម​ធ្មេញ ដែល​ត្រូវ​លាង​សម្អាត​ចេញ​ដោយ​គ្រូពេទ្យ​ធ្មេញ​។ ដើម្បី​ប្រើ​ខ្សែ​សម្អាត​ធ្មេញ​ឱ្យបាន​ត្រឹមត្រូវ​៖

  •   កាត់​យក​ខ្សែ​សម្អាត​ពី​ប្រអប់​ប្រវែង​សមល្មម (​ប្រហែល ៥០​សង់ទីម៉ែត្រ​)
  •   រុំខ្សែ​ជុំវិញ​ម្រាមដៃ​កណ្តាល​ទាំងសងខាង ដោយ​ទុក​ចន្លោះ​ប្រហែល ៣​សង់ទីម៉ែត្រ​ទំនេរ​សម្រាប់​ធ្វើការ​រូស​សម្អាត​ធ្មេញ​។ ចូរ​រូស​សម្អាត​ធ្មេញ​ខាងលើ​មុន​សឹម​សម្អាត​ធ្មេញ​ខាងក្រោម​។​
  •   ដាក់​ខ្សែ​ក្នុង​មាត់​របស់​អ្នក​ហើយ​ប្រើ​ដៃ​ចង្អុល​រុញ​ខ្សែ​ចូលទៅ​ចន្លោះ​ធ្មេញ​។ ប៉ុន្តែ​ចូរ​ប្រយ័ត្ន​មិនត្រូវ​រុញ​ខ្លាំងពេក​នោះទេ ព្រោះ​វា​អាច​ធ្វើឱ្យ​របួស​អញ្ចាញធ្មេញ​។​
  •   រូស​ខ្សែ​ឡើង​ចុះ​នៅ​ចន្លោះ​ធ្មេញ​និង​ជុំវិញ​គល់​អញ្ចាញ​។ ខ្សែ​សម្អាត​ត្រូវ​រូស​ក្នុង​ទម្រង់​ជា​រាង​អក្សរ C ជុំវិញ​ធ្មេញ​នៅពេល​ដែល​អ្នក​រូស​។​
  •   រូស​រាល់​គ្រប់​ចន្លោះ​ធ្មេញ​និង​ផ្នែក​ខាងក្រោយ​នៃ​ធ្មេញ​។